Bakıda Sankt-Peterburq mədəniyyət günləri

Nikolay Burov: "Bakı şəhəri qastrol üçün ən cazibəli şəhər hesab olunur"

Noyabrın 28-dən dekabrın 1-nə kimi Bakıda keçiriləcək Sankt-Peterburq mədəniyyət günlərində iştirak etmək məqsədi ilə Sankt-Peterburq şəhər Mədəniyyət Komitəsinin sədri Nikolay Vitaleviç Burovun rəhbərlik etdiyi nümayəndə heyəti Bakıda səfərdədir. APA-nın məlumatına görə, dünən mədəniyyət və turizm naziri Əbülfəs Qarayev komitə sədri N.V.Burovla, "Lenfilm" kinostudiyasının rəhbəri O.V.Aqronenina, rejissor A.Pozdnyakov və Azərbaycanın Sankt-Pterbuqrdakı baş konsulu Qüdsi Osmanovla görüşüb. Görüşdə çıxış edən mədəniyyət və turizm naziri Ə.Qarayev iki ölkə arasında qarşılıqlı əlaqələrin genişlənməsini yüksək qiymətləndirib. Nazir bildirib ki, qarşılıqlı əlaqələrin inkişaf etdirilməsi üçün səfərlərin intensivləşməsi vacibdir. Nazir Azərbaycanda yerləşən muzeylərin, teatrların fəaliyyəti ilə bağlı qonaqları məlumatlandırıb. Sankt-Peterburq şəhərinin mədəniyyət üzrə komitəsinin sədri Nikolay Vitaleviç Burov Azərbaycanda olmaqdan qürur hissi keçirdiyini: "Azərbaycan tamaşaçıları hər zaman özünəməxsusluğu ilə seçilib. Bakı şəhəri qastrol üçün ən cazibəli şəhər hesab olunur". Görüş zamanı N.V.Burovla Əbülfəs Qarayev arasında 2007-2008- ci illər arasında qarşılıqlı əməkdaşlıq sahəsində protokol imzalanıb.

Xalq qəzeti.- 29 noyabr.- S. 2.