Mükərrəmoğlu M.

“Milli bomba” ilk baxış

"Azərbaycan" kinoteatrında Azərbaycan və Rusiya kinematoqrafçılarının birgə layihəsi olan "Milli bomba" filminin təqdimatı gerçəkləşib. Təqdimat mərasimində çıxış edən filmin rejissoru V.Mustafayev "Milli bomba"nın çəkiliş prosesindən danışaraq, bu ekran əsərinin bəyəniləcəyini əminliklə vurğulayıb. Mədəniyyət və turizm naziri Əbülfəs Qarayev ölkə başçısının mədəniyyət sahəsinə göstərdiyi diqqət və qayğıdan söz açıb: "Prezident İlham Əliyev mədəniyyətə, xüsusən də kinematoqrafiya sahəsinə böyük diqqət ayırır. İnanıram ki, bu diqqət gələcəkdə də öz bərhəsini verəcək və bizim kinematoqrafçılarımızın istehsal etdikləri filmlər dünyanın bir çox yerlərində keçirilən beynəlxalq festivallarda iştirak edərək uğurlar qazanacaq". Prodüser Valeri Ruzin "Milli bomba" filminin 2004-cü ildə XXVI beynəlxalq Moskva kinofestivalında müsabiqəyə buraxıldığını və uğurla nümayiş olunduğunu vurğulayıb. Elə həmin il bu film Rusiyanın Smolensk şəhərində keçirilmiş birinci "Yeni kino XXI əsr" beynəlxalq kinofestivalında "Qran-pri" mükafatını qazanıb. Tədbirdə Rusiya və Azərbaycan arasında humanitar sahədə əməkdaşlığın, dostluğun inkişafında xidmətlərinə görə V.Mustafayevə mükafat təqdim edilib.

Xalq qəzeti.-2007.-9 fevral.-S.7.