Dünya Xocalı soyqırımının
ildönümünü anır
Ankara
Fevralın 26-da
Türkiyənin paytaxtında Xocalı
soyqırımının 15-ci ildönümü ilə
əlaqədar tədbirlər keçirilmişdir.
Ankaranın Keçiörən rayonundakı Esterqon
qalasında Xocalı soyqırımı qurbanlarının
xatirəsinə ucaldılmış abidənin
önündə ölkəmizin Türkiyədəki
səfirliyi və Keçiörən bələdiyyəsinin
təşkilatçılığı ilə mitinq oldu. Aksiya iştirakçıları əllərində
"Bir millət, iki dövlət", "Xocalı qətliamı
unudulmasın", "Qarabağ Azərbaycan
torpağıdır" sözləri yazılmış
şüarlar tutmuşdular.
İlk olaraq, ümummilli liderimiz Heydər Əliyevin Xocalı
soyqırımı qurbanlarının xatirəsinin hər il
bir dəqiqəlik sükutla yad edilməsi haqqında
1997-ci il 25 fevral tarixli Sərəncamı oxundu.
"Əbədi məşəl"in önünə
Azərbaycan səfirliyi adından əklil qoyuldu və
Bakı vaxtı ilə saat 17.00-da faciə qurbanlarının
xatirəsi bir dəqiqəlik sükutla yad edildi. Azərbaycan
və Türkiyənin dövlət himnləri səsləndi.
Mitinqdə çıxış edən Keçiörən
bələdiyyəsinin sədri Turqut Altınok və Türkiyə-Azərbaycan Parlamentlərarası
Dostluq Qrupunun sədri, millət vəkili Haluk İpək
Xocalı soyqırımı və ermənilərin
türklərə qarşı törətdikləri
qətliamlardan ətraflı bəhs etdilər,
ermənilərin saxta təbliğatına qarşı
səyləri birləşdirməyin zəruriliyini
vurğuladılar.
Azərbaycandan Milli Məclisin deputatları Qənirə
Paşayeva və Yaqub Mahmudov tarixin müxtəlif
dönəmlərində ermənilərin və onların
havadarlarının xalqımızın başına
gətirdikləri müsibətlərdən
danışdılar. Yaqub Mahmudov Türkiyə
Tarix Qurumu, Azərbaycan MEA-nın Tarix İnstitutu,
Azərbaycan-Türkiyə İş Adamları Birliyi və
Bakı Dövlət Universiteti arasında ötən ilin mayında
imzalanmış Bakı Bəyannaməsinə uyğun olaraq,
erməni təbliğat maşınına tarixi faktlar və
sənədlərin dili ilə layiqli cavab verilməsi istiqamətində
görülən işlərdən bəhs etdi.
Azərbaycanın Ankaradakı səfiri Zakir
Həşimov Xocalıda və digər torpaqlarımızda
ermənilərin törətdikləri
vəhşiliklərdən danışdı, Xocalı
faciəsinin əsl soyqırımı olduğunu
vurğuladı.
Sonra şəhidlərimizin ruhuna ehsan verildi və Ankaranın
məscidlərində onların ruhuna cümə namazları
qılındı.
Axşam Bilkənt Universitetinin binasında Heydər Əliyev
Fondunun göndərdiyi materiallar əsasında
hazırlanmış sərgiyə baxış oldu.
Sərgidən sonra universitetin akt salonunda Azərbaycanın
xalq artisti Sərvər Qəniyevin rəhbərlik etdiyi
simfonik orkestrin ifasında matəm musiqisi səsləndi.
Səfir Zakir Həşimov və deputat Qənirə
Paşayeva toplaşanlar - Türkiyənin millət
vəkilləri, xarici ölkələrin diplomatik
nümayəndəliklərinin başçıları
qarşısında çıxış edərək
Xocalı soyqırımından danışdılar.
Axırda Heydər Əliyev Fondunun hazırladığı
"Xocalı soyqırımı" sənədli filmi
nümayiş etdirildi.
Ukrayna
Fevralın 26-da Ukrayna Azərbaycanlıları Konqresi (UAK)
təşkilatın gənclər komitəsi (GK) ilə
birlikdə Kiyevdəki Ermənistan səfrliyi və ATƏT-in
nümayəndəliyi qarşısında Xocalı
soyqırımının 15-ci ildönümünə həsr
olunmuş icazəli kütləvi piketlər keçirmişdir. İştirakçılar əllərində
Azərbaycanın və Ukraynanın dövlət
bayraqlarını, XX əsrin ən dəhşətli
faciələrindən birini törətmiş erməni
işğalçılarını, hərbi
cinayətkarları və terrorçuları
lənətləyən Ukrayna, ingilis və rus
dillərində şüarlar və transparantlar tutmuşdular.
