Mükərrəmoğlu M.
Azərbaycanın xarici
ölkələrlə mədəni əlaqələri
günü-gündən genişlənməkdədir. Ölkəmizdə
müxtəlif ölkələrin mədəniyyət günlərinin,
kino festivallarının keçirilməsi, tamaşaçılarımızın dünya xalqlarının
mədəniyyəti və incəsənəti ilə tanışlığı
bu cəhətdən çox əhəmiyyətlidir. Noyabrın
21-dən ölkəmizdə keçiriləcək Misir
mədəniyyəti günləri qədim və zəngin
tarixə malik Misir mədəniyyəti ilə yaxından tanış
olmaq imkanı yaradacaq.
Tədbirin açılışı Bədii Sərgi Salonundan başlayacaq. Misir
rəssamlarının əsərlərindən ibarət sərginin
açılışında Misirin mədəniyyət xadimləri, bu dövlətin
ölkəmizdəki səfirliyinin nümayəndələri,
Azərbaycan Respublikası Mədəniyyət Nazirliyinin
rəhbər işçiləri, Rəssamlar İttifaqının üzvləri iştirak
edəcəklər.
Bakı Xoreoqrafiya Məktəbində, Azərbaycan Dövlət Uşaq
Filarmoniyasında, eləcə də Azərbaycan Dövlət
Filarmoniyasında görüşlər və konsertlər keçiriləcək.
Sonrakı günlər Sumqayıt şəhərində, İsmayıllı və
Şəki rayonlarında Misir mədəniyyəti günlərinin
iştirakçıları konsert proqramları ilə çıxış edəcəklər.
Qonaqların Qobustan qoruğuna və Atəşgaha səfəri də
nəzərdə tutulmuşdur.
Misir mədəniyyəti günləri çərçivəsində
Bakının Nizami kinoteatrında “Misir kinosu həftəsi”də
keçiriləcək. Proqrama “Fatima”, “İskəndəriyyə...
nə üçün”, “Bülbülün duası”, “Vətəndaş detektiv oğru”, “Unudulmuş
şəxs”, “Yuxusuz gecələr" filmləri daxildir.
Misir mədəniyyət günlərində iştirak etmək üçün
ölkəmizə gələn nümayəndə heyətinə bu
ölkənin mədəniyyət nazirinin müavini Ənvər
Məhəmməd İbrahim və Misir İncəsənət
Akademiyasının rektoru Əsmətəli Yəhya rəhbərlik
edəcəklər.
Tədbirlər noyabrın 28-də başa çatacaq.
Xalq qəzeti.- 2006.- 21 noyabr.- S.
8.