Milli-mənəvi sərvətimiz olan muğamlarımız toxunulmazdır

Milli Mədəniyyətin Təbliği Mərkəzi (MMTM) Azərbaycan Teleradio Verilişləri Şirkətinin təşkilatçılığı ilə "Muğamın bəzi mətbuat səhifələrində tənqidi və təbliği" mövzusunda mətbuat konfransı keçirib. APA-nın məlumatına görə, tədbirdə çıxış edən MMTM-nin rəhbəri Arif Mədətov bu günlərdə "Alma" qəzetində dərc olunan "Muğamın qanunu" adlı yazıya iradını bildirib: "Yazıda qeyd olunub ki, "muğam insanı düşündürmür, yəni təfəkkürünə təsir etmir. Muğama qulaq asıb, ancaq külfətin sayını çoxaltmaq olar. Ailəni it ilxısına, köpək sürüsünə çevirmək olar. Muğamatın aşıladığı dünya faniliyinin acısını arvaddan çıxırlar". Bu sözləri muğam üçün yazmaq nə dərəcədə düzgündür? Muğam bizim sərvətimizdir və bütün dünyaya səs salıb". Azərbaycan Teleradio Verilişləri Şirkətinin əməkdaşı, musiqişünas Səadət Təhmirəzqızı da muğam haqqında bu cür yazılara qarşı etinasız qala bilmədiyini vurğulayıb: "Əsrlərin sınağından çıxaraq, cilalana-cilalana bu günümüzə gəlib çatan muğam sənətinin bugünkü təşəkkülündə müxfəlif dövrlərdə yaşamış, alim və mütəfəkkirlərin, eyni zamanda görkəmli sənətkarlarımızın çox mühüm xidmətləri olub. Hər bir Azərbaycan vətəndaşı daim muğamın keşiyində durmalı və bu sərvət qorumalıdır".

Xalq artisti Habil Əliyev, tarzən Ramiz Quliyev, Dünya Azərbaycanlıları Gənclər Birliyinin rəhbəri Tofiq Əlizadə çıxışlarında bu fikirlərin muğama, ümumilikdə dinimizə, dilimizə, eləcə də xalqımıza yönəlmiş bir təhqir kimi qiymətləndiriblər.

İki sahil.- 2007.- 16 fevral.- S.6.