Azərbaycan Prezidenti İlham Əliyev Abşeron rayonunda olmuşdur

Heydər parkının və ümummilli liderin abidəsinin təntənəli açılışı

Sentyabrın 12-də Azərbaycan Prezidenti İlham Əliyev Abşeron rayonunda olmuşdur.
Dövlətimizin başçısı əvvəlcə Xırdalan qəsəbəsində Heydər parkının və xalqımızın ümummilli liderinin abidəsinin açılış mərasimində iştirak etmişdir.
Mərasimə toplaşmış minlərlə insan Prezident İlham Əliyevi böyük hörmət və ehtiramla, alqışlarla qarşıladı. Sakinlərin əllərində ulu öndər Heydər Əliyevin və Prezident İlham Əliyevin portretləri, Azərbaycanın dövlət bayraqları, ümummilli liderin müdrik kəlamları yazılmış transparantlar, Prezidenti salamlayan şüarlar var idi. Dövlətimizin başçısı ulu öndər Heydər Əliyevin parkda ucaldılmış abidəsinin üzərindən ağ örtüyü götürdü. Bütöv qranitdən hazırlanmış bu abidənin hündürlüyü 4,2 metr, postamentlə birlikdə isə 6 metrdir. Abidənin müəllifi heykəltəraş Səlhab Məmmədovdur.
Prezident İlham Əliyev abidənin önünə gül dəstəsi qoydu.
Məlumat verildi ki, 9,6 hektar ərazini əhatə edən, Xırdalan sakinlərinin ulu öndərin xatirəsinə sonsuz hörmət və ehtiramının bariz nümunəsi olan bu parkda istirahət üçün hər cür şərait yaradılmışdır. Parkda Heydər Əliyev muzeyi və Tarix-diyarşünaslıq muzeyi fəaliyyət göstərir. Yaşıllıqları, gül-çiçəyi, yaraşıqlı fəvvarələri ilə göz oxşayan parkda yay estradası da vardır. Burada müxtəlif iaşə xidməti müəssisələri də fəaliyyət göstərir.
Azərbaycan Prezidenti parkı seyr etdi, burada görülən işlərdən razılığını bildirdi.

Xalq qəzeti.-2006.-13 sentyabr.- S. 2.