I beynəlxalq rus kitabı festivalında

Dünən Bakıda I beynəlxalq rus kitabı festivalı öz işinə başladı. Tədbir iştirakçıları ümummilli lider Heydər Əliyevin məzarını və Şəhidlər Xiyabanını ziyarət etdilər. Milli parkdakı idman sarayında festivalın təntənəli açılışı oldu. Əməkdaşımız Müzahim İsmayılzadə tədbir iştirakçılarından bir neçəsi ilə görüşmüş, onların ürək sözlərini qələmə almışdır.

Vladimir Sunqorkin, Rusiya, "Komsomolskaya pravda" qəzetinin baş redaktoru:

- Bu mənim Bakıya ikinci səfərimdir. Açığını deyim ki, ilk səfərimdən keçən müddət ərzində şəhər tam dəyişib, mən deyərdim ki, tanınmaz olub. Mən Bakını dünyanın ən gözəl şəhərlərindən biri kimi tanıyıram. Burada çoxlu sayda ruslar yaşayır. Onu da qeyd edim ki, elə Moskvada və Moskva vilayətində yaşayan azərbaycanlıların sayı 2 milyona çatıb. Bunun özü Rusiya ilə Azərbaycan arasında dostluq əlaqələrinin bariz nümunəsidir.

Bizim qəzet əvvəllər çox tirajla çap olunurdu və bilirəm ki, qəzetimizin Azərbaycanda çoxlu sayda oxucuları vardı. İndi vəziyyət tam şəkildə dəyişib, oxucuların görüşünə az tirajla gəlirik. Bu festivalda planlarımız ondan ibarətdir ki, nəşriyyat rəhbərləri ilə danışıqlar aparaq, tirajımızın sayını artıraq. Əminəm ki, bu istəyimizə nail olacağıq. Fikrət Qoca, xalq şairi:

- Tale elə gətirib ki, mən Moskvada Ədəbiyyat İnstitutunda oxumuşam, tələbəlik illərim bu şəhərdə keçib, Rusiya qəzet və jurnallarında şeirlərim, nəşriyyatlarında əsərlərim çap olunub. Bir kitabın araya-ərsəyə gəlməsi böyük bayramdır, o ki qaldı böyük bir xalqın ədəbiyyatının ölkəmizdə təmsil olunması ola. Bu məsələnin bir tərəfidir. Digər tərəfdən, Azərbaycana təkcə kitab gəlmir, o kitabları yazan canlı insanlar gəlir. Onlar öz duyumları ilə Azərbaycan haqqında nə qədər xatirələr aparacaqlar - bugünkü Azərbaycan haqqında, müstəqil, inkişaf edən bir ölkə haqqında reallıqları aparacaqlar. Bu, bəlkə də festivaldan daha vacibdi, çünki gələn şairlər, yazıçılar gördüklərini düzgün qələmə alacaqlar. Bir var biz özümüz haqqında danışaq, bir də var ki, bizim haqqımızda başqaları müsbət fikirlər söyləsinlər.

Tədbirin əhəmiyyəti nədən ibarətdir? Bilirsiniz ki, Moskvada, digər ölkələrdə yaşayan qələm sahibləri Bakıya gəlməkdə çətinlik çəkirlər - həm maddi, həm də vaxt baxımından. Onların bu tədbirə dəvəti və iştirakları bizimçün qiymətlidir, əgər qonaqların yarısının yarısı bizim haqqımızda fikir yaradırsa, bu, böyük bir işdir. Həm də müstəqil olmaq o deməkdir ki, sənin daha çox tərəfdaşın var, bu gün Rusiya ilə, sabah İranla, Türkiyə ilə əlaqələr yaratmalısan.

Bu gün rus kitab festivalı Azərbaycana gəlibsə, deməli, Rusiya həqiqətləri Azərbaycana gəlib və onunla tanışlıq bizim üçün xoş əhval-ruhiyyə yaradacaq.

Lyudmila Kol, Finlandiya, yazıçı:

- Mənim heç ağlıma da gəlməzdi ki, nə vaxtsa Azərbaycana, gözəl Bakı şəhərinə gələ bilim. Bu xoşbəxtlik mənə nəsib oldu. Moskvadan mənə zəng edib dedilər ki, Bakıda rus kitabı festivalı keçiriləcək. Böyük məmnuniyyətlə bu tədbirdə iştirak etməyə razılıq verdim.

Tanışlıq üçün deyim ki, mən Rusiyada anadan olmuşam, Moskva Dövlət Universitetinin filologiya fakültəsində dərs demişəm. Həyat yoldaşımın işi ilə əlaqədar Finlandiyada yaşayırıq. Bakıya yeni kitablarımla gəlmişəm. Onları Yazıçılar Birliyinə təqdim edəcəyəm. Əməkdaşı olduğum "Siterarus" jurnalının bir neçə sayını da özümlə gətirmişəm. Qeyd edim ki, sizin həmyerliniz Tahirə Cəfərova da bu jurnalda çalışır.

Çoxlu sayda görüşlərimiz olacaq və mən Bakıdan ən gözəl anılarla ayrılacağam.

Mirkazım Seyidov, Rusiya, Azərbaycan Yazıçılar və Jurnalistlər birliklərinin üzvü, Heydər Əliyev adına Beynəlxalq Azərbaycan Forumunun prezidenti:

- Azərbaycanda ilk dəfə olaraq keçirilən rus kitabı festivalının açılışı ümummilli liderimiz Heydər Əliyev siyasətinin yaşaması, bu kursun davam etdirilməsi deməkdir. Bu, həm də Azərbaycanın bu gün apardığı sülhsevər xarici siyasətinin uğuru kimi qiymətləndirilməli, Azərbaycanın dünya dövlətlərinə inteqrasiyası, mədəni əlaqələrinin daha da gücləndirilməsi kimi başa düşülməlidir. Əminəm ki, bu beynəlxalq tədbir Rusiyada da geniş əks-səda doğuracaq.

Festival Azərbaycanın mədəni həyatını bütün dünyada tanıdacaq, çünki tanınmış ədəbiyyat xadimlərinin ölkəmizə səfəri nəticəsiz qalmayacaq, ölkəmiz, onun gözəlliyi, qonaqpərvərliyi qonaqlarımızın diqqətindən yayınmayacaq.

Mən bu tədbirə əliboş gəlməmişəm, millət vəkili, YUNESKO-nun xoşməramlı səfiri, Heydər Əliyev Fondunun prezidenti xanım Mehriban Əliyevaya həsr etdiyim "Həqiqətin gözəlliyi" poemanı rus və Azərbaycan dillərində Novosibirsk şəhərində çapdan çıxıb. Əsər Mehriban xanımın fəaliyyətinə həsr edilib.

Respublika.- 2006.- 16 sentyabr.- S. 7.