Yurdoğlu E.

Şərurda bir muzey var

Hər bir bölgənin özünəməxsus xüsusiyyətlərini, yeraltı və yerüstü sərvətlərini, tarixini, ədəbiyyatını, mədəniyyətini öyrənmək üçün hamımız birinci növbədə o bölgənin tarix-diyarşünaslıq müzeyinə üz tuturuq. Çünki diyarşünaslıq müzeyində həmin ərazinin ensiklopedik yaddaş kitabı, tarixinin qorunub saxlandığı yeridir. Şərur Rayon Tarix Diyarşünaslıq Muzeyi də bu baxımdan öz zənginliyi ilə seçilən mədəniyyət müəssisələrimizdən biridir.

Muzey 1978-ci ildə ictimai əsaslarla fəaliyyətə başlayıb. Amma 1982-ci ildə ümummilli liderimiz Heydər Əliyevin təşəbbüsü ilə bütün rayonlarda bu cür mədəniyyət müəssisələri fəaliyyət göstərməyə başladı. Şərur muzeyi də elə o vaxtdan dövlət müəssisəsi kimi fəaliyyətini daha da genişləndirib.

Yarandığı vaxt burada 1500-ə yaxın eksponat olub. Bu gün isə muzeydə 7000-ə yaxın nadir tarixi yadigar nümayiş etdirilir.

Qoca Şərqin qapısı olan, adı tarixi qəhrəmanlıq dastanımız "Kitabi-Dədə Qorqud"da çəkilən Şərur barlı-bəhərli meyvə bağları geniş əkin sahələri, Gümüşlü filiz yatagı travertin daşları Qaratəpə mərməri ilə zəngin olmaqla bərabər, həm də Arpaçayın Xan Araza qovuşduğu bir məkandır. Məhz buna görədir ki, qədim insanlar da ilk yaşayış məskəni kimi buranı seçmişlər. Bunu Maxta kurqanlarında, Yaycı, Babəki, Vərməziyar kəndləri ərazisində, Atpaçay vadisində tapılan əmək və məişət əşyaları da sübut edir.

Sevindirici haldır ki, Şərura qonaq gələn insanların da ilk ziyarət yeri bu muzey olur. Buraya daxil olarkən ilk olaraq Qorqud Dədənin simvolik və müdriklik rəmzi olan heykəl-barelyefı ilə qarşılaşırsan. Elə həyətyanı sahəsinin yaşıllığı, dekorativ ağacları, xüsusən də Şərur diyarına xas olan Narbənd ağacını görəndə hiss edirsən ki, muzeyin həyəti də elə bu bölgənin florasını özündə əks etdirir.

Muzeydə 2 şöbə və 13 bölmə fəaliyyət göstərir. "Təbiətşünaslıq", "Arxeologiya", "Etnoqrafıya", "Numizmatika", "Şəhidlər", "Böyük Vətən müharibəsi", "Müstəqil Azərbaycanım", "Mədəniyyət", "Alimlər və şairlər" və digər bölmələrdə nümayiş etdirilən minlərlə eksponat muzeyə daxil olanları bölgə ilə yaxından tanış edir, onlarda rayonun tarixi barədə geniş təəssürat oyadır. Buna muzeyin xatirə dəftərini varaqladıqca bir daha əmin olursan. Belə ki, keçmiş sovet respublikalarından, eləcə də Türkiyədən, İrandan, Fransadan, İngiltərədən, Şimali Koreyadan və digər ölkələrdən ziyarətçilər muzeydə olmuş, buradakı eksponatların sayəsində Şərurun özünəməxsus tarıxı ılə tanış olmuşlar.

Muzeyi gəzdikcə belə bir suala da cavab axtarırdım: Təbiidir ki, bu gün də evlərdə mis, saxsı qablar, qiymətli əl işləri saxlamlır. Bəs, həmin eksponatların muzeyə təhvil verilməsi, cəlb olunması istiqamətində nə kimi işlər görülür? Muzeyin direktoru Mirhüseyn Seyidova həmin sualla müraciət edəndə o dedi ki, doğrudan da, bu gün evlərdə şəxsi kolleksiya həvəskarları tariximizi özündə yaşadan əşyalar saxlayırlar. Onların çoxu mütəmadi olaraq muzeyimizdə olur, vaxtaşırı bizimlə əlaqə saxlayır, əldə etdikləri tarixi əşyaları bizə təhvil verirlər. Əməkdaşlarımız da tez-tez yerlərdə olur, əhali ilə bu mövzuda söhbətlər aparırlar. Biz çalışırıq ki, eksponatlarımızın sayı daha da çox olsun.

Burada bir daha şahidi oldum ki, Şərur Tarix-Diyarşünaslıq Muzeyinin əməkdaşları canla-başla öz öhdələrinə düşən işi layiqincə yerinə yetirməyə çalışırlar. Muzeyin baş fond mühafızəçisi Zərifə Əliyeva, bələdçisi Nurlana Musayeva, kiçik elmi işçi Bəyimağa Sadiqova, elmi işçi Zəminə Babayeva və başqaları tez-tez təhsil ocaqlarında, ictimai yerlərdə olur, muzeyin eksponatlarının zənginləşməsində, tariximizin öyrənilməsində və təbliğ olunmasında əllərindən gələni əsirgəmirlər.

Yaddaş.- 2006.- 4 noyabr.- S. 4.