Turanə

Hüseynağa Atakişiyevin xatirə gecəsi keçirildi

Dünən Kinematoqrafçılar İttifaqında Hüseynağa Atakişiyevin xatirə gecəsi keçirildi. Azərbaycan Professional Kinoaktyorlar Gildiyasının təşkilatçılığı ilə reallaşan tədbirdə rejissorun sənət dostları iştirak edirdi. Əvvəlcə Dövlət Gənclər Teatrının rejissoru və aktyor Sərvər Əliyev çıxış edərək mərhum Hüseynağa Atakişiyevin insani keyfiyyətlərindən danışdı. Hüseynağa müəllim üçün dost kəlməsinin olduqca əziz və dərin məna kəsb etdiyini bildirən S.Əliyev bu münasibətin rejissor üçün nə qədər önəmli olduğunu dedi: "Hüseynağa Atakişiyevin sənət yolu Şəki Teatrından başlayıb. Onun Şəkiyə qeyri-adi məhəbbəti var idi. Hətta Şəkiyə çatan kimi, baxmäyaraq ki, şəkili deyildi, hər kəslə o şirin ləhcə ilə danışırdı".

APKG-nin icraçı direktoru Cəmil Quliyev də çıxışında Hüseynağa Atakişiyevlə bağlı maraqlı xatirələrini danışdı.

Anım gecəsində çıxış edən mərhumun uşaqlıq və gənclik dostu Ramiz Əzizbəyli Hüseynağa Atakişiyevin yalnız fiziki mənada mövcud olmadığını bildirdi. "Hüseynağa elə sənətkarlardandır ki, sənətə dəyər verəcək insanlar durduqca onun adı, sənəti yaşayacaq. Onun yaratdığı ekran əsərləri və tamaşaları görünənləri görənlərə dolğun və aydınlığı ilə çatdırır. Mən ilk tanışlığımızda onun səmimiliyinin vurğunu oldum. Doğrudur, dostluq etmək üçün ilk addımı mən atmışdım. Amma sonra o, mənə qardaşlıq münasibətini təklif etdi. Bu məsələdə ən çox qazanan mən oldum. Çünki onun kimi sözün əsil mənasında gözəl qəlbi olan saf və dürüst bir adamı tanıdım. Mən Hüseynağa ilə məktəbdə oxuyarkən bir partada oturmuşuq. O, uşaqlıqdan vətənə dərin məhəbbət hissi ilə böyüyüb. 25 illik fəaliyyətimə baxmayaraq nifrət edərək qaçdığım aktyor sənətinə məni qaytaran Hüseynağa oldu. O, mənə deyirdi ki, sən bu sənətlə yaşayırsan, biz bir yerdə böyümüşük, içindəki aktyorun oyununu çox yaxşı bilirəm. Gəl sənətinə qayıt. Çəkinmədən deyə bilərəm ki, o, yeganə insan idi ki, məhz ona görə son illər Azərbaycan teatrına hörmət bəsləyirdilər. Hüseynağa bu sənətdə daha nə eksperimentlər aparmayıb? Onun sənəti qarşısında biz layiqli işlər görməliyik. Təməlini qoyub getdiyi səviyyədən aşağı işlər təqdim etməyə ixtiyarımız yoxdur”.

Hüseynağa Atakişiyevin yaradıcılığının tədqiq olunması təklifini irəli sürən Məryəm Əlizadə rejissoru böyük masştablı sənətkar adlandırdı. "Hüseynağa üçün sadəcə mənəvi sərhəd var idi. O, azad insan olması ilə yanaşı, həm də azad bir sənətkar idi.

İnanıram ki, hələ uzun illər Hüseynağa Atakişiyev fenomeni yaşayacaq və hər zaman bu sənət üzərində adı ilə pərvazlanacaq. O, Şəki Teatrındakı fəaliyyəti ilə sübut etdi ki, əyalət teatrı deyilən bir anlayış yoxdur".

Dramaturq Firuz Mustafa isə münasibətlərinin yaradıcılıq ünsiyyətindən başladığını, daha sonra isə sənət dostu olduqlarını söylədi.

Tədbirdə xalq artisti Həmidə Ömərova, Aydın Əzimov, Həsən Həsənov və sair sənətkarlar çıxış edərək Hüseynağa Atakişiyev haqqında xoş təəssüratlarını söyləyərək onu geniş amplualı rejissor adlandırdılar. Xatirə gecəsində rejissorun quruluş verdiyi tamaşalardan fraqmentlər nümayiş olundu.

Yeni Azərbaycan. -2006.- 2 noyabr.- S. 8.