Bəstəkarımız ürəkləri fəth edir

Alman rejissorları qrupunun ərsəyə gətirdiyi "Azərbaycandan olan maestro" sənədli filminin əsasını Almaniya - Köln, Bonn, Hamburq, Berlin radio verilişlərindən fraqmentlər təşkil edir. Bu 55 dəqiqəlik lent Qərb tamaşaçılarına yaxşı tanışdır, Şərq və Qərb mədəniyyətlərinin dialoquna həsr olunmuş Morgenland ("Dan ulduzu") festivalında müvəffəqiyyətlə nümayiş etdirilib.
Bu günlərdə isə alman sənədli film ustalarının dünya şöhrətli bəstəkar Firəngiz Əlizadənin yaradıcılığından söhbət açdıqları film "Kapellhaus" Almaniya-Azərbaycan Mədəniyyət Mərkəzində göstərilib. Firəngiz xanım filmdə bütün qitələrdə məşhur bəstəkar, müasir klassik musiqinin ən parlaq müəlliflərindən biri kimi təqdim edilir. F.Əlizadənin əsərləri Avropa və Amerikanın ən nüfuzlu festivallarında səslənir, onun ifaçıları sırasında Mstislav Rostropoviç, İvan Monigetti, Kronos Huartet, Evelin Qlenni, "La Strimoellata Bern", "Kontinium" və digərləri kimi aparıcı solistlər və kollektivlər var. Yo-Yo Manın "İpək yolu" layihəsində "Dərviş" kompozisiyası ilə iştirakı həmyerlimizi daha da məşhurlaşdırıb.
Firəngiz Əlizadə təkcə Azərbaycanda deyil, bütün keçmiş SSRİ-də avanqard musiqi əsərlərinin ilk ifaçısı kimi tanınır. O, "Qara Qarayev", "Azərbaycanda simfonik musiqi" kitablarının, Azərbaycan bəstəkarları və musiqisi haqqında 150-dən çox məqalənin müəllifi, müasir musiqinin fəal təbliğatçısı, Şenberqin əsərlərinin ən yaxşı təsnifatçısıdır. Hər il keçirilən Lüsern müasir musiqi festivalının bütün tarixi ərzində ilk dəfə Firəngiz xanım 1999-cu ildə aparıcı bəstəkar adına layiq görülüb. 2003-cü ildə F.Əlizadə onu XXI əsrin görkəmli intellektualları siyahısına daxil etmiş Kembric Bioqrafik Mərkəzinin diplomu və medalı ilə mükafatlandırılıb.
"Azərbaycandan olan maestro" filmi həmvətənimizin Almaniya səhifələrini əks etdirir. O, 15 ildir bu ölkədə yaşayır və yaradıcılığı ilə Azərbaycanın şöhrətini buradan bütün planetə yayır. Dünyanın ən məşhur simfonik orkestrləri və musiqi kollektivləri istedadlı və tanınmış müasir bəstəkarlar cərgəsində Firəngiz xanımın əsərlərini də öz proqramlarına salırlar. F.Əlizadə bir tərəfdən yüksək peşəkarlığı, gərgin əməyi, digər tərəfdən, şübhəsiz, dahiliyi sayəsində Asiya, Amerika, Avropa ölkələrinin bəstəkarları ilə rəqabətdə həmişə uğur qazanır. İfaçıları deyirlər:
- Bu azərbaycanlı qız tayı-bərabəri olmayan bəstəkardır. Onun əsərlərini ifa edərkən biz musiqinin qanadında sanki başqa bir dünyaya uçuruq. Firəngiz Əlizadənin hamının anladığı musiqisi ürəkləri fəth edir, adamı sehirli bir aləmə aparır, mədəniyyətlərin dialoquna qovuşdurur.

Azərbaycan.-2006.- 9 noyabr.- S. 8.