Nəzakət

"Kişiləri qoruyun" filminin təqdimatı olundu

Filmin ideyası cəmiyyətlə sıx bağlıdır

Şəhriyar adına Bakı Mədəniyyət Mərkəzində "Kişiləri qoruyun" adlı bədii filmin təqdimat mərasimi keçirildi. Təqdimat mərasimini giriş sözü ilə açan respublikanın əməkdar artisti Ramiz Əzizbəyli çıxış edərək "Kişiləri qoruyun" filmi və onun yaradıcı heyəti haqqında danışdı. O, Əhməd Orucoğlu haqqında fikirlərini iştirakçılarla bölüşdürdü: "Əhməd Orucoğlu olduqca səmimi insan, istedadlı, yaradıcı şəxsdir. O, ilk addımlarını Azərbaycan dövlət televiziyasında atmışdır. Televiziyanın çox görkəmli yaradıcı şəxsləri ilə bərabər işləmiş, yaradıcılıq fəaliyyətini davam etdirmişdir. Onun ssenarisi əsasında bir çox filmlər bədii həllini tapmışdır".

Aktyor çıxışında Azərbaycan kino sənəti tarixində, eləcə də yaradıcı şəxslərin əməyinin üzə çıxarılmasında rolu olan Azərbaycan Dövlət Teieviziyasının xidmətlərini qeyd etdi. Belə ki, 50 illik yubileyini qeyd edən Azərbaycan televiziyasının ekranlarından saysız tamaşaçılara kino sənəti tarixinin nadir nümunələri olan filmlər nümayiş etdirilmiş, onlarda kinofilmlərə qarşı məhəbbət oyanmışdır.

Ramiz Əzizbəyli "Kişiləri qoruyun" filminin yaradıcı heyəti haqqında iştirakçılara məlumat verdi. Qeyd etdi ki, filmin ssenari müəllifi Əhməd Orucoğlu, quruluşçu rejissoru Şərif Qurbanəliyev, bəstəkarı Natiq Qəzənfəroğlu, rəssamı Məlahət Səmədzadə, operatoru Adil Abbasdır. Filmdə əsas rolları tanınmış aktyorlar, respublikanın xalq artisti Yaşar Nuri, əməkdar artist Çingiz Əhmədov, Ramiz Əzizbəyli, aktyorlardan Nəsibə Eldarova, Coşqun Rəhimov, Tural Əsədov, Qurban Mənsimov oynayırlar.

Ramiz Əzizbəyli təqdimat mərasimində çıxış üçün sözü Əhməd Orucoğluna verdi. Filmin yaranma səbəbindən, beiə bir mövzuda ssenari yazmasından söz açmaqla yanaşı, Azərbaycan televiziyasının əvəzsiz xidmətlərini də qeyd etdi. "Kişiləri qoruyun" filminin ssenarisini yazmaq qərarına gəlincə isə, o, qeyd etdi ki, bu filmin ideyası, məhz cəmiyyəti həyatından yaranmışdır.

Yaradıcı şəxslərin qısa çıxışlarından və təqdimatından sonra, iştirakçılara "Kişiləri qoruyun" filmi təqdim olundu. Filmdə baş və epizodik rolların ifaçıları öz qəhrəmanlarını xarakterinə uyğun bir şəkildə oynamağa çalışmışlar. Janr etibarı ilə komik olan film tamaşaçıda gülüş doğursa da, əslində, bu gülüşün arxasında islahedici bir gülüş dururdu. Müəllif, eləcə də rejissor bu baxımdan çıxış edərək filmin ideya və məzmununa dolğunluq bəxş etməyə cəhd göstərmişlər.

Müəllifin və rejissorun ideyasını gerçəkləşdirməyə çalışan aktyorlar isə potensial qüvvələrindən istifadə edərək "Kişiləri qoruyun"un ideyasını qabartmaq məqsədilə tərəf müqabili olduqları obrazlarla canlı ünsiyyət yaratmağa müvəffəq olmuşlar. Yəni bu ünsiyyət onların səmimi ifaları, çıxışları ilə özünü göstərirdi. Cəmiyyət və ətraf mühitdə baş verən proseslərin əksi bu filmdə bədii, obrazlı bir şəkildə təqdim olunmuşdur. Obrazları öz dilində və qiyafəsində canlandıran aktyorların əksəriyyəti professional olsa da, filmdə olduqca gənc olan yaradıcı şəxslər də rol almışdılar.

Səs.- 2006.- 16 noyabr.- S. 12.