İKT-nın turizm nazirləri Bakıda loplaşıb

Konfransda 38 islam ölkəsi təmsil olunub

Bakıda İslam Konfransı Təşkilatı turizm nazirlərinin V konfransı öz işinə başlayıb. APA-nın məlumatına görə, konfransda 38 islam ölkəsi təmsil olunub. Konfransın açılış mərasimində çıxış edən Azərbaycanın Mədəniyyət və Turizm naziri Əbülfəs Qarayev bildirib ki, konfrans islam ölkələri arasında turizm mübadiləsini və dostluq əlaqələrinin inkişafına xidmət edəcək. Onun sözlərinə görə, tədbirdə olduqca vacib məsələlər müzakirə olunacaq:

"Biz bir sıra layihələr, o cümlədən, islam ölkələrində turizm marketinqinə dair layihə ətrafında müzakirə aparacağıq". Ə. Qarayev tədbirdə turizm baxımdan zəngin proqramın həyata keçiriləcəyini deyib: "İştirakçılar Azərbaycanın görkəmli yerlərinə səyahət edəcək və turist şirkətlərinin nümayəndələri ilə görüşəcəklər. Eyni zamanda Azərbaycan mətbəxi ilə tanışlıq nəzərdə tutulub". Qeyd edək ki, sentyabrın 11-də konfransın işinə Azərbaycan prezidenti İlham Əliyev, İKT baş katibi Ekmələddin İhsanoğlu və Ümumdünya Turizm Təşkilatının baş katibi Françesco Frangialli də qatılacaq. Konfrans işini sentyabrın 12-də başa vuracaq.

Konfransda Bakı bəyannaməsi qəbul olunacaq. APA-nın məlumatına görə, bu barədə jurnalistlərə açıqlamasında Mədəniyyət və Turizm naziri Əbülfəs Qarayev məlumat verib. Nazir bildirib ki, konfrans zamanı Bakı bəyannaməsinin müzakirəsi nəzərdə tutulub. Ə. Qarayev Bakı bəyannaməsinə Azərbaycan torpaqlarının işğal olunması ilə bağlı bəndlərin də salınacağını istisna etməyib. "Artıq bu sənəd layihə kimi təqdim olunub. İnanıram ki, müzakirələr müsbət ruhda keçiriləcək".

Ə.Qarayevin sözlərinə görə, islam ölkələri Azərbaycanın turizm sahəsinə böyük maraq göstərir: "Əgər belə olmasaydı, çoxlu sayda ölkələrin Azərbaycana gəlməsinin şahidi olmazdıq". Nazir deyib ki, Azərbaycan həm ərəb, həm də digər islam ölkələri ilə turizm sahəsində geniş əlaqə yaratmaq niyyətindədir: "Artıq bu məqsədlə bir neçə qarşılıqlı səfərlər təşkil olunub, bu gün Azərbaycan dünyanın turizm xəritəsində kiçik də olsa özünəməxsus bir yer tutur".

Azadlıq. -2006.- 10-11 sentyabr.- S. 13.