Şəhriyar Q.
Bu qala bizim qala ...
Ermənistan tərəfindən işğal
olunmuş ərazilərimizdə minlərlə tarixi abidəmiz
qaldı. Məlumatlara görə, düşmənlər həmin
abidələri ya yerlə yeksan ediblər, ya da üzərlərinə
xaç çəkərək erməniləşdirməyə cəhd
göstəriblər.
Amma bütün bunlar faydasızdır.
Başqasının tarixi üstündə özünə tarix yazmaq yazıqlıq, cılızlıqdır
və belə "tarix" qar üstündə yazılmış yazı kimidir; günəş
doğan kimi ondan əsər-əlamət qalmayacaq. Biz də o
Günəşin doğmasını gözləmək ümidiylə Cəbrayıla qiyabi bir
səyahətə çıxaq...
.. .Cəbrayılın adı ilə bağlı çoxlu
mübahisələr var. Onlardan biri Cəbrayıl ata adlı bir şəxsin
övladları Mirzəcan, Yarəhməd və Şahvələdlə
(hazırda bunlar Cəbrayıl rayonunun kəndləridir) birlikdə
rayonun yerləşdiyi indiki ərazidə məskən salmasıyla
bağlıdır. Rayon mərkəzindən o qədər də uzaq
olmayan ərazidə isə Cəbrayıl atanın qəbri işğala
qədər ziyarətgah hesab olunurdu. XIX əsrdə
milliyyətcə erməni olan N.Kokçayev və M.Barxudaryan kimi
tədqiqatçılar məqbərəni görüb və bu abidənin sırf
müsəlmanlara aid olduğunu etiraf ediblər. Lakin çox-çox sonralar bu
abidə üzərində də xaç şəkilləri peyda oldu...
Ərazidəki ən böyük memarlıq
abidəsi Xudafərin körpüləridir. Araz çayı üzərində
ucalan bu iki möhtəşəm mədəniyyət abidəsinin biri
on bir, digəri isə on beş aşır;mlıdır. Körpülər iri sal daşların
üzərində inşa edilib. Körpülərin dəqiq nə vaxt
tikilməsi haqda yekdil fikir yoxdur.
Digər bir mədəniyyət
abidəsi də Diridağda yerləşən "Qız qalası"dır. Bu
qalanı tədqiqatçılar XII-XIV əsrlərə aid edirlər.
Qaladan müşahidə və müdafiə məntəqəsi kimi
istifadə olunduğu bildirilir.
Sirik kəndində yerləşən Tey
dağının zirvəsində V-VI əsrlərə aid olduğu güman
edilən Qala bürcü var. Bu qala çaxmaq ovuntusunun əhənglə
qanşıq məhlulundan istifadə edilərək daşla tikilib. Qaladan
müşahidə və düşmən hücumlarından uzun müddət müdafiə
olunmaq üçün istifadə olunub.
Şıxlar və Xubyarlı
kəndlərindəki Sülap ibn Biyasəddin (XlVəsr) və
Əbdül Əli (1287-ci il) türbələri Azərbaycan
memarlığında səkkizguşəli və dairəvi türbələrin
ən gözəl nümunələridir. Cəbrayıl
ərazisindəki Sultan Məcid hamamı da orta əsr
Azərbaycan memarlığının əvəzolunmaz abidələrindən
biridir.
Cəbrayılda islamiyyətdən
öncə və islamın ilk illərinə aid abidələr də
mövcuddur. Rayon ərazisində yerləşən Mazannənə
abidəsi buna misal ola bilər. Professor Z.İ.Yanpolski abidənin
xristianlara aid olması haqqındakı əfsanəni rədd edir və
göstərir ki, bu abidənin tarixi madərşahlıq zamanına gedib çıxır
və sonralar islam dininə uyğunlaşdırlaraq ocaq hesab edilib. Yerli
əhali Hasanlı kəndi yaxınlığındakı Mərmərnənə
abidəsində dəfn olunan qadını Mazannənənin anası hesab
edir.
Cəbrayıl yaxınlığında "Ağ oğlan"
deyilən pir də var. Professor I.Petruşşevski piri
xaçpərəstlik deyil, məhz bütpərəstlik dövründən
qalma abidə hesab edir. Üzdəniraq M.Barxudaryan əsassız olaraq
abidənin ermənilərə məxsus olduğunu iddia edirdi. Barxudaryanın
iddialarının əksinə olaraq təkcə onu demək
kifayətdir ki, "Ağ oğlan"la bağlı bir cox türk xalqlar;nda
onlarla əfsanə və rəvayət bu gün də yaşamaqdadır.
Digər tərəfdən, pirin adına diqqət yetirmək
gərəkdir. Onun türklərə məxsus olduğunu danmaq, erməniləşdirmək
cəhdi baş tutan deyil.
Cəbrayılın cənubunda
yerləşən digər pir isə Qurbantəpə adlanır. Bu pir
Qafqaz Albaniyası əhalisinin Günəşə, Aya sitayiş etdikləri
tunc dövrünün nişanəsidir. Yerli əhali təzə il
məhsuldar olsun deyə, bu təpədə qurban kəsib,
bişirilən xörəyin suyundan gündoğan tərəfə səpib,
sonra xörəyi yeyib və günəşə sitayiş ediblər...
Cəbrayıldan təqribən 25 km
şimalda Ziyarat dağı yerləşir. Professor Z.İ.Yanpolski həmin
qəbir-abidəni xaçpərəstlikdən qabaqkı
dövrlərə aid edir. Maraqlısı budur ki, ermənilər də bu
pirin yerləşdiyi yerə Ziyarat dağı deyirlər və oradakı piri
də müsəlman ziyarətgahı hesab edirlər.
Digər abidə M.Barxudaryanın
(Məqalədə M.Barxudaryana istinadən verilən
məlumatlar onun "Arsax" (ruscaya tərcümə, AMEA-nın
Tarix İnstitutunun elmi arxivi, inv. 1662, 2010) adlı əsərindən
götürülüb) erməni abidəsi hesab etdiyi Dağtumas kəndi yaxınlığındakı
Tumas ata abidəsidir. Lakin onu da qeyd edək ki, bu da
bütpərəstlik dövrünün yadigarıdır. Çələbilər
kəndinin, oradakı məscidin və Hacı Qaraman məzarının
ermənilərə məxsusluğu da cəfəngiyyatdan başqa bir
şey deyil.
Haqqında qısaca məlumat verdiyimiz
abidələrdən başqa, Cəbrayılda yaşı minilliklərin o
tayına gedib çıxan xeyli maddi mədəniyyət
nümunələrimiz qalıb. Onların tarixi barədə Azərbaycanın
adlı-sanlı alimləri kifayət qədər məlumatlar
veriblər. Lakin onların bugünkü taleyindən qətiyyən nikbinliklə
danışmaq olmaz. insanlarımız öz ata-baba yurdundan ermənilər və
onların havadarları tərəfindən zorla çıxarıldılar,
abidələrimiz isə əsirlikdə - erməni vandalizmi ilə
üz-üzə qaldı. Lakin tarix tarixdir, onu saxtalaşdırmaq mümkün olmadığı
kimi, unutdurmaq da müşkül işdir. Biz o torpaqların və onun üstündəki
abidələrin şəriksiz sahibləriyik. Biz o torpaqlara, o
abidələrin yanına qayıdacağıq. Bu bizim haqqımızdır...
Xəzər.- 2006.- 21 oktyabr.- S. 15.