Qurbanlı R.

Xarici dilli nazir

Ən yeni tariximizin on ilini gənclərin, idmançıların, turistlərin və mədəniyyət xadimlərinin rəhbəri vəzifəsində çalışan Əbülfəs Qarayevin 50 yaşı tamam olur. Azərbaycan musiqisində adı bütün dövrlərdə böyük hərflərlə yazılan bəstəkar Qara Qarayevin qardaşı oğlu, teatr sənətində yeni bir məktəb yaradan rejissor Tofiq Kazımovun kürəkənidir. Göründüyü kimi əsilli-köklü ziyalıdır. Xarici Dillər İnstitutunu bitirib, fəlsəfə elmləri namizədidir. Saatlı rayonundakı orta məktəblərin birində müəllim işləyib, Azərbaycanın ilk gənclər və idman naziri olub. Sentimentallığı da var, Buna baxmayaraq, əsl sənət adamlarını, sıravi insanları qiymətləndirə bilir. Çox mədəni, ziyalı insan olduğundan

çıxışlarında Azərbaycan dilinin qol-qanadını qırıb tökməyini ona bağışlamaq olar. Əsas odur ki, özü və dili üzərində səylə çalışır. Bu səyini kənardan belə görmək mümkündür. Bəlkə də ilk nazirdir ki, mədəniyyət və turizm naziri təyin olunandan bir neçə ay sonraya təsadüf edən kino günündə kinostudiyanın ən adi texniki işçilərinə mükafatı öz əlləri ilə bir-bir ərinmədən, yorulmadan və digər həmkarlarından fərqli olaraq bunu özünə şərəf bilərək təqdim etdi. Bütün mədəniyyət

tədbirlərində iştirak etməyə, çıxış edib həm də səmimi sözlər söyləməyə, hətta Göyçayda keçirilən "Nar bayramı"nda nar yeyib, onun şirəsini də içib "Əsas budur" deməyə də vaxt tapır. Bu günlərdə onu Dövlət Kukla Teatrında da görüblər. Uşaqlarla birlikdə oturub səbirlə tamaşanın sona çatmasını gözləyib. Deyilənə görə son illər yolunu bu teatrdan salan və tamaşanı izləyən yeganə nazirdir.

Diqqətcildir, səmimidir. Bu keyfiyyətlərin cəm halında məmurda birləşməsi nadir hadisədir. Azərbaycanda çalışqan nazir kimi imic qazanıb. 1956-cı ildə noyabrın 13-də dünyaya gəlib. Deməli yubileyidir. 50 yaşı tamam olur.

ARZULAR

Azər Paşa Memət (Teatr Xadimləri İttifaqının sədri, rejissor):

- Əvvəlcə Tanrı onu ailəsinə, əzizlərinə, sonra da

mədəniyyətimizə çox görməsin. Çünki çox böyük işlər görmək istəyir, kaş istəkləirinin hamısı həyata keçsin, onun arzularının çin olması mədəniyyətimizə lazımdır.

Vaqif İbrahimoğlu (Dövlət "Yuğ" Teatrının baş rejissoru):

- Hər bir insanın bir neçə ad günü olur. Birincisi, dünyaya gəldiyi gün, ikincisi, özündən ötrü çox əhəmiyyətli olan gün, üçüncüsü, millət üçün, mənəviyyat üçün iş görməyə gəldiyi gün. Çox hörmətli Əbülfəs Qarayevin dünyaya gəldiyi gündə bəlli, onun milli mədəniyyət tarixində iş görmək üçün təyin olunduğu gün də. İkinci ad gününü isə özündən başqa heç kim bilməz. Bilməsəm də hər üç ad gününü təbrik edir, uzun ömür və cansağlığı arzulayıram. Bunu Tanrıdan diləyək,qalanının onun özündən.

Akif İslamzadə (AXCP Rəyasət Heyətinin üzvü):

- Sənət adamlarının öz "kaprizləri" olur. Ona görə də Əbülfəs bəyi nazir kimi məşəqqətli günlər gözləyir. Böyük bir nəslin yetirməsi olduğu üçün onun mədəniyyətimizin inkişafı üçün maraqlı proqramları var. Çox məsələlərdə fikirlərimiz və istəklərimiz üst-üstə düşür. İnanıram ki, bir nazir kimi onun görəcəyi işlər mədəniyyətimizin inkişafına böyük töhfələr verəcək. Əbülfəs bəyin yubileyini təbrik edir, cansağlığı arzulayıram. Arzum budur ki, nəzərdə tutduğu proqramları həyata keçirə bilsin.

Gün.- 2006.- 11-17 noyabr.- S. 4.