“Milli Bomba” haradadır?

Valeri Ruzinlə Vaqif Mustafayevin dörd il əvvəl

çəkdikləri filmdən aclıq və səfalət səhnələrini

çıxarmaq üçün Moskvada iş aparıldığı bildirilir

Azərbaycan kino sənayesinin son illər acınacaqlı durumda olduğu bəllidir. Belə ki, bir neçə film təhvil verilsə də, bunlar əslində geniş miqyası əhatə etməyib. Bu da bir çox hallarda filmlərin çəkilməsinə ayrılan pulların az olması və nəticədə aşağı keyfiyyətli ekran əsərinin ortaya çıxması ilə əlaqədardır. Bunlar öz yerində və dəfələrlə mətbuatda bu mövzuya toxunulub.

Bu günlərdə isə redaksiyamıza məlumat daxil oldu ki, dörd il öncə keçmiş Mədəniyyət Nazirliyinin sifarişi ilə çəkilən "Milli Bomba" adlı ekran əsəri hələ də təhvil verilməyib. Səbəb açıqlanmır. Vaqif Mustafayevin rejissorluğu və Valeri Ruzinin prodüsserliyi ilə çəkilmiş film nədənsə tamaşaçılara təqdim edilmir. Və bu ətrafda maraqlı məlumatlar verilir.

Bəzi dairələrdən isə “Milli Bomba”da Azərbaycanın mövcud reallığından bəhs edən məqamların olduğu vurğulanır. Yəni, əsərin baş və "xilasedici" qəhrəmanı bu günkü hakimiyyət olsa da, filmdə aclıq və səfalət içərisində çırpınan Azərbaycan vətəndaşlarının acınacaqlı həyat tərzi yer alıb. Məlumata görə, ölkədəki köçdən, işsizlikdən də geniş bəhs edilib. Rejissor və prodüsser bununla reallığı olduğu kimi təqdim etmək istəyiblər. Lakin ilkin baxış zamanı bu, böyük qalmaqala səbəb olub. Bəzi şəxslər isə bu addımı atmaqda həm Vaqif Mustafayevi, həm də dıgər şəxslərin hakimiyyət dəyişikliyi baş versə, özlərini qəhrəman kimi qələmə vermək istəyində bulunmaqda suçlayıblar. Nəticədə də rejissorla prodüsser filmi təhvil verməyib. Bəzi məlumatlara görə, daim Mustafayevlə toqquşan sabiq nazir Polad Bülbüloğlu da bu məqamdan istifadə edərək onu zərərsizləşdirmək istəyib. Amma filmin sifarişçiyə təhvil verilməməsi bu kompramat yükünün tam açılmasına imkan yaratmayıb. Bülbüloğlu səfır göndəriləndən sonra isə Mədəniyyət və Turizm Nazirliyi filmi tələb ediblər. Çünki ekran əsərinin sifarişçisi məhz bu qurumdur. Rejissoıla danışıqlardan sonra qərara alınıb ki, filmdən aclıq və səfalət səhnələri çıxardılıb, onun yerinə yeni iş yerlərinin açılması barədə çəkilişlər daxil edilsin. Və hazırda da Moskvada "Milli Bomba"ın aclıq və səfalətdən "təmizləməklə" məşğuldurlar.

Dünən biz bu deyilənlərlə bağlı Mədəniyyət və Turizm Nazirliyinin aidiyyatı məsələlər üzrə səlahiyyətlisi Cəmil Fərəcovla əlaqə saxladıq. Cəmil müəllim filmin bir neçə il öncə sifariş verildiyini təsdiqlədi. Bildirdi ki, artıq nazirlik sifarişçi kimi filmi qəbul etməyə hazırlaşır. Sadəcə, prodüsser Valeri Ruzin dəyişiklik aparmaq üçün müəyyən müddət vaxt istəyib. Fərəcov bu dəyişikliyin nədən ibarət olduğu barədə ancaq filmin müəlliflərinin xəbəri olduğunu vurğuladı. Vaqif Mustafayevlə gün ərzində əlaqə saxlamaq istəsək də mümkün olmadı. Bütün hallarda isə aydın olur ki, "Milli Bomba"dakı aclıq və səfalət səhnələri çıxarılır. Əgər, belə olmasaydı, hazır filmin üzərində yenidən iş aparmağa nə ehtiyac var idi ki? Bir də görünür, Ramiz Mehdiyevin təbirincə desək, filmin müəllifləri mövcud reallıqla barışıb ekran əsərində dəyişiklik aparırlar. Nə olar, hər halda gətirərlər baxıb görərik ki, "Milli Bomba" harada və necə partlayacaq? Və ya görəsən, rejissorla prodüsserə filmdəki "qəlpələri" təmizləmək üçün nə qədər vaxt lazımdır?

Azadlıq. -2006.- 9 sentyabr.- S. 13.