Azərbaycan Prezidenti
İlham Əliyev Birinci beynəlxalq rus kitabı
festivalının iştirakçılarını qəbul
etmişdir
Azərbaycan Respublikasının
Prezidenti İlham Əliyev sentyabrın 15-də Prezident
sarayında Bakıda keçirilən Birinci beynəlxalq rus
kitabı festivalının iştirakçılarını
qəbul etmişdir.
Dövlətimizin başçısı İlham
ƏLİYEV qonaqları salamlayaraq dedi:
- Sizin hamınızı ölkəmizdə
görməyimə çox şadam. Xoş gəlmisiniz!
Azərbaycanda Rusiya İlinin keçirilməsi nadir
hadisədir. Düşünürəm ki, rus kitabı
festivalı keçiriləcək bütün tədbirlər
çərçivəsində ən yaddaqalanı
olacaqdır. Ona görə də ümidvaram ki,
ölkəmizə səfər sizin üçün də çox
xoş olacaqdır. Bir çoxunuz əvvəlki
illərdə, son onillikdə Azərbaycanda artıq
dəfələrlə olmusunuz, bir çoxunuzla məni
şəxsi dostluq münasibətləri bağlayır. Ona
görə də sizin hamınızı, o cümlədən
ölkəmizə ilk dəfə gələnləri
ürəkdən salamlayıram.
Bir tərəfdən, bu festival Bakı sakinlərinin rus
ədəbiyyatının, rusdilli ədəbiyyatın
nailiyyətləri ilə tanış olmasından ötrü
gözəl imkandır, eyni zamanda, ümumən
ölkələrimiz arasında ikitərəfli
münasibətlərin inkişafı üçün
çox mühüm hadisədir. Çünki iqtisadi, siyasi
əlaqələrlə yanaşı, bizim bu istiqamətdə
böyük uğurlarımız var, ikitərəfli
münasibətlərdə humanitar əməkdaşlıq da
əvəzsiz rol oynayır. İndi o da ön sıraya
keçir ki, bu da çox sevindiricidir. Görünür, bu
onunla bağlıdır ki, ölkələrimizdə, MDB
ölkələrində dövlətçiliyin
təşəkkülü prosesləri artıq bitmişdir,
iqtisadi böhranlar da əsasən başa
çatmışdır və indi daha dinamik inkişaf
dövrü gəlib çatmışdır ki, burada da
mənəvi dəyərlərə tələbat artır.
Ona görə də bir daha demək istəyirəm ki, mən
bu festivalı məhz həmin nöqteyi-nəzərdən
qiymətləndirirəm. Festivalın çox böyük
səmərəsi, böyük əhəmiyyəti var.
Mövcud olan, genişləndirilməli olan əlaqələr
ikitərəfli münasibətlərin
möhkəmlənməsində, şübhəsiz, öz
rolunu oynayır.
Rusiya ilə Azərbaycan arasında münasibətlər ümumən
çox müsbətdir, biz bundan məmnunuq. Festivalın
keçirilməsi buna daha bir sübut və bu
əlaqələrin möhkəmlənməsi işində
daha bir addımdır.
Siz yəqin bilirsiniz ki, Azərbaycanda rus dilinə böyük
məhəbbətlə yanaşırlar. Rus dilinin
ölkəmizdə saxlanması bizim üçün çox
vacibdir. Əlbəttə, 15 il müstəqillikdən sonra
bizdə rus dilindən Sovet İttifaqı dövründəki
qədər istifadə edilmir və bunun da təbii
səbəbləri var. Lakin gənc nəslin də rus dilini
bilməsi çox vacibdir.
Yeri gəlmişkən, bu gün Azərbaycanda əlamətdar
gündür - sentyabrın 15-i dərs ilinin
başlanğıcı günüdür. Mən səhər
tezdən bir neçə məktəbə getdim, onlardan
birinin təmirdən sonra açılışında
iştirak etdim. Bu məktəbdə iki bölmə -
Azərbaycan və rus bölmələri var. Azərbaycanda
tədrisin rus dilində aparıldığı belə
məktəblər 300-dən çoxdur. Bu baxımdan biz
fəxr edə bilərik ki, SSRİ dağıldıqdan sonra
rusdilli məktəblərin sayı azalmadı, harada tədris
rus dilində aparılırdısa, eləcə də
saxlanmışdır. O cümlədən dövlət ali
məktəblərində, orada da təhsilin rus dilində
aparıldığı şöbələr var.
