Salmanov R.

Brilyant Dadaşova bənzərsiz ifası ilə kanadalıların da sevgisini qazandı

İl yarımdır ki, səhnəmizin parlaq ulduzu, könül oxşayan nəğmələriylə xalqın dərin rəğbətin qazanmış sevimli müğənnimiz, respublikanın əməkdar artisti Brilyant Dadaşova nə ekran-efirdə, əyləncə şou proqramlarında, nə də illərdən bəri SPACE TV-də yayımlanan, hər həftə tamaşaçıların səbirsizliklə gözlədiyi “Dünyanı gözəllik xilas edəcək” müəllif proqramında görünür. Böyük populyarlıq qazanmış sənətçinin birdən-birə gözdən uzaq düşməyinin, ola bilsin ki, müəyyən qədər obyektiv səbəbləri olub. Lakin bir danılmaz fakt da var ki, Brilyant xanım səhnədən uzaqlaşsa da, dinləyicilərin ürəyindən bir an belə uzaqlaşmamışdı. Bəzi mətbuat orqanlarının şayiə, böhtan xarakterli yanlış informasiyalar yayması Brilyant xanımı bir az narazı salsa da, yaradıcılığına mənfi təsir göstərə bilməmişdir.
Ekran və efirdə az-az göründükcə müxtəlif mədəni tədbirlərə daha çox dəvət olunan Brilyant Dadaşova bu qısa müddətdə ABŞ, Fransa, İngiltərə, Almaniya, Türkiyə, eləcə də dünyanın bir çox digər ölkələrində Azərbaycan musiqisini layiqincə təmsil edib, yeni layihələr həyata keçirib, Türkiyədə böyük tirajla disk və audio kasetlərinin buraxılmasına nail olub. Gördüyü işlərdən, gələcək planlarından təvazökarlıq edib söz açmağı xoşlamayan Brilyant xanım üzə vurmasa da, qəlbində hələ də nəyinsə xiffətin çəkdiyini, nigarançılığını da gizlədə bilmədi. Qəlbi incəsənətlə döyünən insanlar adətən kövrək olurlar. Ən adi bir söz, sənətə qarşı ögey münasibət onların qəlbinə dəyir. Bu da təbiidir. Xalq tərəfindən sevinlən hər bir mahnı uzun yaradıcılıq axtarışının nəticəsi, bəlkə də həyatın ən şirin anları kimi qəbul edilməlidir. Və bir gün bu sevincə kimsə yersiz bir sözlə kölgə salmağa çalışırsa, deməli, bütün görülən işlər heçə dönür. Sənətçi sarsılır, pərəstişkarlarından, əlaqədar təşkilatlardan mənəvi dəstək gözləyir...
Son illər Brilyant xanımın qardaş Türkiyə səfərlərinin, orada həyata keçirdiyi bütün layihələrin uğur təməlini məhz Mehriban xanım Əliyevanın qayğısı qoyub. Belə doğma, qayğıkeş münasibət, hər şeydən öncə, Azərbaycanın birinci xanımı Mehriban Əliyevanın milli musiqi mədəniyyətimizə, eləcə də Brilyant xanımın sənətinə rəğbətinin bariz nümunəsi idi. Təəssüf ki, bir az sonra bədnam qonşularımız sənətçinin bənzərsiz ifası olan “Vokaliz” kompozisiyanı da öz adlarına çıxarılmasına cəhd etdilər, disklər yazıldı, kompozisiyanı qeyri-peşəkar səviyyədə erməni musiqisi kimi xalqa çatdırmağa çalışdılar. Brilyant xanımın döymədiyi qapı, imdad diləmədiyi idarə, təşkilat qalmadı, lakin bu məsələnin hüquqi tərəfi, təəssüf ki, bu günəcən də öz həllini tapıb, yoluna qoyulmayıb. “Vokaliz” Ermənistanda bu gün də erməni musiqisi kimi təqdim olunur. Lakin yalan ayaq tutsa da, yeriyə bilməz.
