Azərbaycanı necə turizm ölkəsi etməli

Anar Cəfərov bununla bağlı təkliflər paketi hazırlayıb

Dünən Beynəlxalq Mətbuat Mərkəzində (BMM) keçirilən mətbuat konfransında "Şabran şirkəti" MMC Azərbaycanda kurort və turizmin inkişaf etdirilməsi və ölkəyə turist axınının ildə 20 milyon nəfərə çatdırılmasını nəzərdə tutan təkliflər paketini açıqladı.

Cəmiyyətin prezidenti Amil Cəfərov qeyd etdi ki, proqram çox böyük kapital qoyuluşu tələb edir. Amma hər sərf edilən manat 100 qat xeyir verəcək.

A.Cəfərov ən böyük layihənin Xaçmaz və Dəvəçi şəhrləri arasında, qumlu dəniz sahilində qədim Şabran şəhərinin ərazisində "Böyük Şabran" kurort-turizm şəhərinin salınması olduğunu qeyd etdi. O vurğuladı ki, dünya standartlarına uyğun qurulacaq bu şəhərin əhalisi gələcəkdə 200 min nəfərə çatacaq. A.Cəfərov "Böyük Şabran" kurort-turizm şəhərinin Sankt-Peterburq şəhəri timsalında olacağını da bildirdi: "Ekoloyi cəhətdən təmiz bu kurort şəhərinin qabaq tərəfi 50 km-dən çox qumlu dəniz sahili, arxa tərəfi yaşıl meşəli soyuq bulaqlarla zəngin dağlar olacaq. Yaradılması nəzərdə tutulan kurort-turizm şəhərinin ərazisindən 7 çay keçir. Bu çayların mənbəyi dağlar, mənsəbi isə Xəzər dənizidir. Bu çaylar dağ çayları olduğu üçün yaz və payız aylarında bol sulu, yay aylarında isə az sulu olur, bəzən isə tamamilə quruyurlar. Təbiətin bu şıltaqlığının qarşısını almaq üçün hidro-qurğular tikilməli, çayların qarşısında bəndlər tikilib, göllər yaradılmalıdır. Çaylar kanallarla birləşdirilməli, suları Şabran və Vəlvələ çaylarına yönəldilməlidir. Çay və kanalların üzərində yaraşıqlı körpülər salınmalı, onlar heykəl və abidələrlə bəzədilməlidir. Şəhərin ümumi mənzərəsi Sankt-Peterburqu xatırladacaq. Bu da turistləri cəlb edəcək. Necə ki, türklər turistləri cəlb etmək üçün Antalyada Kremli yaradıblar".

A.Cəfərovun sözlərinə görə, yeni salınacaq turizm şəhərinin Bakı ilə daha doğrusu Novxanı ilə də əlaqələndirilməsi vacibdir. Belə ki, bu, Novxanının da turizm şəhəri kimi perespektivini artıracaq. A.Cəfərov vurğuladı ki, Şabranda və Novxanıda müasir limanlar tikilməsi və dəniz yolu ilə sərnişin daşınması da vacibdir. Eyni zamanda, proqrama Novxanı ilə Şabran arasında yüksək sürətli dəmir yolu nəqliyyatının- sürət qatarının yaradılması da daxildir. A.Cəfərov Bakının yanından keçməklə Şabrana getməyin turistlər üçün cəlbedici olacağını qeyd etdi: "Bakı şəhəri ilə tanışlıq üçün xüsusi turist marşurutları təşkil etmək olar. Bu yolla Bakının yollarını tıxaclardan nisbətən mühafizə etmiş olarıq. Novxanı ilə "Böyük Şabran" kurort-turizm şəhəri arasında dəniz yolu ilə 100 km məsafə var. Müasir katerlərdən istifadə edərək bu yolu iki saata qət etmək mümkündür. Bu, sərnişinlərə həm dəniz səyahəti, həm də kurort-turizm şəhərinə getmək imkanı yaradacaq".

A.Cəfərov dəniz nəqliyyatından Lənkərana getmək üçün istifadə etməyin də əhəmiyyətli olduğunu vurğuladı. O, Bakıda da turizm obyektlərinin tikilməsinin tərəfdarıdır: "Qız Qalası"nın yanında oriyinal üslublu, müasir otelin tikilməsi şəhərin yaraşığını daha da artırar. Müasir sahilyanı şəhərlərdəki kimi, turistlərin milli parka asma eyvanla çıxışın da təmin etmək olar".

A.Cəfərov Gəncə şəhərinin də turizm əhəmiyyətini artırmaq üçün xüsusi proqram hazırladıqlarını diqqətə çatdırdı: "Gəncə şəhərində Nizami Gəncəvinin məqbərəsinin yanında 50 hektar sahədə dünyada analoqu olmayan, bənzərsiz "Xəmsə" bağının salınması proqramımızda xüsusi yer tutur. N.Gəncəvi bəşəriyyət tarixində heç bir dahi söz ustadı ilə müqayisə olunmaz şəxsiyyətdir. Böyük fəxrdir ki, o azərbaycanlıdır və biz bu üstünlüyümüzü nümayiş etdirməyə borcluyuq. Bu səbəbdən də salınacaq "Xəmsə" bağı Nizami dühasına layiq olmalıdır. "Xəmsə" bağının içərisi 5 müstəqil bağa ayrılmalı və hər bağ özündə Nizaminin bir əsərinin məzmununu əks etdirən heykəl və saraylarla bəzədilməlidir.

A.Cəfərov "Xəmsə" bağının yaxınlığında turistlər üçün "Semiramidanın asma bağları" adlı otellər tikməyi də təklif etdi: "Dünyanın 7 möcüzəsindən biri sayılan "Semiramidanın asma bağları" rəvayətə görə indiki Gəncə ərazisindən gəlin getmiş Midiya hökmdarının qızı Semiramidanın şərəfinə salınıb".

A.Cəfərov vurğuladı ki, əgər iş düzgün qurularsa, salınacaq şəhərlər və tikiləcək obyektlər tezliklə xərclərini ödəyəcək və gəlir gətirməyə başlayacaq. Nəticədə 1 milyondan artıq insan işlə təmin olunacaq. Azərbaycan adambaşına düşən məhsula görə dünyada qabaqcıl ölkələrdən biri olacaq.

Sonda A.Cəfərov qeyd etdi ki, hazırladıqları təkliflər paketini prezidentə təqdim ediblər.

Kaspi.-2007.-2 avqust.-S.22.