Xatun

“Üzeyir bəyin adı akademiyaya qaytarılmalıdır”

Bu ilin mayında Bakı Musiqi Akademiyasının 85 illik yubileyi dövlət səviyyəsində qeyd olunacaq. Akademiyanın rektoru, bəstəkar Fərhad Bədəlbəyli bununla bağlı nəzərdə tutulan tədbirlərin siyahısının hazırlandığını söylədi:
"Bakı Musiqi Akademiyası böyük tarixi yol keçib. Bu təhsil ocağının əsası dahi bəstəkar Üzeyir Hacıbəyov tərəfindən qoyulub. Biz yubiley tədbirinin akademiyanın yarandığı gündə keçirilməsini planlaşdırırıq".
F.Bədəlbəyli 85 illik yubileylə bağlı silsilə tədbirlərin keçiriləcəyindən xəbər verdi. Eyni zamanda bildirdi ki, yubiley təntənələrini bir günə sığışdırmaq mümkün deyil. F.Bdəlbəyli qeyd etdi ki, bütün kollektiv diqqətini ilk növbədə Bakı Musiqi Akademiyasına Üzeyir Hacıbəyovun adının qaytarılmasına nail olmağa yönəldib və onlar buna nail olacaqlarına əmindirlər. Akademiyanın rektoru bu yaxınlarda Üzeyir bəyin "Arşın mal alan" operasının Almaniyada nümayiş olunacağını deyib. Onun sözlərinə görə, tamaşanın həmin ölkədə nümayiş olunması ideyası Azərbaycanın Almaniyadakı səfirliyi tərəfindən irəli sürülüb:
"İndi sponsor məsələsini həll etməyə çalışırıq. Ümidvaram ki, tamaşaya diqqət böyük olacaq. Bu layihəni yaradıcı heyətlə həyata keçirmək üçün ciddi vəsait tələb olunur. 50 nəfərin iştirakı ilə hazırlanan tamaşa Berlində, yaxud Frankfurtda göstəriləcək. Xatırladım ki, tamaşa ötən il sentyabr ayında Vyanada nümayiş olundu və böyük maraq doğurdu. Tamaşada Əsgər rolunu - İran, Gülçöhrəni - Amerika, Tellini - Yaponiya, Asyanı isə Polşa sənətçiləri ifa ediblər".
Qeyd edək ki, növbəti dəfə nümayiş etdiriləcək tamaşa alman dilində nəzərdə tutulsa da, bəzi ariyalar doğma dilimizdə səsləndiriləcək. Fərhad Bədəlbəyli "Arşın mal alan"a ABŞ-da da böyük maraq olduğunu qeyd etdi: "Sözügedən tamaşa ilə yanaşı, Üzeyir bəyin "O, olmasın, bu olsun" və bir neçə musiqili tamaşalarını bir çox dünya səhnələrində nümayiş etdirməyi qarşımıza məqsəd qoymuşuq. Çünki vaxtilə dünyanı dolaşan həmin tamaşalar haqqında bu günün gəncləri xəbərsizdirlər. Yəqin ki, Almaniyadan sonra ünvanımız tezliklə ABŞ olacaq".
Rektor bu il Bakı Musiqi Akademiyasında gənc pianoçuların müsabiqəsinin keçiriləcəyini bildirdi. Bu müsabiqə Kövkəb Səfərəliyevanın 100 illik yubileyinə həsr olunacaq. O bildirdi ki, Kövkəb xanım Azərbaycanın ilk peşəkar pianoçusudur və Bülbül adına Orta İxtisas Musiqi Məktəbinin banilərindəndir.
Qeyd edək ki, aprelin sonlarına nəzərdə tutulan müsabiqənin münsiflər heyətinin sədri F.Bədəlbəyli özü olacaq. İştirakçıların çıxışları və müsabiqənin yekun konserti Dövlət Filarmoniyasında gerçəkləşəcək. Ən yaxşı ifaçı 3000 dollar məbləğində mükafat alacaq. Fərhad Bədəlbəyli mayda Akademiyada Klassik Musiqi Festivalının da keçiriləcəyini dedi. Musiqi Xadimləri İttifaqı ilə birgə təşkil olunacaq festivalda həm Azərbaycan, həm də dünya musiqiçilərinin əsərləri səsləndiriləcək:
"Festivala ABŞ, Rusiya, Fransadan ifaçılar dəvət alacaqlar. Onlar rayonlara səfər edərək, oradakı musiqiçilərə treninqlər keçəcəklər. Həmin festivalda mən də tələbələrim qarşısında çıxış edəcəm".

Ayna.-2007.-2 fevral.-S.8.