Hacızadə İ.

Rasim Balayev:

"Kinoda yaşamağımı Nəsimi təsdiqladi"

1975-ci ildən sonra "Azərbaycanfilm" kinostudiyası özünün məhsuldar dövrünü yaşamağa başladı. Bir çox istedadlı gənc aktyorların gəlişi studiyada canlanmaya səbəb oldu. Həsən Məmmədov, Şahmar Ələkbərov, Səməndər Rzayev, Rasim Balayev və başqaları qısa zaman kəsiyində özlərini kino sahəsində təsdiqlədilər. Kinorejissorlar, kinostudiyanın rəhbərliyi gənclərə lazımi qayğı göstərir, yaradıcılıqlarına qiymət verir, onlara etibar edirdilər.

Bu cəhətdən Rasim Balayevin bəxti daha çox gətirdi. Belə ki, gənc aktyor "Nəsimi" filmində eyniadlı rola təsdiq olunanda, buna inanmamışdı. Amma istedadlı kinorejissor, xalq artisti Həsən Seyidbəyli sınaqdan keçirilən yüzlərlə aklyor içində gənc Rasimi kəşf etdi və onun üzərində dayandı. Aktyor da rejissorun etimadını doğrultdu. Bunun üçün o, necə deyərlər, dəridən-qabıqdan çıxdı, gecə-gündüz Nəsimi ilə yaşadı, onun tərcümeyi-halı, yaradıcılıq yolu, yaşadığı mühiti, əqidəsi barədə ətraflı məlumat topladı. Beləliklə, çəkiliş meydançasına çıxdı:

"Doğrusu, Nəsimi roluna çəkiləcəyimə heç cür inana bilmirdim. Sınaq çəkilişlərinə çəkilən aktyorların sayı bilinmirdi. Hətta məşhur rus aktyoru "Hamlet" rolunun ifaçısı İnnokenti Smoktunovskini də dəvət etmək istəyirdilər. Amma göründüyü kimi Həsən müəllim həmin rola məni təsdiqlədi. Tezliklə çəkilişlər başlandı. Bu monimental əsərin çəkilişləri Azərbaycanın müxtəlif yerlərində, o cümlədən Naxçıvanda lentə alınırdı. Özü də isti yay aylarında. Əsas kütləvi səhnələr məhz Naxçıvanda aparılırdı. Amma Muxtar Respublikasının əhalisi biz aktyorlara dayaq durur, bizə qayğı göstərirdi. Məni tanımasalar da, biləndə ki, Nəsimi roluna mən çəkilirəm, kimi su, kimi ayran, kimi də soyuq qarpıza məni qonaq edirdi. Bu, əlbəttə, böyük Nəsimiyə olan xalq məhəbbətinin təzahürü idi. Bütün çəkiliş boyu biz bu qayğını naxçıvanlılardan gördük. Film böyük çətinliklər bahasına başa gəldi. Kinoəsərdə bir yer var. Şeyx Əzəmin qızı Nəsimiyə deyir ki, məni vəsf et, şair! 2-3 dəqiqəlik bu epizod 5-6 günə çəkilib. Nəsimini Azərbaycan kinosunun ən uğurlu əsərlərindən biri hesab edirəm".

"Deyəsən "Nəsiminin" ayağı sizin üçün uğurlu oldu, sonra sizin kinoda karyeranız başladı" fikrimizi xalq artisti Rasim Balayev belə cavablandırdı:

"Bəli, mərhum Həsən Seyidbəylinin "Nəsimi" filmi yaradıcılığına təkan verdi, mənim kinoda yaşamağımı təsdiqlədi. Ruhu şad olsun Həsən müəllimin! Ondan sonra bir-birinın ardınca müxtəlif xarakter və məzmunlu filmlərə dəvət aldım. Ümümiyyətlə, o illər kinostudiyamız bir növ çiçəklənmə dövrünü yaşayırdı. Bütövlükdə götürsək, mən 25 il ərzində hər il ən azı 3 filmə çəkilirdim. Böyük həvəslə, məsuliyyətlə çəkiliş meydançasına çıxır, kamera qarşısında dayanırdıq. Bu gün o illəri xatırlayıb nastolji hisslər yaşayırıq. Yeni ekran əsərlərinə çəkilmək, müxləlif obrazlar yaratmaq istəyirəm. Arzum budur ki, imkan daxilində daha çox filmə çəkilim, gələcək nəslə yadigar qalsın. "Nəsimi", "Babək" kimi filmlər. Amma nikbin adamam. Əminəm ki, kinomuzda yaranmış bu durğunluq vəziyyəti uzun sürməz. Dövlətimiz kino sahəsini dirçəltmək üçün lazımi vəsaiti ayıracaq və'"Azərbaycanfilm"də əvvəlki qaynarlıq bərpa olunacaq".

Vətəndaş həmrəyliyi.- 2006.- 20-24 sentyabr.- S. 16.