Gülər

Oqtay Ağayevi itirdik

Xalq artisti dünən Yasamal qəbiristanlığında torpağa tapşırıldı

Dünən səhər saatlarında xalq artisti, tanınmış müğənni Oqtay Ağayev 73 yaşında ürək çatışmazlığından dünyasını dəyişib. Dünən saat 14.00-dan başlayaraq Rəşid Behbudov adına Dövlət Mahnı Teatrında mərhumla vida mərasimi keçirihb.

Vida mərasimində çıxış edən Mədəniyyət və Turizm nazirinin müavini Ədalət Vəliyev mərhumun Azərbaycan mədəniyyətində danılmaz xidmətləri olduğunu qeyd edib: "Oqtay Ağayevin mahnıları heç vaxt unudulmayacaq. Onun özünəməxsus ifası bizim yaddaşımızda həmişə qalacaq. Oqtay Ağayev Tofiq Quliyev, Rauf Hacıyevdən başlamış gənc bəstəkarlara qədər hamı ilə - bütün istedadlı bəstəkarlarla əməkdaşlıq edirdi. Onun üçün əsas məğz bəstəkarın adı-sanı deyil, musiqisinin gözəlliyi idi. Bütün SSRİ-nin sevimlisi olan Oqtay Ağayevi itirməyimiz bizim üçün ağırdır. Bu insan yaşadığı ömür ərzində heç zaman şikayət etmirdi və öz problemləri ilə heç kimi narahat etmirdi".

Mərasimdə xalq artisti Natəvan Şeyxova O.Ağayevin Azərbaycan mədəniyyətində tutduğu mövqe və insanlığı ilə seçildiyini deyib.

Azərbaycan Bəstəkarlar İttifaqının katibi, professor Ramiz Zöhrabov qeyd edib ki, 100 illər keçsə belə, o, yaddan çıxmayacaq: "İfa etdiyi hər bir mahnının lent yazısı televiziyalarda, radio dalğalarında səslənəcək. Çünki o hər ifası ilə şedevr yaradıb".

Xalq artisti Mübariz Tağıyev isə gənclərə sənətlərində Oqtay Ağayev kimi diqqətli olmağı və daima öz üzərində işləməyi məsləhət görüb: "Oqtay Ağayev 73 yaşına kimi səhnədə çıxış etdi. Bu onun sənətinə olan məhəbbətindən irəli gəlirdi. Son zamanlar deyirdi ki, yaman çox ulduzlar peyda olur. Düz deyirdin, Oqtay, çoxdurlar, ancaq mən ümidvaram ki, onlar sənin yolunu davam etdirəcəklər".

Bəstəkar Rauf Abdullayev də matəm mitinqində çıxış edərək mərhumun ailəsinə başsağlığı verib. Sonra mərhum Yasamal qəbiristanlığında torpağa tapşırılıb.

Oqtay Ağayev 1935-ci ildə anadan olub. 1953-cü ildə Asəf Zeynallı adına Musiqi Texnikumuna daxil olub. Sonralar R.Hacıyevin rəhbərlik etdiyi Azərbaycan Dövlət Estrada Orkestrinin solisti olub.

1962-ci ildə həmin orkestrlə Kreml Sarayında böyük konsert verib. Əlcəzair, Mərakeş, Polşa, Çexoslovakiya, Bolqarıstan, Rumıniya, keçmiş SSRİ-nin bütün respublikalarında qastrol səfərlərində olub. "O qızı tapın", "Dağlarda döyüş" və s. filmlərdə mahnılar ifa edib. V.Mustafayevin "Yapon və Yapon" filmində milis rəisi roluna çəkilib. "Humay" mükafatçısıdır...

... Ömrünün 40 ildən çoxunu sənətə həsr etmiş canlı korifey çətinliklərlə, haqsızlıqlarla çox üzləşsə də, heç vaxt həvəsdən düşmədiyini təkrarlayardı dönə-dönə. Səsini, nəfəsini, istedadını da Allah vergisi sayardı.

"Mən hələ 1952-ci ildə Asəf Zeynallı adına Musiqi Texnikumuna daxil olanda, Ağabacı Rzayevanın "Çoban Qara" mahnısını ifa etmişdim, Elə o mahnı ilə də məni qəbul etmişdilər. O zamanlar istedadlı insanlara qiymət verirdilər", -"Ekspress"ə son müsahibəsində xatırlayıb bunları.

Onu sənətin zirvəsinə aparan yolun banisi - böyük Üzeyir bəyin qoyduğu qayda-qanuna, ədəb-ərkana həmişə sadiq idi Oqtay Ağayev. Nə qədər ucalsa da, təvazökarlığından qalmırdı: "Mənim müəllimim Sofya İvanovna Xaffen idi. Mənim bu gün Oqtay Ağayev kimi tanınmağımda onun böyük rolu olub. Sonra əsgərliyə getdim. Əsgərlikdən qayıdandan sonra da yaxşı müəllimə rast gəldim. Həmin dövrlərdə müəllimim Firudin Mehdiyev idi. O da Bülbülün tələbəsi olmuşdu. Bir gün o, Bülbülü sinfə çağırdı. Dedi ki, "professor, bunlar mənim tələbələrimdir, görün, ifaları xoşunuza gələcəkmi?" Mənim ifam Bülbülün çox xoşuna gəldi. Dedi ki, "bu oğlanın yağla çörəyi var, ikranı özü qazanacaq".

Elə 1958-ci ildə məşhur "Qaya" kvartetinə, oradan da Rauf Hacıyevin Estrada Orkestrinə qəbul olunması da bu ənənələrə sadiq qalması ilə bağlıydı.

Son illər musiqimizin acınacaqlı vəziyyətə düşməsi sənətkarı çox narahat edirdi. Xüsusən də şikayəti şou-biznesdən idi: "Şou-biznesin öz qanunları var. Elə müğənnilər tanıyıram ki, milyoner olublar, amma öləndə bir qəpikləri də olmayıb. Şou-biznesə düşməyəsən, düşdün, evin yıxıldı. Cavansan, atlanıb-düşəcəksən, bəs on ildən sonra nə edəcəksən? 40-50 yaşında atlanıb-düşə bilməyəcəksən, axı. Gülərlər. Vaxtında pul qazanıb, yığıb qaçdın, qaçdin. Qaçmadın, evin yıxıldı".

Oqtay Ağayev pul yığmadı, heç buna cəhd də göstərmədi. Bəlkə də o bu qənaətə gələndə, artıq gec idi, ancaq gec olmasaydı belə, o, pul üçün oxuya bilməzdi...

... Bununla belə heç nədən şikayəti yox idi. Oqtay Ağayevin. "Şikayətim yoxdur. Mənə layiqincə qiymət verilir. Kommunistlərin dövründə adam yeri-nə də qoyulmurdum", - deyirdi...

Allah rəhmət eləsin!

Ekspress.- 2006.- 15 noyabr.- S. 13.