Azərbaycan Respublikası Prezidenti İşlər
İdarəsinin Prezident kitabxanasından AzərTAc-a daxil
olmuş məlumatda deyilir ki, XX yüzilliyin sonlarında
bəşər tarixinin ən böyük faciələrindən
biri — Xocalı soyqırımı törədildi.
Ermənistan silahlı qüvvələri havadarlarının
köməyi ilə Azərbaycanın Dağlıq Qarabağ
bölgəsində və ona bitişik rayonlarında
azərbaycanlıları kütləvi surətdə məhv
etmək, onları yurd-yuvalarından didərgin salmaq yolu
ilə respublikamızın ərazisinin bir hissəsini
işğal etmişdir. Bu təcavüz siyasətinin tərkib
hissəsi olaraq, 1992-ci il fevralın 26-na keçən gecə
erməni silahlı birləşmələri keçmiş
SSRİ-nin Dağlıq Qarabağda yerləşən
366-cı motoatıcı alayının əsgər və
zabitləri ilə birlikdə Xocalı
soyqırımını törətmişlər.
Əhalisi 6 min nəfərdən çox olan Xocalı şəhəri
topların və zirehli texnikanın köməyi ilə
yerlə-yeksan edildi. Mühasirədə olan şəhərin
bütün əhalisi — körpə uşaqdan tutmuş
əlsiz-ayaqsız qocalaradək ucdantutma məhv edildi, bir qismi
isə əsir alındı. Günahsız, əliyalın
insanlar təqib edilərək çöllərdə və
meşələrdə güllələndilər.
Meyitlərin dərisini soydular, bədən üzvlərini
doğradılar.
Xarici və yerli jurnalistlər faciədən dərhal sonra
ermənilərin vəhşiliyini və
qəddarlığını lentlərin yaddaşına
köçürdülər. Dünya mətbuatı
Xocalı adlı bir şəhərin erməni vandalları
tərəfindən yer üzündən silinməsi,
əhalisinin soyqırımına məruz qoyulması
haqqında xəbərlər və hadisə yerindən
reportajlar yaydı. Lakin çox təəssüf ki, sonradan
yenə də Azərbaycan xalqının faciəsinə
biganəlik göstərildi, fəryadımızı
özümüzdən başqa kimsə eşitmək
istəmədi.
Azərbaycan Prezidenti İlham Əliyev ötən il
İşlər İdarəsinin Kitabxanasında olarkən
orada yaradılmış elektron nəşrlərlə
tanış olmuş, Azərbaycan tarixinə,
Ermənistan-Azərbaycan, Dağlıq Qarabağ
münaqişəsinə və Xocalı soyqırımına
aid tammətnli bazaların həm də ingilis və rus
dillərində variantlarının hazırlanıb
kitabxananın saytında yerləşdirilməsini tövsiyə
etmişdi. Kitabxananın kollektivi Xocalı
soyqırımının 15 illiyi ərəfəsində 3
dildə (Azərbaycan, rus və ingilis dillərində) “XX
əsrin faciəsi — Xocalı soyqırımı” adlı
tammətnli elektron nəşr hazırlayaraq kitabxananın
www.preslib.az ttp://www.preslib.az/ saytında yerləşdirmişdir.
Elektron nəşrə daxil olan materiallar 3 bölmədə
qruplaşdırılmışdır. “Ümumi məluma” adlanan
bölmədə Dağlıq Qarabağ
münaqişəsinin qısa tarixçəsi, Xocalı
soyqırımının miqyası haqqında istintaq
materialları, zərərçəkənlərin
ifadələri, tibbi ekspertiza rəyləri və s. materiallar
toplanmışdır. “Rəsmi materiallar” adlanan
bölmədə Xocalı soyqırımının
tanıdılması istiqamətində dövlət
səviyyəsində atılan addımlar, qəbul edilən
qərarlar, beynəlxalq təşkilatlara edilən
müraciətlər, Xocalı faciəsinin beynəlxalq
hüquq normaları baxımından soyqırımı kimi
tövsif edilməsi haqqında rəsmi sənədlər
toplanmışdır. “Xocalı soyqırımının
əks-sədası” adlanan bölmədə isə bu
günədək Xocalı soyqırımı ilə
bağlı yerli və xarici mətbuatda dərc olunan, elektron
kütləvi informasiya vasitələrində əksini tapan
seçmə materiallar yerləşdirilmişdir.
“XX əsrin faciəsi — Xocalı soyqırımı” adlı
tammətnli elektron nəşrə, həmçinin Xocalı
soyqırımından bəhs edən bəzi kitabların
elektron versiyası və “Xocalı soyqırımı
saytlarda” bölmələri də əlavə edilmişdir.
“XX əsrin faciəsi — Xocalı soyqırımı” elektron
nəşri müntəzəm olaraq yeniləşdirilir.
Prezident Kitabxanasının əməkdaşları
“Ermənistan-Azərbaycan, Dağlıq Qarabağ
münaqişəsi” tammətnli elektron nəşrinin də
ingilis və rus dillərində versiyalarını
hazırlayırlar.
Xalq qəzeti.- 2007.- 24
fevral.- S. 4.