UAK-ın sədri Akif Gülməmmədov, Hacı
Əbülfəz Qasımov, UAK GK-nın rəhbəri
Toğrul Adıgözəlov və digər
çıxış edənlər ucadan "Erməni
terrorizminə yox!", "Erməni işğalçıları,
Azərbaycan torpaqlarından rədd olun!", "Xocalı
soyqırımını törətmiş erməni hərbi
cinayətkarları və terrorçularının ciddi
cəzalandırılmasını tələb edirik!"
və digər antierməni şüarları
söyləmişlər.
Ermənistanın Ukraynadakı səfirliyinə
və ATƏT-in bu ölkədəki
nümayəndəliyinə Xocalı
soyqırımının 15-ci ildönümü ilə
əlaqədar müraciət
ünvanlandırılmış, yoldan
keçənlərə UAK-ın orqanı olan "Qolos
Azerbaydjana" qəzetinin Ermənistan-Azərbaycan,
Dağlıq Qarabağ münaqişəsinin ən qanlı
səhifəsinə həsr olunmuş xüsusi
buraxılışının nüsxələri
paylanmışdır. Azərbaycanın Ukraynadakı
səfirliyində matəm lenti bağlanmış
dövlət bayrağı səhərdən aşağı
endirilmiş, diplomatlar Xocalı faciəsi qurbanlarının
xatirəsini bir dəqiqəlik sükutla anmışlar.
Fevralın 26-da axşam Səməd Vurğun adına
kitabxanada UAK-ın təşkilatçılığı
ilə Xocalı soyqırımı qurbanlarının
xatirəsini anma mərasimi keçirilmişdir.
Tədbirdə faciəyə həsr olunmuş "Qarabağ
haqqında həqiqət" kitabının təqdimatı
keçirilmiş, toplaşanlara Azərbaycan səfirliyinin
Xocalıya həsr olunmuş mətbuat üçün
məlumatı və "Qolos Azerbaydjana" qəzetinin
nüsxələri paylanmışdır.
Gürcüstan
Ötən əsrin ən dəhşətli faciələrindən
biri olan Xocalı soyqırımı qurbanlarının
xatirəsi Azərbaycanın Gürcüstandakı
səfirliyinin dəstəyi ilə bu ölkədə
dərin ehtiramla yad edilmişdir. Azərbaycanlıların
yığcam məskunlaşdığı Kvemo
Kartli-Borçalı bölgəsinin Marneuli rayon
mərkəzində fevralın 24-də başlanan tədbir
fevralın 26-da Tbilisidə
yekunlaşdırılmışdır.
Tbilisidəki K.Marcanişvili adına Dövlət
Teatrının geniş foyesində Heydər Əliyev Fondu
tərəfindən hazırlanmış "Xocalıda
soyqırımı" adlı fotosərgi
açılmış və "Xocalı - bir səhərin
faciəsi" filmi göstərilmişdir. Fotosərgidə
Azərbaycan rəssamı Fuad Qafarın, habelə Xocalıdan
və Dağlıq Qarabağdan məcburi köçkün
uşaqların rəsm əsərləri nümayiş
etdirilmişdir.
Sonra Tbilisi Azərbaycan Dövlət Dram Teatrı kollektivinin
Xocalı faciəsinə həsr olunmuş "Xocalı -
torpağın fəryadı" tamaşası
göstərilmişdir. Tamaşa Azərbaycanın
Gürcüstandakı səfirliyinin dəstəyi ilə
hazırlanmışdır. Teatrın bədii rəhbəri,
Gürcüstan Dövlət mükafatı laureatı, rejissor
Qoça Kapanadze tamaşanı sənədli materiallar
əsasında hazırlamışdır. Baş
rollarda teatrın aktyorları Namiq Hacıyev, Sevinc
Məmmədova, "Müstəqil teatr"ın aktyoru Marina
Sağaradze çıxış etmişlər. Əsas
rollarda Tbilisi Azərbaycan Dövlət Dram Teatrının
aktyorları Aidə Tağıyeva, Turqay Vəlizadə, Leyla
Qasımova, Mənzər Sadıqova və başqaları
oynamışlar. Tamaşanın rejissoru Qoça
Kapanadze ötən əsrin bu dəhşətli faciəsi
barədə tamaşaçılarda dərin
təəssürat yaratmaq məqsədilə Gürcüstanın
bir sıra aparıcı teatrlarından da aktyorlar dəvət
olunduğunu bildirmişdir. Aktyorların
gərgin əməyi sayəsində tamaşaçılar
faciənin köklərini, erməni cəlladların
amansızlığını, sabiq sovet rəhbərliyinin
ədalətsizliyini, yüzlərlə insanın - qoca,
uşaq, qadının qanına qəltan edildiyi
nəfəskəsən səhnənin şahidi olmuş
və teatrı göz yaşları ilə tərk etmişlər.
