Norveçdə "Azərbaycan Odlar ölkəsidir" sərgisi açılıb

Norveçin Stavanger Şəhər Arxeologiya Muzeyində "Azərbaycan Odlar ölkəsidir" sərgisi açılıb. Sərgidə Azərbaycan Tarix Muzeyindən, habelə Azərbaycan Xalçası və Xalq Tətbiqi Sənəti Dövlət Muzeyindən göndərilmiş eksponatlar, müasir Azərbaycan rəssamlarının əsərləri nümayiş etdirilir.
Tarix Muzeyinin 150 eksponatı müxtəlif fondların - arxeologiya, orta əsr silahları, etnoqrafiya fondlarının materiallarından ibarətdir. Xalça muzeyi üç xalı təqdim edib. Bakı İncəsənət Mərkəzi fırça ustalarımızın yeddi rəsmi və paytaxtımızın həyatından səhnələr əksini tapmış altı fotoşəkillə təmsil olunub.
Azərbaycan Tarix Muzeyinin və Stavanger Şəhər Arxeologiya Muzeyinin təşəbbüsü ilə təşkil edilmiş sərgiyə tamaşaçılar gələn il aprelin 15-dək baxa biləcəklər. Bu müddətdə onlar rəssam, dizayner və təsviri sənət tənqidçisi Eli Qladerin ölkəmizə dair işləri ilə də tanış olacaqlar. Onun həyat yoldaşı xidməti vəzifəsi ilə əlaqədar bir neçə il respublikamızda yaşayıb. Azərbaycan qadınlarının həyatı və şəhərimizin məişəti ilə bağlı fotoşəkilləri, layihələri də o illərdən yadigardır. Əslində, iki ölkənin muzeyləri arasında əlaqə yaradılmasının və bu sərginin təşkilinin səbəbkarı məhz xalqımıza və adət-ənənələrimizə sıx bağlanmış Eli Qladerdir.
"Azərbaycan Odlar ölkəsidir" sərgisinin açılışında Tarix Muzeyinin direktoru Nailə Vəlixanlı və muzeyin digər nümayəndələri iştirak ediblər, dünya şöhrətli bəstəkar Firəngiz Əlizadənin konserti olub. Nailə xanım bildirib ki, Azərbaycanın zəngin tarixinə, mədəniyyətinə və incəsənətinə maraq nəzərə alınaraq belə sərgilər başqa ölkələrdə də keçiriləcək.

Azərbaycan.- 2006.- 23 noyabr.- S.7.