Xocalıda törədilən qırğınlar bütün dünyaya yayılacaq

Ölkəmizin qarşısında duran ən mühüm məsələ budur. Min il öncə olduğu kimi, bu gün də hər bir millətin qarşılaşa biləcəyi ən böyük haqsızlıq, ən böyük faciə təcavüz və qınağının işğalıdır. "Azərbaycan xalqı artıq 17 ildir ki, belə bir haqsızlıqla üzləşmişdir. Ermənistanın hərbçi təcavüzü nəticəsində torpaqlarımızın 20 faizi işğal altındadır. 20 mindən artıq insan həlak olmuş, 50 mindən çox adam yaralanmış və əlil olub. 1 milyondan artıq insan 10 ildən çoxdur ki, öz doğma torpağından didərgin düşərək, qaçqın və məcburi köçkün vəziyyətində yaşayır" deyən Fondun prezidenti vurğulayıb ki, azərbaycanlılar ermənilər tərəfindən soyqırıma və etnik təmizləmə siyasətinə məruz qalıblar. Bütün bəşəriyyətə qarşı tarixi bir cinayət olan Xocalı soyqırımı Azərbaycanın XX əsr tarixinin ən ağır faciəsidir. "Bütün bu reallıqlar bütün bu həqiqətlər bizim ən ağır problemimizdir və biz artıq bu reallıqlarla, bu həqiqətlərlə XXI əsrə qədəm qoymuşuq . Bütün bu həqiqətləri, bütün bu hadisələri, faktları, Dağlıq Qarabağ münaqişəsinin əsl səbəb və nəticələrini beynəlxalq ictimaiyyətə çatdırmaq, informasiya blokadasını yarmaq, on illərdir erməni diasporu tərəfindən yayılan yalan və uydurmaların qarşısını almaq Heydər Əliyev Fondunun fəaliyyətində həmişə mühüm yer tutur" deyə Mehriban Əliyeva bildirib. Toplantıda qeyd edilib ki, bu istiqamətdə görülən məqsədyönlü iş 2005-ci ildə Fondun yaratdığı və geniş məlumat bazasına malik "Azərbaycan" portalının internet şəbəkəsinə qoşulması ilə başlanıb. Portalda Qarabağ müharibəsi, Ermənistanın Azərbaycana təcavüzü, işğal olunmuş ərazilərdə yerli əhaliyə qarşı törədilən azğınlıq, tarix-memarlıq abidələrimizin vəhşicəsinə dağıdılması barədə faktlar öz əksini tapıb. On beş illiyini sonsuz ağrı-acı ilə qeyd etdiyimiz Xocalı soyqırımı da portalda ayrıca bölmə kimi təqdim olunub, 1992-ci ilin fevralında erməni quldurlarının törətdiyi qırğın haqqında geniş məlumatla yanaşı, burada qanlı faciəni əks etdirən fotoşəkillər də yerləşdirilib. Fondun nəşr etdiyi "Qarabağ həqiqətləri" bukletler toplusunda da Xocalı soyqırımı, erməni təcavüzünün nəticələri, erməni terror təşkilallarının Azərbaycana qarşı fəaliyyəti haqqında ətraflı informasiya var. Toplu ingilis, fransız, rus, alman və macar dillərində çap olunaraq, bir çox xarici ölkələrdə yayılıb. Hazırda bu nəşrin başqa dillərə tərcüməsi davam edir. Xocalı soyqırımının 15-ci ildönümü ilə əlaqadar isə Heydər Əliyev Fondu xüsusi layihə həyata keçirməyə başlayıb. Layihə çərçivəsində Ermənistan silahlı qüvvələrinin Xocalıda törətdiyi qırğınla bağlı Rusiya, Türkiyə, Fransa, Macarıstan, Rumıniya, Belçika, Avstriya, Almaniya, Çexiya, İsveçrə və Gürcüstanda silsilə tədbirlər keçiriləcək. Xarici ölkələrdə keçiriləcək anma mərasimləri Heydər Əliyev Fondunun ingilis, rus və türk dillərində hazırladığı "Xocalı soyqırımı" filminin nümayişi ilə başlayacaq. Mərasimlərə dəvət olunanlar erməni şovinistlərin Xocalıda törətdiyi vəhşilikləri əks etdirən fotoşəkillərlə və müxtəlif illərdə xarici ölkələrin nüfuzlu nəşrlərində Xocalı faciəsi haqqında dərc edilmiş materiallarla tanış olacaqlar. Bu tədbirlərdə Heydər Əliyev Fondunun ümumtəhsil məktəbləri və uşaq evlərində keçirdiyi "Xocalı uşaqların gözü ilə" mövzusunda rəsm müsabiqəsinin seçmələrindən ibarət ekspozisiyalar da təqdim olunacaq. Bu aksiyalarda "Qarabağ həqiqətləri" toplusunun geniş ictimaiyyət arasında yayımı da nəzərdə tutulub. İctimai rəyi formalaşdırmağa yönələn bu kimi tədbirlər Moskva, Berlin, Strasburq, Brüssel, Buxarest, Cenevrə, Ankara, İstanbul, Paris, Praqa, Lidiçe, Tbilisi və başqa şəhərlərin sakinlərinə Xocalı soyqırımı haqqında obyektiv və dürüst informasiya almağa imkan yaradacaq. Keçirilən aksiyaların xarici ölkələrin kütləvi informasiya vasitələrində işıqlandırılması üçün də tədbirlər görülür.

Şərq.- 2007.- 22 fevral.- S.4.