Azərbaycanın Gürcüstandakı səfiri Namiq
Əliyev tamaşaçılara müraciət edərək
demişdir: "Bu gün Xocalı
soyqırımından 15 il keçir. Özgə
torpaqlarını
özününküləşdirməyə şirnikən
erməni qəsbkarlar sabiq Sovet İttifaqı rəhbərliyinin
ikili siyasətindən istifadə edərək 366-cı
alayın köməyi ilə bir gecədə Qarabağda
Xocalı adlı bir şəhəri yer üzündən
sildilər. Burada onlar nə uşağa, nə qadına,
nə qocaya aman verdilər. 613 nəfəri qəddarlıqla
qətlə yetirdilər. 1000 nəfər ağır
yaralandı, minlərlə adam itkin düşdü,
ermənilərin girovuna çevrildi. Dünyada nahaq qan
yerdə qalmır. Azərbaycan xalqı həqiqətin
təntənəsinə inanır və mütləq belə
də olacaqdır. Prezident İlham Əliyev
Azərbaycanın Dağlıq Qarabağ
münaqişəsinin dinc yolla tənzimlənməsinin
tərəfdarı olduğunu dəfələrlə bəyan
etmiş və Azərbaycan xalqının öz
torpaqlarını erməni qəsbkarlarından
təmizləməyə qüdrəti
çatdığını vurğulamışdır.
Biz sülh tərəfdarıyıq və kimsə silah
gücünə danışır, problemləri bu yolla
həll etmək istəyirsə, o, mütləq uduzacaqdır.
Gürcü xalqı da azərbaycanlılar kimi, uzun
illərdir separatizmdən əziyyət çəkir.
Əminəm ki, dövlət
başçılarımızın ərazi
bütövlüklərimizin bərpası
yönümündə apardıqları iş uğurla
nəticələnəcəkdir. Xocalı faciəsi ilə
Gürcüstan ictimaiyyətinin ətraflı tanış
olması üçün dəstəyə görə
Heydər Əliyev Fonduna dərin
təşəkkürümüzü bildiririk".
Sonra səfir Azərbaycan teatrının kollektivinə,
bütün aktyorlara təşəkkürünü bildirdi.
Tədbirdə Gürcüstan hökumətinin, parlamentinin,
Gürcüstan və Azərbaycan ictimaiyyətinin
təmsilçiləri, Tbilisidəki diplomatik
nümayəndəliklərin rəhbərləri və
əməkdaşları iştirak etmişlər.
Tamaşaçılara Xocalı faciəsi əks olunan
bukletlər paylanmışdır.
Bişkek
Bişkekdəki "Azəri" Mədəniyyət
Mərkəzi paytaxtdakı "Türkel" Fondu ilə
birgə Xocalı faciəsinin 15-ci ildönümünə
həsr olunmuş anma mərasimi keçirmişlər.
Tədbirdə Bişkekdəki Azərbaycan və türk
diasporlarının üzvləri, Türkiyənin Qırğızıstandakı
səfirliyinin əməkdaşları, qırğız
xalqının nümayəndələri, jurnalistlər
iştirak etmişlər.
Mərasimi Bişkekdə çap edilən "Türkel"
qəzetinin baş redaktoru Ramiz Məşədihəsənli
açaraq, bu faciəni müasir dövrdə misli
görünməmiş soyqırımı
adlandırmışdır.
"Azəri" Mədəniyyət
Mərkəzinin sədri Akif Allahverdiyev, sədrin müavini
Əsəd Həsənov, türk iş adamı Mümtaz
Çoban və başqaları bildirmişlər ki, bu
faciəyə yalnız ümummilli lider Heydər Əliyevin
səyləri nəticəsində siyasi qiymət
verilmişdir.