Məsələn, Slavyan Universiteti. Başqa sözlə, bu,
dövlət siyasətidir, çünki Azərbaycan
çoxmillətli dövlətdir və hər bir millət
təkcə Konstitusiyaya görə deyil, real həyatda da
bərabər hüquqlara malikdir. Ona görə də
ölkəmizdə yaşayan xalqlar arasında sülh
inkişafımızın və dövlətçiliyi
möhkəmlətməyin mühüm amillərindən
biridir. Ona görə də çoxmillətli dövlət
kimi biz, təbii ki, ölkədə yaşayan xalqların
milli mədəniyyətlərinin inkişaf etdirilməsi, tam
ahəngdarlıq şəraiti yaradılması
məsələləri ilə çox ciddi məşğul
olmalıyıq. Bundan ötrü çox yaxşı
zəmin var. Azərbaycan tolerantlığı,
dözümlülüyü, milli həmrəyliyi ilə
həmişə fərqlənmişdir və indi də
fərqlənir. Əlbəttə ki, bu festival kimi
tədbirlər belə meyilləri gücləndirir. Gərək
bizim aramızdakı əlaqələr qırılmasın,
onlar daimi xarakter daşısın. Məsələn,
ötən il və cari il əlaqələrin yeni formatı
üçün imkanlar yaratmışdır: keçən il
Rusiyada Azərbaycan İli idi, bu il Azərbaycanda Rusiya
İlidir. Bu iki il bizi daha da yaxınlaşdırdı.
Gərək bu illər başa çatdıqdan sonra
əlaqələr kəsilməsin, meyil davam etsin. Bu, ilk
növbədə, bizdən, ölkələrin
rəhbərlərindən və təbii ki, ictimai və
siyasi proseslərə təsir göstərən, ictimai
rəyi formalaşdıran adamlardan asılıdır. Rusiyada
da, Azərbaycanda da ədəbiyyat, mədəniyyət,
incəsənət xadimləri sayılıb-seçilən,
hörmət bəslənən insanlardır. İctimai
şüurun, ictimai rəyin, ölkənin inkişaf
yollarının formalaşmasında onların rolu
böyükdür. Tanınmış
yazıçının, şairin, mədəniyyət
xadiminin dediyi sözün ictimaiyyət üçün
böyük dəyəri var. Ona görə də
gələcəkdə münasibətlərimizin necə
inkişaf edəcəyi həm də xeyli dərəcədə
ölkələrimizin nümayəndələri arasında bu
sahədə əməkdaşlığından asılı
olacaqdır.
Biz çox istəyirik ki, münasibətlərimiz indiki kimi
dinamik inkişaf etsin. Bundan ötrü bütün əsaslar
var, qarşılıqlı istək var və deyə
bilərəm ki, biz hesab edirik, ümumiyyətlə, Rusiya
ilə Azərbaycanın münasibətləri qonşular
arasında münasibətlərə nümunədir.
Qonşuları seçmirlər, amma təəssüf ki,
bəzən qonşular arasında mübahisələr,
hansısa anlaşılmazlıqlar, daha ciddi problemlər
meydana çıxır. Lakin bizim
münasibətlərimizdə belə şeylər yoxdur. Ona
görə də əlaqələrimizi
möhkəmlətmək lazımdır. Ümidvaram ki, biz
birgə səylərimizlə daha da
irəliləyəcəyik.
Sizi bir daha salamlamaq istərdim, sizinlə şəxsən
görüşməyimə çox şadam, şadam ki,
şəhərimizin sakinlərinin də sizinlə
görüşmək imkanı olacaqdır. Bilirəm ki, bu
axşam filarmoniyada görüş keçiriləcəkdir.
Arzu edirəm ki, ölkəmizdə olduğunuz günlər
xatirinizdə qalsın və xoş keçsin. Sağ olun.
İTAR-TASS İnformasiya Agentliyinin baş direktoru Vitali
İQNATENKO görüşdə çıxış
edərək dedi:
- İlham Heydəroviç, Sizinlə söhbət etmək,
görüşmək imkanına görə sağ olun.
Demək istəyirəm ki, bu salon Rusiya Federasiyasının
ziyalılarını birinci dəfə qəbul etmir. Unudulmaz
Heydər Əliyeviç məhz bu salonda bizi bir neçə
dəfə qəbul etmişdi. Biz bunların
hamısını xatırlayırıq. Diqqətəlayiq
haldır ki, biz bütün bunları unutmuruq. Budur, indi bizi Siz qəbul edirsiniz.
Bu gün başlanan festivalın təşkilində Rusiya
XİN xüsusi rol oynayır. Sizə və festivalın
təşkilinə kömək edənlərin hamısına
dərin təşəkkürümüzü bildiririk. Bu
günlər ərzində biz "dəyirmi masalar"
keçirəcək, Bakı Slavyan Universitetində
olacağıq. Biz çox şadıq ki, rus kitabı festivalının
tarixi məhz burada başlayır.
