Mükərrəmoğlu M.

VI Beynəlxalq Audiovizual festival başa çatdı

Xəbər verdiyimiz kimi, oktyabrın 31-dən noyabrın 4-dək Azərbaycan Professional Rejissorlar Gildiyası növbəti Beynəlxalq Audiovizual festival keçirdi. Festivalın nəticələri artıq məlumdur. Zuğulbadakı Beynəlxalq “Gənclik” mərkəzində keçirilən bu festivalda dünyanın müxtəlif ölkələrini təmsil edən gənc kinematoqrafçıların 76-ya yaxın audiovizual əsəri nümayiş etdirilmişdir.
Münsiflər heyəti “Qızıl pəri” mükafatlarını ən yaxşı əsərlərin müəllifinə təqdim etdi. Festivalın baş mükafatının — “Ən yaxşı audiovizual əsər” nominasiyasının qalibi “Çıxış” sənədli filminin rejissoru Nəsimi Əliyev oldu. “Ən yaxşı video-art” nominasiyasında üç əsər qalib sayıldı. “Entropiya” (Türkiyə, rejissor Ozan Özdilek), “Qarşıdurma”, “Gecə düşüncələri” (Azərbaycan, rejissor Tamilla İbrahimova). “Ən yaxşı tələbə işi” nominasiyasında mükafatı isə “ElektraZenSunte” filmi qazandı (rejissor Alessnadro Bruçini, İtaliya). “Ən yaxşı reklam” (“Narko”, rejissorlar Fuad Əliyev və Anar Məlikli), “Ən yaxşı prodüser işi” (”Çalış nəfəs alma", rejissor Aynur Mustafayeva) nominasiyalarında azərbaycanlı sənətçilər qalib olmuşlar.
“Ən yaxşı klip”, “Ən yaxşı televiziya müəllif proqramı” nominasiyasında mükafatları gürcülər qazanmışlar (“Əlillər”, rejissor Şota Kalandadze", “Oturub baxıram”, rejissor Dmitri Myasnikov).
Cizgi filmi üzrə mükafatı ispan rejissorları M. Rida və A. Solans “Lupe və Bruno” əsərinə görə qazandılar. Ukraynalı rejissor Taras Tolmenko “Liza” sənədli filminə görə mükafat qazandı.
“Duman atı” ən yaxşı bədii film hesab olundu. Filmi İran rejissoru Məcid Fəthi çəkmişdir. Digər İran rejissoru Naqhi Nemətinin “Onunla” filmi “Ən yaxşı rejissor işi” nominasiyasının qalibi oldu.
“Ən yaxşı operator işi” nominasiyasında ukraynalı Vladimir İvanov, “Ən yaxşı ssenari” nominasiyasında isə mükafatı iranlı Babək Minəqi “Aqil” ssenarisinə görə layiq görüldülər.
Bundan başqa, festival iştirakçılarına ictimai təşkilatların da mükafatları təqdim olundu.

Xalq qəzeti.- 2006.- 10 noyabr.- S. 7.