Sonra şəhidlərin ruhuna dualar oxunmuş, ehsan
verilmişdir.
Los-Anceles
Azərbaycanın Los-Ancelesdəki baş konsulluğundan
AzərTAc-a bildirmişlər ki, fevralın 25-də Kaliforniya
ştatının San Xose şəhərində Şimali
Kaliforniya Azərbaycanlıları Təşkilatı
tərəfindən Xocalı soyqırımının 15
illiyinə həsr olunmuş anma mərasimi
keçirilmişdir.
Mərasimdə çıxış edən
təşkilatın sədri Samir Lütvəliyev Xocalı soyqırımı
qurbanlarının xatirəsinin hər bir
azərbaycanlının qəlbində daim
yaşayacağını bildirmiş, ABŞ-dakı
soydaşlarımızın bu faciə haqqında
həqiqətləri bütün rəsmi və qeyri-rəsmi
dairələrə çatdırmalarının
zəruriliyini vurğulamışdır.
Kaliforniyada səfərdə olan Azərbaycanın rabitə
və informasiya texnologiyaları naziri Əli Abbasovun
rəhbərlik etdiyi nümayəndə heyəti də
tədbirə qatılmışlar. Nazir qısa
müddətdə Azərbaycan Respublikasının
mürəkkəb yollardan keçdiyini bildirmiş, məhz
ulu öndər Heydər Əliyevin uzaqgörən və
müdrik siyasəti nəticəsində stabilliyin
bərqərar olunduğunu, iqtisadiyyatın sürətlə
inkişaf etməyə başladığını
diqqətə çatdırmışdır. Nazir
demişdir ki, Prezident İlham Əliyevin rəhbərliyi
ilə Azərbaycan bölgədə lider dövlətə
çevrilmişdir.
Tədbirdə Xocalı şəhərində qətlə
yetirilmiş azərbaycanlıların xatirəsi bir
dəqiqəlik sükutla yad edildikdən sonra "Lider"
televiziyasının "Məhv edilmiş
şəhər" sənədli filmi nümayiş
olunmuşdur.
Mərasimdə Azərbaycanın Los-Ancelesdəki bas konsulu
Elin Süleymanov, ölkəmizin BMT yanında daimi
nümayəndəliyinin başçısı Aqşin
Mehdiyev çıxış edərək ermənilərin
Xocalıda törətdikləri vəhşiliklərdən danışmışlar.
Rumıniya
Fevralın 26-da Xocalı faciəsinin 15-ci ildönümü
ilə bağlı Azərbaycanın Rumıniyadakı
səfirliyi Heydər Əliyev Fondunun dəstəyi ilə
və fondun göndərdiyi əyani vəsaitlər, videofilm
əsasında Buxarest şəhərində anma mərasimi,
sənədli filmin nümayişi və "Xocalı
uşaqların gözü ilə" adlı sərgi
keçirmişdir.
Tədbirdə Rumıniya-Azərbaycan Dostluq
Cəmiyyətinin, Azərbaycan-Rumıniya Mədəniyyət
və Gənclər Assosiasiyasının,
Rumıniya-Azərbaycan Sənaye və Ticarət
Palatasının rəhbərləri, sabiq və
hazırkı senatorlar, deputatlar, Rumıniyada yaşayan və
təhsil alan azərbaycanlılar, türksoylu icmaların təmsilçiləri, diplomatlar, jurnalistlər, insan
hüquqları üzrə fəaliyyət göstərən
qeyri-hökumət təşkilatlarının
nümayəndələri iştirak etmişlər.
Əvvəlcə Xocalı şəhərində
qətlə yetirilən insanların xatirəsi bir
dəqiqəlik sükutla yad edilmişdir. Sonra tədbir
iştirakçıları Azərbaycan Prezidentinin Xocalı
faciəsinin 15-ci ildönümü ilə əlaqədar
Azərbaycan xalqına müraciətinin mətni ilə
tanış edilmişlər.
Səfir Eldar Həsənov ermənilərin
törətdiyi qırğınlardan söhbət
açmışdır.
Çıxış edənlər 1992-ci il fevralın 26-da
erməni hərbi birləşmələrinin Xocalıda
törətdikləri faciənin təkcə
azərbaycanlılara deyil, bütün
bəşəriyyətə qarşı
yönəlmiş cinayət olduğunu bildirmişlər.