Sonra "Drujba narodov" jurnalının baş redaktoru
Aleksandr EBANOİDZE çıxış edərək dedi:
- Mən "Drujba narodov" jurnalına
başçılıq edirəm. O, ünsiyyət və
mədəni əlaqələr vasitəsidir,
əvvəldən belə düşünülmüşdür
və belə də fəaliyyət
göstərməkdədir. Sizə deməyə şadam ki,
ilk dəfə olaraq bu il biz Azərbaycan ədəbiyyatına
həsr olunmuş xüsusi buraxılış nəşr etməyi
qərara aldıq. Son 15 ildə Moskva nəşrlərində
Azərbaycan yazıçılarının
əsərləri çap edilməmişdi. Xüsusi
buraxılış jurnalın üçüncü
nömrəsidir, onun birinci səhifəsində Mehriban
xanım Əliyevanın məktubu dərc olunmuşdur. Biz
buna görə ona minnətdarıq. Xüsusi buraxılış
maraqlı alındı. Bu yaz nömrəsindən sonra
Azərbaycan müəlliflərinin daha iki əsəri
çap olundu. İtirilmiş ədəbi əlaqələr
beləcə bərpa edilir.
Federal Mətbuat və Kütləvi Kommunikasiyalar Agentliyinin
rəhbəri Mixail SESLAVİNSKİ rus kitabı
festivalının təşkilinin miqyasını və
səviyyəsini yüksək qiymətləndirdi. O dedi:
"Festivalın açılışının idman
kompleksində olmasına yaxşı mənada qibtə etdik.
Xatırladaq ki, əvvəllər şair və
yazıçıları böyük stadionlar qəbul
edərdi. Burada olanların bir çoxu 1970-ci illərdə
Heydər Əliyevin təşkil etdiyi sovet
ədəbiyyatı festivallarına gəlmişdi. Biz burada,
festivalda xoş təbəssümlər, səmimi maraq və
diqqət gördük. Bu, təkcə salonda deyil,
şəhərdə, küçələrdə də
baş verirdi. Adamlar müasir kitablarla, 1970-ci illərin
kitabları ilə yazıçılara yaxınlaşır,
avtoqraf xahiş edirdilər. Bütün bunlar insan
qəlbinə hərarət verir.
Dünya şöhrətli yazıçı,
Qırğızıstanın Lüksemburqdakı səfiri
Çingiz AYTMATOV Azərbaycan dövləti
başçısının elm və
mədəniyyətə yetirdiyi diqqəti yüksək
qiymətləndirdi, Bakıda rus kitabı festivalının
keçirilməsini buna sübutlardan biri kimi vurğuladı.
O dedi: "Bizə çox xoşdur ki, Azərbaycan Prezidenti
bizim üçün aktual olan məsələləri
bizimlə bilavasitə müzakirə edir. Özü də
iqtisadi, sosial problemlərlə, siyasətlə birlikdə".
Görkəmli yazıçı, Qazaxıstanın
YUNESKO-dakı daimi nümayəndəsi Oljas SÜLEYMENOV
vurğuladı ki, yaradıcılıq təşkilatı
kimi qorunub saxlanmasında məşhur siyasi xadim Heydər
Əliyevin böyük rol oynadığı Azərbaycan
Yazıçılar Birliyinin qorunub saxlanması faktının
özü yüksək qiymətə layiqdir. Bu siyasəti
Prezident İlham Əliyev də uğurla davam etdirir. O dedi:
"Rus kitabına belə əhəmiyyət verilməsini
ancaq alqışlamaq lazımdır".
Şair Dmitri Bıkov Rusiyanın gənc
yazıçıları adından çıxış
edərək azərbaycanlı müəlliflərlə
yaradıcılıq əlaqələrindən
danışdı.
Mixail Seslavinski Birinci beynəlxalq rus kitabı
festivalının iştirakçıları adından
"Bolşaya rossiyskaya ensiklopediya"nın sanballı
nəşrinin indiyədək çapdan
çıxmış cildlərini, habelə sonrakı cildlərin
alınması üçün sertifikatları Azərbaycan
dövlətinin başçısına təqdim etdi. O,
həmçinin bildirdi ki, nəşrin ilk cildlərində
Azərbaycan, Prezident Heydər Əliyev, Bakı haqqında
geniş məqalələr dərc olunmuşdur.
Görüşdən sonra Prezident İlham Əliyev və
qonaqlar Prezident sarayı qarşısında xatirə
şəkli çəkdirdilər.