Valeri Meladze də Bakıya gəldi

Müğənninin Saraydakı konserti baş tutdu

Rusiyanın tanınmış müğənnilərdən olan Valeri Meladzenin Heydər Əliyev adına Sarayda planlaşdırılmış konserti baş tutdu. söz verdiyi vaxtda Bakıya gəldi və tamaşaçıları üçün oxudu. Əvvəlcə onu qeyd edək ki, konsert digər rus ifaçılarının proqramramlarından xeyli fərqli keçdi.

Çünki V.Meladze səhnəyə çıxdığı andan səhnəni tərk edənə qədər sadə və mehriban göründü. Pərəstişkarları ilə ünsiyyət qurdu, onlarla şəkil çəkdirdi, suallarını cavablandırdı. Zarafat etməyi unutmayan V.Meladze əvvəldən söz verdiyi kimi tamaşaçıların istəyinə uyğun mahnılar səsləhdirdi. Pərəstişkarlarını Azərbaycan dilində salamlayan müğənni Bakının son dəfə gördüyündən xeyli dəyişdiyini diqqətə çatdırdı: "Bakı çox dəyişib. Çoxlu binalar tikilib. Elə bil şəhəriniz yenidən salınıb". Konsertdə V.Meladze çox sevilən "Sera", "Meçta", "Krasiva", "Na verşine uspexa" və sairə mahnılarını oxudu. "Okean" duetini səsləndirərkən "Viaqra" qrupunu müğənninin səhnəyə dəvət etdiyi 30-dan çox xanım pərəstişkar əvəz etdi. Onu da bildirək ki, müğənninin səsləndirdiyi mahnıların ekran versiyaları monitordan təqdim olunurdu. V.Meladzeni özü ilə gətirdiyi musiqiçiləri müşayiət etdilər. Müğənni bir pərəstişkarın bağışladığı qılıncı səhnədə öpdü. Onu da bildirək ki, bu dəfə nə fanatların qışqırığı, nə də səhnəyə axışması hadısəsi baş vermədi. İki saat davam edən konsertdən həm V.Meladze, həm də tamaşaçılar məmnun qaldılar.

Şərq.- 2006.- 26 sentyabr.- S. 14.