Tədbir iştirakçıları Xocalı
faciəsinin 15-ci ildönümü ilə əlaqədar
Azərbaycan Prezidenti İlham Əliyevin xalqa müraciəti,
Heydər Əliyev Fondunun Azərbaycan, ingilis və rus
dillərində hazırladığı "Qarabağ
həqiqətləri" bukletlər toplusu, səfirliyin
təşəbbüsü ilə rumın dilinə
tərcümə edilmiş "Xocalı soyqırımı (sənədlər, faktlarda və xarici
mətbuatda)" və "Xocalı faciəsi"
kitabları, Azərbaycanın Xarici İşlər Nazirliyi
"Diplomatiya aləmi" jurnalının Xocalı
faciəsinə həsr olunmuş ingilis dilində xüsusi
buraxılışı, səfirliyin hazırladığı
mətbuat məlumatı və Xocalıdan olan məcburi
köçkünlərin BMT, Avropa Şurası və
ATƏT-ə ünvanlanmış müraciəti ilə
də tanış olmuşlar.
Sadalanan materiallardan bir qismi və mətbuat məlumatı
Rumıniya parlamentinə, dövlət orqanlarına,
qeyri-hökumət təşkilatlarına, dövlət
arxivlərinə, kitabxanalara, səfirliklərə və
beynəlxalq təşkilatların nümayəndəliklərinə
də göndərilmişdir.
Tədbir Rumıniyanın kütləvi
informasiya vasitələrində geniş
işıqlandırılmış, "Nine OTClock",
"Replika", "Hayat", "Zaman", "Anayurt"
və "Qurbetçi" qəzetlərində Xocalı
faciəsinin dəhşətlərini əks etdirən
fotoşəkillər, geniş və əhatəli
məqalələr dərc olunmuşdur. Bundan
əlavə, mərasim nüfuzlu "Antena-1" və
"B-1 TV" televiziya kanallarının xəbərlər proqramlarında
əksini tapmışdır.
Özbəkistan
Daşkənddə Xocalı soyqırımının 15-ci
ildönümü ilə bağlı anma mərasimi
keçirilmişdir. Tədbirdə Daşkənddəki
Azərbaycan diasporunun üzvləri, qardaş özbək
xalqının nümayəndələri, səfirliyin
əməkdaşları iştirak etmişlər.
Mərasimdə şəhidlərin xatirəsi bir
dəqiqəlik sükutla yad edilmiş, Azərbaycan Prezidenti
İlham Əliyevin faciə ilə əlaqədar
xalqımıza müraciəti oxunmuşdur.
Azərbaycanın Özbəkistandakı səfiri Namiq Abbasov
mərasimdəki çıxışında bildirmişdir
ki, Azərbaycan Prezidenti İlham Əliyevin faciə ilə
bağlı xalqa müraciəti bu məsələdə il
ərzində bizim fəaliyyət proqramımız
olmalıdır. Səfir Xocalıda insanlara
və insanlığa qarşı törədilmiş bu
cinayəti misli görünməmiş vəhşilik
adlandıraraq bildirmişdir ki, o gecə erməni quldurları
Xocalını yer üzündən sildilər və bu,
planlı şəkildə hazırlanmış bir
soyqırımı idi. O, bu soyqırımı və
ermənilər tərəfindən xalqımıza
qarşı həyata keçirilən digər terror
aktlarının dünya ictimaiyyətinə çatdırılması
üçün səylərin artırılmasının vacibliyini
qeyd etmişdir.
Sonra Xocalı faciəsi ilə əlaqədar sənədli
film nümayiş etdirilmiş, Azərbaycan Prezidenti İlham
Əliyevin Xocalı faciəsi ilə əlaqədar
müraciətinin mətni iştirakçılara
paylanmışdır.
* * *
Fevralın 26-da Daşkənddəki Azərbaycan
Mədəniyyət Mərkəzləri Assosiasiyası
Xocalı faciəsinin 15-ci ildönümünü qeyd
etmişdir.
Assosiasiyanın sədri Akif Ağatalıbov,
Beynəlmiləl Mədəniyyət Mərkəzinin sədri
Nəsrəddin Məhəmmədiyev və digər
çıxış edənlər Xocalı
soyqırımını Xatın və Sonqmi faciələri
ilə müqayisə etmiş, cinayətkarları
lənətləmişlər. Qeyd
edilmişdir ki, 1992-ci il fevralın 26-da 613 nəfər
Xocalı sakini həlak olmuş, 1275 nəfər əsir
götürülmüşdür. Çıxış
edənlər əmin olduqlarını bildirmişlər ki,
günahsız adamların qanı yerdə qalmayacaq,
təcavüzkarlar öz layiqli cəzalarını alacaqlar.
