Ağayarov Ş.

İntellekt, idarəçilik qabiliyyəti və sadəlik

Əbülfəs Qarayevin 50 illiyi münasibətilə

- Qarayev Əbülfəs Mürsəl oğlu 13 noyabr 1956-cı ildə Bakıda anadan olmusdur.

- 1974-1978-ci illərdə Bakı Xarici Dillər İnstitutunda ali təhsil almış, bir müddət Saatlı rayon orta məktəbində müəllim kimi fəaliyyət göstərmişdir.

- 1978-1980-ci illərdə hərbi xidmətdə olan Ə.Qarayev hərbi xidmətdən sonra 1985-ci ilə qədər Azərbaycan Komsomolu Mərkəzi Komitəsinin bölmə müdiri isləmişdir.

- 1985-1989-cu illərdə Bakı şəhəri Nərimanov rayon Partiya Komitəsinin təlimatcısı şöbə müdiri vəzifələrində çalışmışdır.

- 1989-1992-ci illərdə Rusiya İctimai Elmlər Akademiyasının aspirantı olmuş və fəlsəfə elmləri namizədi dərəcəsini almışdır.

- 1992-1993-cü illərdə Bakı Politologiya İnstitutunun baş müəllimi, 1993-1994-cü illərdə isə "İmproteks" LTD şirkətində kommersiya direktoru işləmişdir.

- Ölkə başçısının 30 yanvar 2006-cı il tarixli Sərəncamı ilə Azərbaycan Respublikasının Mədəniyyət və Turizm naziri vəzifəsinə təyin olunmuşdur.

İslahat

Ölkə Prezidentinin bəzi nazirliklərin yenidən təşkili barədə verdiyi fərman (30 yanvar 2006-cı il) digər sahələrdə olduğu kimi, mədəniyyət sahəsinin də inkişafı üçün əhəmiyyətli addım idi. Bu islahatın ən əsas qayəsi, dünya təcrübəsində olduğu kimi, turizmin mədəniyyətlə birləşməsi idi. Məlumdur ki, Azərbaycan turistləri daha çox tarixi abidələri və yaşı eramızdan çox-çox əvvələ gedib çıxan qədim yaşayış məskənləri ilə cəlb edir. Tarixi abidələrin isə qorunma və bərpa işləri qənaətbəxş səviyyədə deyil. Bu mənada turizm və abidələrin mühafizəsi, qorunması və bərpası şöbələrinin bir nazirlikdə fəaliyyət göstərməsi turizmdən gələn vəsaitin tarixi abidələrə yönəlməsini labüdləşdirir. Bununla da mədəniyyətin hər iki sahəsi qarşılıqlı mübadilə şəraitində inkişaf edir. Digər tərəfdən əvvəllər turistlərin marağına səbəb olan obyektlərin başqa bir nazirliyin idarəçiliyində olması bu sahə ilə məşğul olan insanların işini çətinləşdirirdi. Necə deyərlər, qonağa göstərəcəyi obyektlərin hansı vəziyyətdə olması səndən asılı deyildi. Halbuki bu, turistlərin sayının ilbəil artması və daha çox gəlir gətirməsi ilə yanaşı, həm də Azərbaycanın təqdimatı, Azərbaycanın mədəni səviyyəsinin göstəricisidir. Odur ki, turizm və mədəniyyət sahələrini yaxşı bilən və bu sahələrin vəhdətdə inkişafına nail olmağı bacaran, eyni zamanda müasir dünya mədəniyyətinin və turizminin inkişaf istiqamətlərindən xəbərdar olan bir şəxsə ehtiyac var idi. Aradan o qədər böyük zaman keçməsə də, baş verən yeniliklər ölkə başçısının təyinatının dəqiq olduğunu sübuta yetirdi.

Yeni nazirlik

Bildiyiniz kimi, 2006-cı il Azərbaycanda Rusiya İlidir. Bu ictimai-siyasi və mədəni sahələrlə yanaşı, turizm sahəsində də bir çox yeniliklər üçün yaxşı fürsətdir. Demək olar ki, Mədəniyyət və Turizm Nazirliyi öz imkanları daxilində bu fürsətdən istifadə etməyi bacardı. Azərbaycanda Rusiya İli çərçivəsində keçirilən tədbirlər silsiləsi (Rus kinosu günləri, Şostakoviç festivalı, Azərbaycanın Samara Vilayətində mədəniyyət günləri, Azərbaycanda Çelyabinsk mədəniyyəti günləri, Birinci Benəlxalq Rus Kitabı Festivalı və s.) haqda ayrıca bir məqaləyə ehtiyac vardır. Ona görə də mətbuatdan vaxtaşırı izlədiyiniz bu tədbirlər barədə bəhs etmədən digər vacib məsələlərə keçirik.

