Həmzəoğlu K.

"Mərkəzi Kitab Evi yaradılmalıdır"

Əkrəm Əylisli: "Məndə olan məlumata görə, bu məsələ yaxın zamanlarda gerçəkləşəcək"

"Oxucuların istədikləri kitabı əldə etmələri və müəlliflərin öz kitablarını sata bilmələri üçün Bakıda Mərkəzi Kitab Evinin yaradılması zərurətə çevrilib". Bu fikirləri jurnalistlərlə söhbətində Milli Məclisin mədəniyyət məsələləri daimi komissiyasının sədri Nizami Cəfərov bildirib. Onun sözlərinə görə, Azərbaycanda sözügedən məsələ ilə bağlı ənənə olub: "Yaxın keçmişdə paytaxtda kitab passajı və Kitab Evi vardı. Ziyalılarımız da kitab üçün ən çox həmin ünvanlara üz tuturdular. İndi isə onların heç biri qalmadığından bu sahədə böyük problemlər yaranıb. Ona görə də Bakıda Mərkəzi Kitab Evinin yaradılması üzərində düşünməyə dəyər. Hesab edirəm ki, bu, həm müəlliflərin, həm də oxucuların müvafiq problemlərinin həllinə kömək edərdi".

Komissiya sədri ideyanın gerçəkləşməsi üçün iki variant da irəli sürüb: "Mərkəzi Kitab Evi konkret olaraq müəyyən icra qurumlarının, yaxud nəşriyyatların nəzdində yaradıla bilər".

N.Cəfərov onu da bildirib ki, təmsil olunduğu daimi komissiya məsələnin gerçəkləşməsində maraqlıdır və parlamentin növbəti plenar iclasında bununla bağlı konkret təkliflə çıxış edəcək.

Komissiyanın digər üzvü, xalq şairi Vaqif Səmədoğlu məsələ ilə bağlı fərqli düşünür: "Şəhərin ən yaraşıqlı yerində 10 dənə mərkəzi kitab evi yaratsan belə, kitablar satılmayacaq. Azərbaycanda bədii ədəbiyyatı oxuyan daha çox tələbələr olub. İndi isə 15-20 çap vərəqli kitabın qiyməti az qala tələbənin təqaüdündən 2 dəfə çoxdur. Deməli, kitablar alınmayacaq. Mən konkret, praqmatik düşünərək bu fikirləri səsləndirirəm. Mərkəzi Kitab Evinin açılmasının əleyhinə deyiləm. Ancaq burada çox az kitab satılacaq. Yenə də təkrar edirəm ki, ölkədə əsas oxucu kütləsi gənclərdir. Onların da zövqü telekanallar tərəfindən demək olar ki, hər gün pozulur. Onlar televiziyaya baxmaq üçün pul vermirlər. Nəticədə də Azərbaycan gəncliyi ədəbiyyatdan uzaqlaşır. Tələbənin təqaüdünü heç olmasa bir kitab almaq gücünə çatdırmaq lazımdır. Sovet dövründə kitaba maraq böyük, kitabların qiyməti isə çox aşağı idi. Odur ki, mən qeyd edilən problemin Mərkəzi Kitab Evinin açılması ilə həllinə inanmıram".

Milət vəkili, uzun illər 'Yazıçı" nəşriyyatına rəhbərlik etmiş Əkrəm Əylisli isə bildirir ki, bu, çox ciddi problemdir: "1992-ci ildən bu yana kitab mağazaları bir-bir əldən gedir. Rəhbərlik etdiyim nəşriyyatın çap etdiyi kitabları satmağa yer tapmırdıq. Bu dolayısı ilə o demək idi ki, nəşriyyat, sən kitab buraxma. Halbuki azərbaycanlı kitab dükanından kitab almağa bir növ öyrəşib. Çalışmalıyıq ki, bu hissi ölməsin". Xalq yazıçısının dediyinə görə, bu məsələnin büdcənin müzakirəsi zamanı qabardılmasına ehtiyac yoxdur: "Bunu büdcəyə ayrıca bənd kimi sala bilməzlər. Amma büdcədən kitabxanalar üçün 15 milyon manatdan çox ' vəsait ayrılıb. Bunun hesabına Bakıda Mərkəzi Kitab Evi açmaq olar. Mədəniyyət və Turizm Nazirliyi, Prezident Aparatının müvafiq şöbəsi və digər əlaqədar qurumlar bununla bağlı ciddi iş görə bilərlər. Məndə olan məlumata görə, bu məsələ yaxın zamanlarda gerçəkləşəcək".

525-ci qəzet.- 2006.- 17 noyabr.- S.10.