Həmin gün Özbəkistanın Buxara,
Səmərqənd, Fərqanə vilayətlərində
də Xocalı faciəsi ilə əlaqədar
mərasimlər keçirilmiş, ehsan verilmişdir.
Küveyt
Azərbaycanın Küveytdəki səfirliyindən
AzərTAc-a bildirmişlər ki, Xocalı soyqırımının
15-ci ildönümü ilə əlaqədar səfirlik bir
sıra işlər görmüşdür.
Səfirlik Xocalı soyqırımına həsr olunmuş
broşür hazırlamışdır. Faciəni əks
etdirən fotoşəkillərin yerləşdirildiyi
broşürdə ərəb və ingilis dillərində
Xocalı soyqırımı və ümumiyyətlə,
Ermənistanın Azərbaycana təcavüzü haqqında
məlumatlar, ərazimizin 20 faizinin işğalına dair
xəritə verilmişdir.
Nəşrin nümunələri Küveytin dövlət
qurumlarına, hökumət üzvlərinə, deputatlara,
iş adamlarına, ictimaiyyət
nümayəndələrinə və diplomatik korpusa
göndərilmişdir.
Heydər Əliyev Fondunun Xocalı soyqırımına dair
göndərdiyi materiallar əsasında ətraflı
mətbuat məlumatı hazırlanmış,
Küveytdəki diplomatik nümayəndəliklərə,
beynəlxalq təşkilatlara və kütləvi informasiya
vasitələrinə göndərilmişdir.
Səfirlikdə Xocalıda ermənilərin törətdiyi
vəhşilikləri əks etdirən fotolardan ibarət stend
nümayiş etdirilmişdir.
Fevralın 26-da səfirlikdə Azərbaycan
diasporunun nümayəndələrinin iştirakı ilə
keçirilən tədbirdə Xocalı faciəsi
qurbanlarının xatirəsi bir daha anılmış,
Xocalı soyqırımı, Ermənistan-Azərbaycan,
Dağlıq Qarabağ münaqişəsi ilə
bağlı həqiqətlərin Küveyt
ictimaiyyətinə daha fəal şəkildə
çatdırılması tövsiyə olunmuşdur.
Küveytin nüfuzlu "Əl-Ray" qəzetində
səfirliyin Xocalı faciəsi ilə bağlı geniş
bəyanatı nəşr edilmişdir.
Bundan əlavə, fevralın 28-də
Azərbaycanın Küveytdəki səfiri Şahin Abdullayevin
türk icması ilə Xocalı faciəsinə dair
görüşü nəzərdə tutulmuşdur.
İsveç
Xarici Ölkələrdə Yaşayan Azərbaycanlılarla
İş üzrə Dövlət Komitəsindən
AzərTAc-a bildirmişlər ki, Xocalı faciəsinın
15-ci ildönümü ilə
əlaqədar İsveçin Göteborq
şəhərində İsveç-Azərbaycan
Federasiyasının təşkilatçılığı
ilə tədbir keçirilmişdir.
İsveçdəki İraq türkmənləri,
Türkmənistan, türk icmalarının
nümayəndələrinin də iştirak etdikləri
təbdirdə Xocalı soyqırımının ermənilər tərəfindən insanlığa
qarşı törədilmiş ağır cinayət
olduğu vurğulanmışdır.
İsveç dilində Xocalı soyqırımı
haqqında ətraflı məlumatların əks olunduğu
mindən artıq broşür, erməni
terrorçularının Xocalıda törətdiyi
cinayətlərə dair film İsveç
vətəndaşlarında faciə ilə bağlı
dolğun təsəvvür yaratmışdır. Sonda
tədbirin təşkilatçıları İsveç
vətəndaşlarının imzası ilə İsveç
parlamentinə məktub hazırlayıb təqdim
etmişlər.
Danimarka
Xarici Ölkələrdə Yaşayan Azərbaycanlılarla
İş üzrə Dövlət Komitəsindən
AzərTAc-a bildirmişlər ki, Danimarka-Azərbaycan Dostluq
Cəmiyyəti Frederiksborq şəhərində Xocalı
soyqırımının 15-ci ildönümünə həsr
edilmiş elmi konfrans keçirmişdir.