Nazir kimi fəaliyyətinin 15-ci günü Əbülfəs Qarayev M.F.Axundov adına Milli Kitabxanada mədəniyyət işçilərini bir araya topladı və ilk böyük müşavirəsini keçirdi. Bu müşavirə bütün respublikanı əhatə edirdi və orada səslənən fikirlər mədəniyyətimizin gələcək inkişaf perspektivləri üçün olduqca önəmli idi.

Təxminən 3 saata yaxın davam edən bu tədbirdə nazir daha çox əyalətdə fəaliyyət göstərən mədəniyyət obyektlərinin işi ilə maraqlandı və mədəniyyətin bütün sahələri -kitabxanalar, musiqi məktəbləri, klub və kinoteatrlar, teatrlar, tarixi abidələr və s. barədə ətraflı məlumat aldı. Yeni islahatların ən başlıca amilləri kimi aşağıdakıları diqqətə çatdırdı: mədəni irsin qorunması, dünya arenasına çıxmaq imkanlarının genişlənməsi və turizmlə mədəniyyətin digər sahələri arasında sintezin yaradılması... Müşavirədə nazir mədəniyyət müəssisələrində infrastrukturun vəziyyəti və məxsusi olaraq qaçqın rayonların mədəni həyatındakı durumla maraqlandı və bu barədə rayon mədəniyyət şöbələrindən ətraflı məlumat aldı, problemlərin aradan qaldırılması üçün tapşırıqlar verdi.

Tanışlıq xarakterli bu müşavirə, əslində, mədəniyyət müəssisələrinin daha dinamik fəaliyyətinə start verdi.

Az sonra yaradıcı insanların qonorarının artması ilə bağlı Mədəniyyət və Turizm Nazirliyinin Nazirlər Kabineti qarşısında qaldırdığı məsələ öz müsbət həllini tapdı və NK bu barədə müvafiq qərar qəbul etdi.

Martın 8-də Azərbaycan Berlində təşkil edilən "Beynəlxalq turizm sərgisi - 2006" sərgisində iştirak etdi. Ümumdünya Turizm Təşkilatının keçirdiyi bu tədbirdə 183 ölkədən 10 min 856 turizm şirkəti iştirak edirdi. 3 gün sonra, martın 11-də Goranboyda böyük mədəniyyət kompleksinin açılışı oldu. Bundan sonrakı ən maraqlı tədbirlərdən biri (25 mart) Mədəniyyət və Turizm nazirinin mətbuat işçiləri ilə ilk görüşü idi. Görüşdə nazir yeni yaradılmış nazirliyin strukturu haqqında geniş məlumat verdi və media nümayəndələrinin suallarını cavablandırdı. Eyni zamanda, mətbuat işçiləri ilə vaxtaşırı görüşəcəyini və görülən işlər barədə açıqlamalar verəcəyini diqqətə çatdırdı.

