Azərbaycan sənətçiləri Almaniyanı fəth edir
Ölkəmizin
müstəqilliyinin 15-ci ildönümü münasibətilə Azərbaycanın
AFR-dəki səfirliyinin təşəbbüsü ilə Almaniyada keçirilən
Azərbaycan elm və mədəniyyəti ongünlüyü davam edir.
Xatırladaq ki, ongünlük oktyabrın 4-də Frankfurt şəhərindəki
Azərbaycan kitab sərgisi ilə başlanmışdı.
Oktyabrın 9-da Berlində "Azərbaycan evi"nin açılışı
olmuşdur. Mərasimdə mədəniyyət və turizm
nazirinin müavini Ədalət Vəliyevin rəhbərliyi ilə
incəsənət ustalarından ibarət geniş nümayəndə heyəti,
habelə Milli Məclisin deputatları Fəttah Heydərov, Elton Məmmədov
və Əkrəm Abdullayev iştirak edirdi. "Azərbaycan
evi"nə respublikamızın Mədəniyyət və Turizm
Nazirliyi adından milli geyimlər, musiqi alətləri və
kitablar hədiyyə olunmuşdur.
Ertəsi gün Berlin İncəsənət Qalereyasında Azərbaycanın
gənc rəssamlarının əsərlərindən ibarət sərgi
açılmışdır. Sərgidə paytaxt sakinlərinə 35 gənc rəssamın
tabloları, qrafika janrında 44 əsəri, habelə Qobustan qayaüstü rəsmlərinin
fotoşəkilləri təqdim olunmuşdu. Açılışda Almaniyanın sənət
adamları, burada yaşayan həmyerlilərimiz Əhməd Behkəlam,
İbrahim Əhrari və başqaları iştirak edirdilər. Mədəniyyət
və turizm nazirinin müavini Ədalət Vəliyev, Azərbaycanın
Almaniyadakı səfiri Pərviz Şahbazov, Almaniya-Azərbaycan Mədəniyyəti
Dostları Birliyinin sədri Steffen Ştormer sərginin açılışında çıxış
edərək xalqımızın mədəni və mənəvi zənginliyindən,
qədim incəsənətə malik olmasından danışmışlar.
Oktyabrın 11-də isə möhtəşəm Berlin Filarmoniyasında Azərbaycan
incəsənət ustaları geniş konsert proqramı ilə çıxış etmişlər.
Xalq artisti Teymur Göyçayevin rəhbərliyi ilə Qara Qarayev adına
Dövlət Kamera Orkestrinin, vokalçılar Dinarə Əliyeva, Həsən
Abdullayev və Fidan Hüseynovanın, tarzən Mircavad Cəfərovun
və kamançaçalan İsmayıl Həmidovun müşayiəti ilə Bəyimxanım
Mirzəyeva və Teyyub Aslanovun çıxışları, Dövlət Rəqs
Ansamblı üzvlərinin ifasında milli rəqslərimiz böyük maraqla
qarşılanmışdır. 1500 nəfərlik salonda böyük uğurla keçən
konsertdə Berlindəki diplomatik korpusun nümayəndələri,
tanınmış mədəniyyət xadimləri və rəsmi şəxslər
olmuşlar. Berlində ilk dəfə təşkil olunan belə konsert
son dərəcə hərarətlə qarşılanmış, sənətçilərimiz
"gül-çiçək yağışı"na tutulmuşdur.
Azərbaycan nümayəndə heyətinin rəhbəri Ədalət
Vəliyevin ongünlük çərçivəsində keçirdiyi görüşlər,
aparılan danışıqlar da səmərəli olmuşdur. "Azərbaycan
Avropanın gözü ilə" mövzusunda beynəlxalq simpoziumun təşkili,
2008-ci ildə Almaniyada Azərbaycan İlinin keçirilməsi barədə
razılıq əldə edilmişdir.
Oktyabrın 12-də Baden-Vürttemberq federal əyalətinin paytaxtı
Ştutqart şəhərindəki Yeni sarayın akt salonunda Azərbaycan
Dövlət Kamera Orkestrinin və digər sənət ustalarımızın
böyük konserti olmuşdur.
Konsertdən əvvəl Helmut Kol hökumətində dövlət
katibi vəzifəsini tutmuş, hazırda Almaniya-Azərbaycan Forumunun
sədri olan Otto Hauzer çıxış edərək salona toplaşanları salamlamış
və elm və mədəniyyət ongünlüyünü Azərbaycanın
Avropaya "mədəniyyət yürüşü" kimi səciyyələndirmişdir.
Azərbaycanın Almaniya Federativ Respublikasındakı səfiri Pərviz
Şahbazov dost ölkədə keçirilən ongünlük barədə məlumat
vermiş və silsilə konsertlərdən birinin Azərbaycanın
xüsusi tarixi əlaqələri olan Baden-Vürttemberq federal əyalətində
təşkilinin təsadüfi olmadığını bildirmişdir. Mədəniyyət
və turizm nazirinin müavini Ədalət Vəliyev ongünlük çərçivəsində
keçirilən tədbirlərin Azərbaycan mədəniyyətinin
Avropada tanıdılması işində əhəmiyyətini vurğulamışdır.
800 nəfərdən artıq insanın toplaşdığı salonda dinləyicilər
arasında federal əyalətin hökumət üzvləri, iqamətgahları
bu əyalətdə yerləşən "Mercedes-Benz",
"Baden-Vürttemberq-Enerji", "Porşe", "Boch" kimi
nəhəng Almaniya şirkətlərinin rəhbər işçiləri,
Azərbaycan və türk icmalarının nümayəndələri də
var idi.
Yüksək səviyyədə keçən konsertdən sonra
"Baden-Vürttemberq Enerji" şirkəti tərəfindən qəbul
təşkil olunmuşdur.
Oktyabrın 13-də Azərbaycan sənətçiləri Mayns şəhərində
çıxış etmişlər.
Azərbaycan.- 2006.- 14 oktyabr.- S. 6.