Danimarkadakı soydaşlarımızla
yanaşı, yerli əhalinin, türklərin,
norveçlilərin, gürcülərin, litvalıların
və ukraynalıların iştirak etdikləri tədbirdə
Xocalı soyqırımını, ümumiyyətlə, Azərbaycana
qarşı erməni təcavüzünü pisləyən
çıxışlarla yanaşı, Heydər Əliyev
Fondunun hazırladığı "Xocalı
soyqırımı" filmi böyük həyəcan və
kədər hissi ilə qarşılanmışdır.
Heydər Əliyev Fondunun dəstəyi ilə təşkil
olunmuş foto və ədəbiyyat guşəsi də konfrans
iştirakçılarının böyük marağına
səbəb olmuşdur.
Litvalılar Cəmiyyətinin fəxri
üzvü xanım Vibekke Dillinq Tortzen Danimarka-Azərbaycan
Dostluq Cəmiyyətinin fəaliyyətinin
əhəmiyyətli olduğunu, Danimarka
Krallığının dostluq rəmzi sayılan və
üzərində Danimarka şahzadəsinin şəkli olan
xüsusi xatirə nişanını cəmiyyətin sədri
Elxan Hüseynova təqdim etmişdir.
Yeni Zelandiya
Xarici Ölkələrdə Yaşayan Azərbaycanlılarla
İş üzrə Dövlət Komitəsindən
AzərTAc-a bildirmişlər ki, "Azəri" Yeni
Zelandiya-Azərbaycan Dostluq Cəmiyyəti Xocalı
soyqırmının 15-ci ildönümü ilə
əlaqədar tədbirlər keçirmişdir.
Cəmiyyətin üzvləri fevralın 24-də və
25-də Yeni Zelandiyanın ən böyük ticarət
mərkəzi olan "Baotany Dons"da Xocalı faciəsinin
dəhşətlərini əks etdirən
vərəqələr və broşürlər
paylamışlar.
Vərəqələrin və broşürlərin,
həmçinin Heydər Əliyev Fondunun Azərbaycan, rus
və ingilis dillərində hazırladığı "Qarabağ
həqiqətləri" bukletlərinin, onların CD və
DVD variantlarının paylanması Oklənd
şəhərində də davam etdirilmişdir.
Bundan əlavə, qəzet redaksiyalarına Xocalı
faciəsi haqqında məlumat və broşürlər
göndərilmişdir. Həmçinin məlumat və
materiallar Yeni Zelandiya parlamentinin deputatlarına da təqdim
olunmuşdur.
Hollandiya
Hollandiyanın Haaqa şəhərində Türkiyənin
İğdır bələdiyyəsinin
təşkilatçılığı ilə "Xocalı
soyqırımı və yaxın tarixdə
türklərə qarşı törədilən
qətliam" mövzusunda konfrans keçirilmişdir.
Tədbir başlanmazdan əvvəl
azərbaycanlı jurnalistlər üçün qısa
brifinq keçirən türkiyəli alimlər
"Böyük Ermənistan" xülyası ilə bütün
dünyada başağrısı yaradan erməni
millətçilərinin törətdiyi terror aktlarından
danışmışlar. Vurğulanmışdır
ki, Azərbaycan həqiqətlərinin, o cümlədən
Xocalı soyqırımı barədə obyektiv
məlumatların dünya ictimaiyyətinə
çatdırılması üçün beynəlxalq səviyyədə
tədbirlərin keçirilməsi lazımdır. Məhz bu yolla dünya ölkələrində
dövlət məmurundan fəhləyədək, hamıya
Azərbaycanın haqq səsini eşitdirmək olar. Beynəlxalq Məhkəmənin yerləşdiyi
Haaqa şəhərində keçirilən bu konfrans da buna
xidmət edir.
Konfrans azadlıq və müstəqillik
uğrunda həlak olanların xatirəsinin bir dəqiqəlik
sükutla yad edilməsi, Azərbaycan və Türkiyənin
dövlət himnlərinin səsləndirilməsi ilə
başlanmışdır.
