Azərbaycanda Misir mədəniyyəti günləri uğurla davam edir

Noyabrın 21-dən Bakıda start götürən Misir mədəniyyəti günləri uğurla davam edir. Mərasimin açılışında nitq söyləyən mədəniyyət və turizm naziri Əbülfəs Qarayev Azərbaycanla Misir Ərəb Respublikasının mədəni əlaqələrinin son vaxtlar daha da gücləndiyini qeyd etmişdir.
Xatırladaq ki, ötən il Misirdə Azərbaycan mədəniyyəti günləri uğurla keçmişdir. Respublikamızın mədəniyyət və incəsənət xadimləri bu ölkədə Azərbaycan mədəniyyətini layiqincə təmsil etmişlər. Həmin günlər ərəfəsində hər iki ölkənin mədəni əlaqələrinin daha da genişləndirilməsi üçün xüsusi bəyannamə imzalanmışdır.
Misir mədəniyyəti günləri çərçivəsində Müslüm Maqomayev adına Dövlət Filarmoniyasında konsert keçirildi. Misirli incəsənət ustalarının çıxışları tamaşaçılar tərəfindən maraqla qarşılandı. Bədii sərgi salonunda nümayiş etdirilən Misir rəssamlarının əsərləri də orijinallığı ilə diqqət çəkirdi. Burada 9 rəssamın rəngkarlıq janrında yaratdığı 20-dən artıq əsəri azərbaycanlı sənətsevərlərə təqdim olunub. Bu əsərlərdə rənglərin dili ilə Misirin tarixi, qədim mədəniyyəti, dünyanı heyrətdə qoyan möcüzəli ehramları, İsgəndəriyyə qülləsi təsvir olunub.
Misir mədəniyyəti günlərinin coğrafiyası da genişdir. Bu yaxınlarda Sumqayıt tamaşaçıları Misirdən gəlmiş incəsənət xadimlərinin konsert proqramını dinləyəcəklər.

Azərbaycan.- 2006.- 24 noyabr.- S. 8.