Naxçıvanda Beynəlxalq konfrans keçirilmişdir

Noyabrın 20-də Naxçıvan Şəhər İcra Hakimiyyətində "Naxçıvan Muxtar Respublikasında turizm: inkişaf və perspektivlər" mövzusunda beynəlxalq konfrans keçirilmişdir.

İştirakçılar foyedə muxtar respublikanın turizm imkanlarına dair sərgi ilə tanış olmuşlar.

Tədbirdə respublika Mədəniyyət və Turizm Nazirliyinin nümayəndələri ilə yanaşı, İran İslam Respublikasının Qərbi və Şərqi Azərbaycan, Türkiyənin Qars, Ərzurum və İqdır vilayətlərindən gəlmiş qonaqlar da iştirak etmişlər.

Naxçıvan Muxtar Respublikası Ali Məclisinin sədri Vasif Talıbovun tədbir iştirakçılarına ünvanlanmış təbrik məktubu oxunmuşdur.

Sonra Naxçıvan MR-in Mədəniyyət və Turizm naziri Sarvan İbrahimov "Naxçıvan Muxtar Respublikasında turizm: inkişaf və perspektivlər", Naxçıvan Dövlət Universitetinin müəllimi Əli Cabbarov "Cəmiyyətin sosial inkişafında turizmin rolu və Naxçıvan Muxtar Respublikasında onun perspektivləri" mövzusunda məruzələr etmişlər.

Məruzələr ətrafında Qars valiliyinin mədəniyyət və turizm üzrə iş müdiri Kənan Dekiş, Azərbaycan Mədəniyyət və Turizm Nazirliyinin bölmə müdiri Mahir Qəhrəmanov, Naxçıvan MR-in ekologiya və təbii sərvətlər naziri Hafiz Yaqubov, AMEA Naxçıvan bölməsinin Bioresurslar İnstitutunun direktoru Tariyel Talıbov və başqaları çıxış etmişlər.

Respublika.- 2006.- 21 noyabr.- S. 3.