Əliyeva E.

Mədəniyyət mənəviyyatın açarıdır

Kollektivimizdə növbəti toplantı keçirilirdi. Toplantıda kitabxana sisteminin bütün filialının nümayəndələri, eyni zamanda şəhərin müxtəlif mədəniyyət ocaqlarında çalışan bir sıra başqa işçilər iştirak edirdilər. Söhbət ölkə başçısı cənab İlham Əliyevin mədəniyyətin inkişafına qayğı və diqqətindən gedirdi. Çox adam danışdı, çoxlu xoş işlər yada salındı.
Son illərdə Gəncədə görülən tədbirləri saymaqla qurtarmaq olmur. Cənab İlham Əliyevin təşəbbüsü ilə Comərd Qəssab türbəsi bərpa edilib. Cavad xanın məzarı üzərində milli ornamentli məqbərə uçalıb. Nizami Gəncəvinin məqbərəsində təmir-bərpa işləri aparılıb. Şəhərdə neçə-neçə memarlıq abidəsi yenidən qurulub. Ulu diyarın tarixini əbədiləşdirən guşələr yaradılıb. İndi söhbət beş yüz yerlik konsert-tamaşa zalının inşasından, "Bakı" kinoteatrının və Gəncə filarmoniyasının bərpasından, İmamzadə kompleksinin əsaslı təmirindən gedir.
Elm və biliyin məbədi sayılan kitabxanalar əsla unudulmur. Latın qrafikalı əlifbaya keçməklə əlaqədar müvafiq ədəbiyyat çatışmırdı, fondlarda kasadlıq yaranmışdı. Ölkə başçısı cənab
İlham Əliyev 12 yanvar 2004-cü ildə "Azərbaycan dilində latın qrafikası ilə kütləvi nəşrlərin həyata keçirilməsi haqqında" sərəncam imzaladı. Bununla da bir sıra lüğət və ensiklopediyalar, xalq ədəbiyyatı örnəkləri, klassik və müasir Azərbaycan və dünya ədəbiyyatı nümunələri latın qrafikası ilə çap olunaraq ölkə kitabxanalarına pulsuz paylanıldı. Elə buna görə bizim kitabxana sistemi üzrə indiyə kimi 171 adda 20 min nüsxədən artıq yüksək çap keyfiyyətli ədəbiyyat gətirildi. Mən hələ şəhərdəki ali, orta ixtisas və ümumtəhsil məktəblərinin aldıqları kitabları demirəm. Heç şübhəsiz, çox böyük mənəvi sərvətdir.
Prezidentin bu əvəzsiz töhfəsi ilə mədəniyyət ocaqlarının fəaliyyəti xeyli canlandı. İndi oxucular böyük həvəslə kitabxanalara gəlir, maraqlandıqları ədəbiyyatı tapıb oxuyurlar.
Ölkə həyatının bu mühüm sahəsinin günün tələbləri səviyyəsinə qaldırılmasına xüsusi qayğı və diqqət göstərilir. "Mədəniyyət, gənclər və idman müəssisələrində çalışan işçilərin əməkhaqqının artırılması haqqında" 22 yanvar 2007-ci il tarixli sərəncamı bu qayğı və diqqətin parlaq nümunəsidir. Onu da deyim ki, son iki ayda ikinci dəfədir ki, bizim maaşlarımız yüksəlir. Üst-üstə götürüləndə artım 50 faizdir. Söhbət təkcə maddi cəhətdən getmir. Bizi ən çox fərəhləndirən odur ki, ölkə başçısı sadə əməyimizə yüksək qiymət verir.
Toplantıda çıxış edənlər yekdilliklə dedilər ki, cənab Prezidentin bu qayğı və köməyi bizi daha yaxşı işləməyə ruhlandırır. Bütün Azərbaycan xalqı kimi, biz - Gəncənin mədəniyyət işçiləri də ölkə başçısının daxili və xarici siyasətini ürəkdən dəstəkləyir, müstəqil Azərbaycanın rifahı naminə cənab İlham Əliyevə yeni-yeni uğurlar arzulayırıq.

Azərbaycan.- 2007.- 1 fevral.- S. 4.