"Hoqqabazlar" filmi hazırdır

Emin Mırabdullayev: Deyirlər ki, bizdə yaxşı aktyorlar yoxdur, yalandır, var

Xeyli müddət əvvəl Emin Mirabdullayevin film çəkməsi barədə məlumat vermişdik. Yəqin Emini çoxları istedadlı klipmeyker kimi tanıyırlar. Ancaq sənətə gələndə o, film çəkmək arzusunda olub. Nəhayət ki, Eminin bu arzusu reallaşıb və Elmar Dəcəlin ssenarisi əsasında film çəkmək təklifi alıb.

Filmin çəkilişləri bir müddət əvvəl başlasa da, artıq rejissorun sözlərinə görə, çəkilişlər tam bitib. Filmin iş prosesində ilkin adı "Halal pullar" adlansa da, sonda qərara gəlinib ki, adıçəkilən ekran əsəri "Hoqqabazlar" adlansın. Emin Mirabdullayevin "Şərq"ə verdiyi məlumata görə, filmin çəkilişləri artıq tam bitib. Səsləndirmə işləri də artıq başa çatıb. Filmin operator yükü Kənan Məmmədovun üzərinə düşüb. Filmin bəstəkarları isə Rəşad Haşımov və Ənvər Sadıqovdur. Adıçəkilən ekran əsərinin səs rejissoru kimi Teymur Kərimov çalışıb. Filmin ssenarisi, ideya xətti barədə bir müddət öncə Emin Mirabdullayev "Şərq"in oxucularına məlumat vermişdi. Bir daha xatırladaq ki, film sosial mövzuda olan bir çox problemləri özündə təcəssüm etdirir, madiyyatın, pulun cəmiyyətdə nə qədər önəmli olduğu, paraya görə mənəviyyatın bəzən itirilməsinin mümkünlüyü özünü göstərir. Rejissorun sözlərinə görə, bu ciddi mövzuya müraciət edərkən onların məqsədi tamaşaçını yalnız düşündürərək yükləmək niyyəti deyil. Onlar satirik mövzuda çəkilən bu filmdə tamaşaçının bir qədər satirik formada problemə yanaşmasını təmin ediblər. Düşünmək imkanı olan tamaşaçı problemlərin çözümünü yüklənərək həll etmir, sadəcə, gülüşlə qəbul edərək münasibətə yanaşmaq imkanı əldə edir. Emin Mirabdullayevin sözlərinə görə, filmdə çox professional yaradıcı heyət çalışıb. "Hoqqabazlar"da əsas rolları Ramiz Əzizbəyli, Nuriyyə Əhmədova, Arif Quliyev, Rəfael İsgəndərov, tanınmış şoumen Murad Dadaşov, keçmiş "KVN"-çi Bəhram və digərləri çəkiliblər. Emin Mirabdullayev çəkiliş meydançasında bəzi aktyorların onu heyrətləndirdiyini də gizlətmədi: "Deyirlər ki, bizdə yaxşı aktyorlar yoxdur, yalandır, var. Bu filmdə mən Azərbaycanın güclü aktyor potensialı olduğuna bir daha əmin oldum. Professional aktyorları demirəm, filmdə Murad Dadaşovun oynadığı obraza baxanda mənimlə razılaşarsmız ki, bu insanda nə qədər aktyor istedadı, bazası mövcuddur. İş prosesində mən bir daha onun sənətə vurğun insan olduğuna əmin oldum. Bu insan gözəl istedada malik olmaqla yanaşı, özünə, sənətinə, o cümlədən qarşısındakılara məsuliyyətlə yanaşa bilir. İnanın ki, əgər səhər Murad Dadaşovun çəkiliş meydançasında olması gərəkli idisə, o gecə saat 3-də mənə zəng vurub soruşurdu ki, Emin, sabah, mən nə etməliyəm, nə lazımdır, nə məsləhət görərdin? Deyirdim ki, ay Murad, yat. Səhər çəkiliş meydançasında bunları bilərsən. Məsələ burasındadır ki, bu insanın özünə qarşı tələbkarlığı, sənətinə qarşı məsuliyyəti var. O qədər professional aktyor potensialına malikdir ki, sanki illərdir kamera qarşısında rol yaradıb. Nuriyyə Əhmədova da professional aktrisa kimi çox xoşuma gəldi. Hələ Rəfaeldən danışmıram. Rəfael indiyə qədər bir çox obrazları yaratsa da, tamaşaçı onu bu filmdə bəlkə də fərqli bir ampluada görə biləcək. Filmin çəkilişindən böyük zövq aldım. Çünki burada professional aktyor heyəti ilə yanaşı, dostlarımla birgə çalışırdım".

Xatırladaq ki, filmin təqdimat mərasiminin Yaşıl Teatrda keçirilməsi nəzərdə tutulub. Çox güman ki, sentyabr ayında "Hoqqabazlar"ın premyerası böyük rezonans doğuracaq. Bundan əlavə, Emin Mirabdullayev bəzi sənətçilərə də mesaj göndərdi: "Nədənsə, müğənnilər elə hesab edir ki, mən daha klip çəkmirəm. Ona görə də film çəkilişindən sonra heç kim mənə müraciət etmir. Düzdür, film çəkmək mənim ən böyük arzum olub və düşünürəm ki, rejissor üçün film çəkmək istəyinin reallaşması böyük uğurdur. Ancaq biz Azərbaycanda yaşadığımız üçün müəyyən reallıqlarlarla barışmalıyıq. Məsələ burasındadır ki, mənim maddi durumum üçün klip çəkməyə də ehtiyacım var. Bildirmək istəyirəm ki, klip çəkmək təklifi olsa, yenə də klipmeyker kimi çalışmağı düşünürəm. Film çəkmək isə tamamilə başqa bir istiqamət, sahədir. Burada gələcəkdə də özümü göstərmək niyyətindəyəm. Yeri gəlmişkən onu da qeyd edim ki, "Hoqqabazlar"ı təhvil verdikdən sonra yeni bir layihə üzərində çalışmağa başlayacam. Sözsüz ki, eyni yaradıcı heyətlə. Onu da qeyd edim ki, bu layihəni Mədəniyyət və Turizm Nazirliyinin dəstəyi ilə reallaşdırmağı planlaşdırmışıq. Nazirliyin sifarişi ilə növbəti bir ekran əsəri hazırlanacaq. Bu barədə payız aylarında ətraflı məlumat vermək mümkündür".

Şərq.- 2007.- 17 avqust.- S. 11.