Xəlilov Y.

 

Kölndə “Zərifə–Art” İncəsənət Assosiasiyasının yubiley sərgisi

 

Almaniyanın Köln şəhərində fəaliyyət göstərən “Zərifə-ART” İncəsənət Assosiasiyası təsis olunmasının 10-cu ildönümünü qeyd edir.
Qurumun yaradıcısı hazırda Almaniyada yaşayıb-yaradan həmyerlimiz memar İldırım Sultanovdur. “Canlı və bəşəri incəsənət ölməz və sərhədsizdir” devizi altında fəaliyyət göstərən assosiasiyanın əsas məqsədi Azərbaycanın və digər ölkələrin sənət adamlarını müştərək yaradıcılıq əməkdaşlığında birləşdirməklə təşkilatlandırmaq, milli mədəniyyətimizi və incəsənətimizi Qərbdə təbliğ etməkdir. Assosiasiya ölkəmizə dair mədəni proqramların, sərgi, təqdimat və yubiley mərasimlərinin təşkilinə, tanınmış sənət adamlarının, musiqiçilərin, rəssamların işinə maddi və mənəvi dəstək verməyi də qarşısına məqsəd qoymuşdur.
Assosiasiyanın yubileyinə həsr olunmuş bədii sənətkarlıq nümunələrindən və rəsm əsərlərindən ibarət sərgidə Azərbaycan, Rusiya, İspaniya, Fransa, Almaniya və Əfqanıstandan “Zərifə-ART” ilə əməkdaşlıq edən 17 rəssamın, heykəltəraş-memarın, quruluşçu dizaynçının 10a0-dən artıq əsəri nümayiş etdirilir. Ölkəmizi sərgidə Almaniyada yaşayıb-yaradan tanınmış sənətkarlarımız — Azərbaycanın əməkdar rəssamı, YUNESKO-nun Rəssamlar Federasiyasının üzvü Əşrəf Heybətov, Azərbaycan və Gürcüstanın rəssamlar ittifaqlarının üzvü Sabir Çopurov, memar Ofeliya İmanova, Azərbaycan Rəssamlar İttifaqının üzvü Marqarita Kərimova-Sokolova və heykəltəraş Mübariz Əmiraslanov təmsil edirlər.
Assosiasiyanın rəhbəri İldırım Sultanov açılış mərasimində qonaqları səmimiyyətlə salamlayaraq, qurumun 10 illik fəaliyyəti haqqında ətraflı məlumat vermişdir. O əminliklə bildirmişdir ki, “Zərifə-ART” fəaliyyətini bundan sonra da uğurla davam etdirəcəkdir. Köln bələdiyyəsi mədəniyyət idarəsinin başçısı Yohannes Bunk təbrik nitqində assosiasiyanın fəaliyyətini və uğurlarını yüksək dəyərləndirərək qeyd etmişdir ki, xalqlar və mədəniyyətlər arasında körpü rolunu oynayan bu xeyirxah qurum Qafqaz xalqlarının, xüsusilə Azərbaycan xalqının mədəni irsinin fəal təbliğatçısı və təşviqatçısıdır. O vurğulamışdır ki, növbəti beynəlmiləl sərginin keçirilməsi xalqlar arasında, o cümlədən alman və Azərbaycan xalqları arasında dostluq münasibətlərinin inkişafına, Şərq-Qərb mədəniyyətlərinin qaynayıb-qarışmasına zəmin yaradan əlamətdar hadisədir.
Sonra assosiasiya adından Köln şəhər bələdiyyəsinə xatirə hədiyyəsi — “Qarabağ xanəndələri” kompakt disk dəsti, Qarabağ haqqında kitab və bukletlər təqdim olunmuşdur.
Sərgi noyabrın 26-dək davam edəcəkdir.

 Xalq qəzeti.- 2006.- 15 noyabr.- S. 4.