Bu gün Azərbaycan bədnam qonşularla müharibə şəraitində olduğundan hələlik bu iş öz hüquqi həllini tapmayıb. İnanırıq ki, bu məsələ də tezliklə öz yerini tapacaq.
Nə yaxşı ki, bu incikliklər də yaz yağışı tək tezliklə ötüb keçdi. Bu yaxınlarda Brilyant xanım Kanadaya qastrol səfərindən qayıdıb. Kanada – Azərbaycan Alyansının dəvətilə ölkənin Toronto şəhərin ən mötəbər “Medison” konsert salonunda solo konsert proqramı ilə çıxış edib. Dünyanın ən parlaq sənət ulduzlarının konsert verdiyi bu mötəbər salonda ilk dəfə çıxış edən azəri müğənnisini alqışlayan tək soydaşlarımız deyil, rumınlar, bolqarlar, ingilislər, şotlandlar, alman və fransızlar, bir sözlə, dünya xalqlarının Kanadada yaşayan nümayəndələri oldu. ABŞ-da yaşayan görkəmli pianoçumuz, Azərbaycanın xalq artisti Çingiz Sadıqovun müşayiəti, Nərgiz Cəlilovanın aparıcılığı ilə keçən konsertdə Brilyant Dadaşova əsasən Tofiq Quliyevin və Rauf Hacıyevin mahnılarını ifa edib. Hər bir musiqi nömrəsini tamaşaçılar sürəkli alqışlarla qarşılayıblar. Bu alqışlar təkcə Brilyant xanımın sənətinə deyil, həm də milli musiqimizə, mədəniyyətimizə verilən ən yüksək qiymət idi. Kanadanın bir çox mötəbər qəzet və jurnalları bu konsertə çox böyük önəm verib, Azərbaycan sənətçilərinin uğurunu öz səhifələrində geniş işıqlandırmışlar.
“Biz həmişə çalışırıq ki, qeyri-peşəkarları yox, yalnız musiqimizi yüksək səviyyədə təmsil edən sənətkarları Kanadaya dəvət edək”, – deyə qəzetlərin birinə müsahibə verən Kanada – Azərbaycan Alyansının prezidenti Rüfət Əmirəliyev rəhbərlik etdiyi qurumun mədəniyyətin təbliği məsələsinə çox ciddi yanaşdığını, eləcə də xalqımızın əlamətdar günləri barədə Kanada ictimaiyyətinə daim məlumatlar verdiyini bildirib. Çox şadıq ki, təkcə yüksək səhnə mədəniyyətilə deyil, eləcə də gözəl repertuarı və ifa tərzi ilə könülləri fəth edən Brilyant Dadaşova həmin gün Azərbaycan musiqisini kanadalılara sevdirə bildi. Ən önəmlisi isə, konsertdən əldə olunan gəliri xeyriyyə məqsədilə Alyansın hesabına köçürməyi xahiş etdi. Sevimli muğənnimizin bu jesti də Kanada qəzetlərinin səhifələrində öz yerini tapdı.
Artıq Brilyant xanım xeyli vaxtdır ki, doğma Bakıdadır. Həmişə olduğu kimi, Brilyant xanımın pərəstişkarları onun yeni layihələrdə, geniş konsert salonlarında, ekran-efirdə tez-tez görünəcəyini səbirsizliklə gözləyirlər. İnanırıq ki, ulu öndər ümummilli liderimiz Heydər Əliyev tərəfindən 1998-ci il 24 may tarixində təqdim olunmuş 0001 nömrəli vəsiqə ilə təsdiq olunmuş fəxri adın sahibi, respublikanın əməkdar artisti Brilyant Dadaşova bundan sonra da daha əzmlə çalışaraq milli musiqi mədəniyyətimizin yüksəlməsində, gənc istedadların ərsəyə gəlməsində əlindən gələni əsirgəməyəcəkdir.

Xalq qəzeti.- 2006.- 24 sentyabr.- S. 6.