Digər önəmli tədbirlər

Zuğulbadakı Gənclik və Turizm Mərkəzində "Gənclər nə istəyir" devizi altında üçgünlük konfrans (24-27 mart), Birləşmiş Ərəb Əmirliklərində Azərbaycanın turizm imkanları ilə bağlı keçirilən biznes-forum, Muzey Mərkəzində "Azərbaycanın qayaüstü incəsənəti" diskinin təqdimat mərasimi, Qala tarixi-etnoqrafiya qoruğunun vəziyyəti ilə tanışlıq (18 aprel), Mədəniyyət nazirinin yaradıcı təşkilatlarla görüşü (Yazıçılar Birliyi, Bəstəkarlar İttifaqı, Rəssamlar İttifaqı və s.), "Arşın mal alan" filminin yenidən işlənmiş versiyasının təqdimatı, Beynəlxalq Muzeylər Günü (18 may), Mədəniyyət və Turizm nazirinin növbəti mətbuat konfransı (8 iyun), "Yalan" filminin təqdimatı (7 iyun), "Cavid ömrü" və "Məhkumların cənnəti" filmlərinin istehsalata buraxılması, Şərqi Avropa Kinosu günləri (27 iyun, 1 iyul), YUNESKO-nun Dünya İrs Komitəsinin Vilnüs şəhərində keçirilən 30-cu sessiyasında iştirak (8-10 iyul), Milli Kino Günü və "Əlvida cənub şəhəri" filminin təqdimatı (2 avqust), Qazaxıstanın Aktau şəhərində "Xəzər - dostluq dənizi" Beynəlxalq Festivalında ölkəmizin təmsil olunması (24-26 avqust), 8-ci "Şərq-Qərb" Beynəlxalq Kino Festivalı, İslam Konfransı Təşkilatına üzv olan ölkələrin turizm nazirlərinin Bakıda keçirilən 5-ci konfransı (11-12 sentyabr), Mədəniyyət və Turizm Nazirliyi ilə yerli teleradio şirkətləri arasında birgə əməkdaşlığa dair bəyanatın imzalanması (21 sentyabr), Ölkədə yayımlanan əcnəbi filmlərin dövlət reyestrinə alınması ideyasının gerçəkləşməsi və bununla əlaqədar keçirilən mətbuat konfransı (6 oktyabr), MDB ölkələri Mədəni Əməkdaşlıq Şurasının Bakıda keçirilən 21-ci iclası (9 oktyabr), "Yaddan çıxmaz Qarabağ" Ümumrespublika İncəsənət Həftəsi (25-31oktyabr), 6-cı Audiovizual Festival (31 oktyabr - 4 noyabr), YUNESCO-nun 60 illiyi ilə bağlı tədbirlərdə iştirak etmək üçün nazirin Fransa səfəri, Göyçayda Nar Bayramı (3 noyabr), Bədii qiraət müsabiqəsinin elan olunması və s. və i a.

Şübhəsiz ki, bu siyahıya yeni tamaşalar, təqdimat mərasimləri, qastrollar, festivallar, müsabiqələr, konsertlər, yaradıcı təşkilatlar və prodüsser mərkəzləri ilə müştərək layihələr, xarici festivallarda ölkəmizin iştirakı və qazanılan diplomlar, mükafatlar, yaradıcı gənclərin həvəsləndirilməsi ilə bağlı atılan addımlar, yubiley və anım mərasimləri və digər tədbirləri də əlavə etmək olar. Ancaq yeni Nazirliyin iş dinamikasını təsəvvür etmək üçün qeyd olunanlar yetərlidir, məncə...

Nəhayət mətləb

Mədəniyyət və Turizm nazirinin əldə etdiyi uğurlar bu sahədə işləyən bütün insanların uğuru olduğu kimi mədəniyyətimizin müxtəlif sahələrində, ayrı-ayrı yaradıcı şəxslərin müvəffəqiyyəti də birbaşa mədəniyyətimizə rəhbərlik edən şəxsin adı ilə bağlıdır. Çünki ölkədə mədəniyyət sahəsinə rəhbərliyi həyata keçirən yalnız bir instansiya var. Bu böyük strukturun rəhbərliyini isə bir nəfər həyata keçirir. Bütün hallarda son qərar onundur. Bu, ölkə başçısının, ümumilikdə xalqımızın həmin şəxsə göstərdiyi etimaddır. Bütün şərəf və məsuliyyəti ilə bir yerdə... Bu şəxs öz intellekti, idarəçiük qabiliyyəti və sadəliyi ilə təkcə mədəniyyət sahəsində çalışanların deyil, onu tanıyan bütün insanların hörmətini qazanan Əbülfəs Qarayevdir.

Bu həftə, noyabrın 13-də Əbülfəs müəllimin 50 yaşı tamam oldu. 50 yaş bir sıra özəllikləri ilə yanaşı, həm də insanın arxaya dönüb gəldiyi yola daha diqqətlə baxdığı bir yaşdır. Odur ki, biz də hörmətli nazirimizin yeni təyin olunduğu vəzifədə gördüyü işlərin bir qismini təzədən gözdən keçirməli olduq.

Onun gənclər və idman naziri olduğu illərdə gördüyü işlər və qazandığı uğurlar, xüsusən gənc nəslin sağlam inkişafında etdiyi xidmətlər ən azı bir kitab materialı olduğundan yazımızda yer alması mümkün olmadı.

Hörmətli nazirimizi 50 illik yubileyi münasibəti ilə təbrik edir, ona mədəniyyətimizə rəhbərlik işində uğurlar diləyirik.

Yeni Azərbaycan.- 2006.- 15 noyabr.- S. 7.