Xocalı faciəsi qurbanlarının fəryadını,
onların yaşadığı dəhşəti
sözlə ifadə etmək mümkün deyildir, - deyən
İğdır bələdiyyəsinin sədri Nurəddin
Bələdiyyənin
təşkilatçılığı, Azərbaycanın
Qarsdakı konsulluğu, eləcə də Hollandiyada
fəaliyyət göstərən Azərbaycan və türk təşkilatlarının
dəstəyi ilə keçirilən konfransda Milli Məclisin
deputatları, Türkiyədən, Naxçıvandan
gələn alimlər, tədqiqatçılar
Ermənistan-Azərbaycan, Dağlıq Qarabağ
münaqişəsinin tarixindən, Xocalı faciəsinin
acı anlarından danışmışlar. Tədbir
iştirakçılarına ermənilərin tarixən
türklərə qarşı törətdiyi qətllər
barədə məlumatlar çatdırılmış,
faktları təsdiq edən sənədlər nümayiş
etdirilmişdir. "Azərbaycanın
müstəqilliyini bərpa etməsi və
ermənilər", "Ermənilərin xarici siyasəti,
Azərbaycanın Qarabağ bölgəsinin işğalı
və Xocalı soyqırımı", "Böyük
Ermənistan" uydurması, terror, soyqırımı və
təcavüzkarlıq ideologiyası", "Erməni
vandalizmi, Xocalı soyqırımı", "Xocalı
qətliamına Türkiyədən baxış",
"Böyük Ermənistan" xülyası və
Xocalı qətliamı", "Ermənilərin Cənubi
Qafqaza köçürülməsi" və başqa
mövzularda məruzələr dinlənilmişdir.
Konfransda "Böyük Ermənistan"
və "böyük erməni soyqırımı"
adlı uydurmaların dünyada təbliğ olunmasının
qarşısını almaq üçün Azərbaycan
və Türkiyə alimlərinin bir ideya ətrafında
birləşməsinin zərurət olduğundan
danışılmışdır. "Gücümüz
birlikdədir", - deyən konfrans
iştirakçıları dəfələrlə
vurğulamışlar ki, Xocalı soyqırımı
barədə obyektiv məlumatın yayılması
üçün bu cür tədbirlərin məhz Avropada
keçirilməsi çox vacibdir.
Heydər Əliyev Fondunun
hazırladığı "Xocalı
soyqırımı" filminin nümayişi toplantı
iştirakçılarına dərin təsir etmişdir.
Onlara fondun Xocalı faciəsindən bəhs
edən kitablar və məlumatlar təqdim olunmuşdur. Tədbir iştirakçıları filmə və
nəşrlərə görə Heydər Əliyev Fondunun
prezidenti, Milli Məclisin deputatı, YUNESKO-nun
xoşməramlı səfiri Mehriban xanım Əliyevaya
minnətdarlıqlarını bildirmişlər.
Konfransda qəbul olunmuş qərar Beynəlxalq
Məhkəməyə təqdim ediləcəkdir.
Xatırladaq ki, insan haqlarının
carçısı olan Niderlandda bu cür tədbirin
keçirilməsinə erməni icması hər
vəchlə mane olmaq istəmişdir. Ermənilərin
tədbiri qadağan etmək üçün Haaqa
hakimiyyət orqanlarına müraciətindən sonra 8 saat
davam edən danışıqlarda təşkilatçılar
və burada fəaliyyət göstərən Azərbaycan
cəmiyyətlərinin nümayəndələri Haaqa
rəsmilərinə tədbirin hüquqi normalara uyğun
olduğunu sübut edə bilmişlər.
Misir
Azərbaycanın Misir Ərəb Respublikasındakı
səfirliyindən AzərTAc-a bildirmişlər ki, Xocalı
soyqırımının 15-ci ildönümü ilə
əlaqədar bir sıra tədbirlər keçirilmişdir.
Səfirlikdə erməni silahlı
qüvvələrinin Azərbaycan xalqına qarşı
törətdiyi cinayətləri əks etdirən fotostend
təşkil edilmişdir.
Səfirliyin ərəb və ingilis dillərində
hazırladığı xüsusi məlumat Misirin Xarici
İşlər, Beynəlxalq Əməkdaşlıq,
Sənaye və Ticarət nazirliklərinə, Ərəb
Dövlətləri Liqasına, səfirliklərə, BMT-nin
və Avropa İttifaqının nümayəndəliklərinə,
digər qurumlara, Əş-Şarq Əl-Ausat informasiya
agentliyinə göndərilmişdir.
Eyni zamanda, ərəb dilində səsləndirilmiş
"Məhv edilmiş şəhər" filminin DVD
formatında nüsxələri qeyd edilən qurumlarla
yanaşı, televiziya kanallarında yayımlanması məqsədilə
Qətərin "Əlcəzirə" kanalının
Misirdəki bölməsinə, ölkənin digər
televiziya kanallarına göndərilmişdir.
Azərbaycan.-2007.-28 fevral.-S.5.