Zəhra

"Azərbaycan tarının atası" yad edilib

Ustad tarzən Sadıqcanın 160 illiyi qeyd olunub

Ötən gün Musiqi Mədəniyyəti Muzeyində görkəmli tarzən Sadıqcanın 160 illiyinə həsr olunan tədbir keçirilib. Mərasimi giriş sözü ilə muzeyin direktoru, sənətşünaslıq namizədi Alla Bayramova açaraq, Sadıqcanın Azərbaycan musiqi sənətinin inkişafında böyük rolu olduğunu vurğulayıb. O, Sadıqcanın həm mahir tar ustası, həm də istedadlı muğam ifaçısı kimi tarixə düşdüyünü söyləyib.

Muzeyin şöbə müdiri Təranə Qazıyeva Sadıqcanın həyat və yaradıcılığı haqqında danışıb: "Musiqi tariximizdə müstəsna rol oynayan Sadıqcan 1846-cı ildə Şuşada anadan olub. Uşaqlıqdan xalq musiqisinə böyük həvəs göstərib. Böyük istedada və qabiliyyətə malik tar ifaçısı musiqi sahəsində yeniliklər edib. O, tarda mükəmməl ifası ilə tanınmaqla yanaşı, tarın ifaçılıq imkanlarını genişləndirib. Tarzən bu musiqi alətinə daha 5 sim əlavə edərək, 11 simli tar yaradıb. Azərbaycanda onu "Tarın atası" adlandırırlar. Sadıqcan 1902-ci ildə Şuşada vəfat edib.

Mədəniyyət və İncəsənət Universitetinin dosenti, əməkdar artist Zamiq Əliyev musiqi sənətində böyük rolu olan sənətkarların yubileylərinin qeyd edilməsini yüksək qiymətləndirib: "Sadıqcan təkcə tarda deyil, bir çox musiqi alətlərində ifa etməyi bacarıb, gözəl muğam ifaçısı olub. Onun kimi istedadlı ifaçıların səyi nəticəsində muğamımız bu gün inkişaf etmiş musiqi növlərindən biridir. Sevindirici haldır ki, bu gün Sadıqcan ənənəsini davam etdirən gənclərimiz var. Dövlət tərəfindən də muğamlarımıza diqqət və qayğı gün-gündən artır".

Mədəniyyət və İncəsənət Universitetinin musiqi sənəti fakültəsinin dekanı, əməkdar artist Vamiq Məmmədəliyev gənclərimizin Sadıqcan ənənələrinə böyük maraq göstərdiyini bildirib: "Dəyərli sənətkarları xatırlamaq xalq musiqisinə olan böyük hörmət və marağın sübutudur. Biz belə tədbirlər keçirərək gənclərimizə musiqimizin, ifaçılıq sənətimizin görkəmli nümayəndələrini geniş tanıtmalıyıq. Sadıqcan tarda bir çox yeniliklər edən, tarı təkmilləşdirən sənətkar kimi musiqi tariximizdə müstəsna yer tutan sənətkardır".

Sadıqcanın nəticəsi Sabir Sadıqov görkəmli tarzənin yaradıcılığına dəyər verənlərə, onun xatirəsini yad edənlərə təşəkkürünü bildirib.

Yubiley mərasimində tarzənlərdən Vamiq Məmmədəliyev "Nəva", Elxan Mansurov "Mahur-hindi", Zamiq Əliyev "Bayatı-Şiraz", Sadıqcan adına müsabiqənin qalibi Vüsal İsgəndərzadə "Çahargah", xanəndələrdən Mənsum İbrahimov "Dilkəş", Təyyar Bayramov "Segah" təsnifini səsləndirib. Tədbir çərçivəsində "Sadıqcan və onun davamçıları" adlı sərgi nümayiş olunub. Həmçinin mərasimdə Açıq Cəmiyyət İnstitutu - Yardım Fondunun dəstəyilə buraxılan, musiqi mədəniyyətimizin tarixini özündə əks etdirən muzey eksponatları təsvir olunmuş suvener dəftərxana məmulatlarının təqdimatı keçirilib.

525-ci qəzet.- 2006.- 11 noyabr.- S. 22.