Lətif Kərimovun anadan olmasının 100 illiyinə həsr edilmiş sərginin açılışı olub

Azərbaycan Dövlət Xalça Muzeyində görkəmli xalçaçı-rəssam, alim Lətif Kərimovun anadan olmasının 100 illiyinə həsr edilmiş sərginin açılışı olub. Tədbirdə çıxış edən Mədəniyyət və Turizm naziri Əbülfəs Qarayev L. Kərimovun yaradıcılığından danışıb. Onun sözlərinə görə, azərbaycanlı xalçaçı-rəssamın yubileyi dekabrda UNESCO-nun qərargahında da keçiriləcək. Akademik Bəkir Nəbiyev isə bildirib ki, Lətif Kərimov ilk dəfə Azərbaycan xalçalarını tam olaraq tədqiq edərək onları növlərə, qruplara, məktəblərə ayırıb. Azərbaycan Milli Elmlər Akademiyasının prezidenti Mahmud Kərimov, Azərbaycan Rəssamlar İttifaqının sədri, xalq rəssamı Fərhad Xəlilov və başqaları da söz alaraq L. Kərimovun çoxşaxəli yaradıcılığından söz açıblar. Muzeyin ekzpozisiyasında rəssama həsr olunmuş "Ömrün naxışları" adlı sənədli film nümayiş etdirilib. Bununla yanaşı, Lətif Kərimovun yubileyinə həsr edilmiş albom-kataloq da təqdim olunub. Qeyd edək ki, yubiley sərgisindən avvəl tədbir iştirakçıları Fəxri Xiyabanda Lətif Kərimovun qəbirüstü abidəsinin açılışına qatılıblar.

Vətəndaş həmrəyliyi.- 2006.- 15-19 noyabr.- S. 16.