TURKSOY-un rəhbəri kim olacaq

Əbülfəs Qarayev: "Hələlik ümumi danışıqlar gedir"

Mədəniyyət və Turizm naziri Əbülfəs Qarayev TÜRKSOY-a rəhbərlik edə bilər. Nazir açıqlamasında TÜRKSOY rəhbəri postuna namizədliyi ilə bağlı danışıqlar getdiyini təsdiqləyib.

"TÜRKSOY rəhbəri postuna namizədliyimlə bağlı hələlik ümumi danışıqlar gedir. Hesab edirəm ki, heç bir şeyə baxmayaraq, Azərbaycan bu qurumda öz mövqeyini itirməməlidir".

Qeyd edək ki, TÜRKSOY-a rəhbərlik edən Azərbaycanın sabiq mədəniyyət naziri Polad Bülbüloğlu Rusiyaya səfir göndərildikdən sonra quruma yeni rəhbər seçilməsi məsələsi aktuallaşıb.Quruma üzv dövlətlər TÜRKSOY sədri postuna namizəd məsələsində hələ də razılığa gələ bilməyiblər. İlk öncə bu posta türkçü-yazar, Əhməd Yəsəvi Vəqfinin prezidenti, Türkiyənin sabiq mədəniyyət naziri Namiq Kamal Zeybəkin namizədliyi müzakirə olunsa da, adı çəkilən şəxs rus dilini bilmədiyinə görə, onun TÜRKSOY-a rəhbərlik etməsi məqbul sayılmayıb. Digər namizəd, görkəmli yazıçı Çingiz Aytmatovun namizədliyindən isə bu şəxsin səhhətində ciddi problemlər olması səbəbilə vaz keçilib. Hazırda iştirakçı dövlətlər Azərbaycan, Qazaxıstan, Özbəkistan və Türkmənistandan olan namizədlərin razılaşdırılmasını davam etdirilər. Bu posta ən real namizədlərdən biri Azərbaycanın mədəniyyət naziri Əbülfəs Qarayev sayılır. Lakin onun TÜRKSOY-a rəhbərlik etməsi məsələsi bütün iştirakçı dövlətlər tərəfindən razılaşdırılmalıdır.

Səs.- 2006.- 23 noyabr.- S.12.