İçərişəhərlə tanışlıq qonaqlarda xoş təəssürat yaratmışdır

AzərTAc xəbər verir ki, Qara Dəniz İqtisadi Əməkdaşlıq Təşkilatı Parlament Məclisinin iclasında iştirak etmək üçün ölkəmizdə səfərdə olan Bolqarıstan parlamentinin - Xalq Məclisinin sədri Georgi Pirinski və onu müşayiət edən şəxslər noyabrın 25-də İçərişəhərlə tanış olmuşlar.
Şirvanşahlar sarayından başlanan gəzintini qonaqlar Qız qalasında davam etdirmişlər. Şirvanşahlar sarayında Key-Qubad məscidi, Seyid Yəhya Bakuvi türbəsi ilə tanışlıqdan sonra Georgi Pirinski xatirə kitabına ürək sözlərini yazmışdır.
Qonaqlar "Azərxalça İstehsalat Birliyi"ndə xalça toxunması prosesini izləmış, Karvansarada olmuşlar. Onlara məlumat verilmişdir ki, Bakıda qədim abidələrin qorunub saxlanmasına, inkişafına dövlət tərəfindən hərtərəfli diqqət və qayğı göstərilir. Azərbaycan Prezidentinin Sərəncamı ilə "İçərişəhər" Dövlət Tarix-Memarlıq Qoruğu İdarəsi yaradılmışdır.
Nümayəndə heyətini Bolqarıstanın ölkəmizdəki səfiri İvan Palçev müşayiət etmişdir.

Azərbaycan.- 2006.- 26 noyabr.- S. 3.