Azərbaycan Mədəniyyət və Turizm Nazirliyində görüş

Noyabrın 21-də Mədəniyyət və Turizm naziri Əbülfəs Qarayev Misir Mədəniyyət nazirinin birinci müavini Ənvər Məhəmməd İbrahimin başçılıq etdiyi nümayəndə heyətinin üzvləri ilə görüşmüşdür.
Ə.Qarayev qonaqları səmimi salamlayaraq bildirmişdir ki, Azərbaycanda Misir Ərəb Respublikasının (MƏR) mədəniyyəti günləri ölkəmizin mədəni həyatında mühüm hadisədir. Misir nümayəndə heyətinin səfər proqramına bu qədim ölkənin musiqisi, kinosu və təsviri sənəti ilə tanışlıq daxildir. Nazir demişdir: "Sevindirici haldır ki, Misirin mədəniyyət günləri təkcə Bakıda deyil, Şəkidə və Sumqayıtda da keçiriləcəkdir. Azərbaycanda Misir kinosunu sevir və yaxşı xatırlayırlar. Bizim tamaşaçı həm ötən əsrin 60-cı illərinin filmlərinə, həm də müasir filmlərə baxa biləcəklər".
Nazir qeyd etmişdir ki, tarixi irsin və kitabxanaların qorunub saxlanılması sahəsində Misirin təcrübəsi böyük maraq doğurur.
MƏR İncəsənət və Mədəniyyət Akademiyasının rektoru İsmət Əli Yəhya ölkəsinin mədəniyyət naziri Faruq Hüsninin salamlarını çatdıraraq vurğulamışdır ki, ötən il Misirdə keçirilən Azərbaycan mədəniyyəti günlərini indi də xatırlayırlar. O, əmin olduğunu bildirmişdir ki, Azərbaycanda da Misir mədəniyyəti günləri belə maraqla qarşılanacaqdır.
Görüşdə ölkələrimiz arasında mədəni əlaqələrin genişləndirilməsinin, o cümlədən Azərbaycanın Misir festivallarında iştirakının, tələbə mübadiləsinin, milli incəsənətimizin Misirdə təbliğinin vacibliyi vurğulanmışdır. Sonda tərəflər bir-birinə xatirə hədiyyələri bağışlamışlar.

Azərbaycan.- 2006.- 22 noyabr.- S. 3.