İyulun
4-də "Avropa" mehmanxanasında Azərbaycan
Mədəniyyət və Turizm Nazirliyi ilə Avstriyanın
İMC Krems Tətbiqi Elmlər Universiteti arasında turizm
mütəxəssislərinin hazırlanması, Azərbaycan
Turizm İnstitutunda (ATİ) beynəlxalq proqramların
həyata keçirilməsi üzrə müqavilə
imzalanmışdır.
Mərasimin əvvəlində ATİ-nin rektoru Cəfər Cəfərov
bu ali təhsil
ocağının fəaliyyətdə
olduğu bir il ərzində görülmüş işlər,
keçirilmiş tədbirlər
barədə ətraflı
məlumat vermişdir.
O, tədbirin sonunda Krems Universitetinin
Mədəniyyət və
Turizm Nazirliyi ilə bərabər,
ATİ ilə də əməkdaşlıq müqaviləsi
imzalayacağını söyləmiş
və bu sənəd çərçivəsində
həyata keçiriləcək
proqramlar barədə
danışmışdır. Bildirmişdir ki, müqavilə ATİ-nin Bolonya prosesi çərçivəsində atdığı addımlardan
biridir və Azərbaycanın Avropa təhsil sisteminə inteqrasiyasına əlavə
təkan verəcəkdir.
Mədəniyyət və
turizm naziri Əbülfəs Qarayev Azərbaycan dövlətinin
qeyri-neft sektoruna diqqət və qayğısından danışmış,
bu istiqamətdə turizmin prioritet sahələrdən biri olduğunu qeyd etmişdir. Azərbaycan Turizm İnstitutunun yaradılması
təşəbbüsünün Prezident İlham Əliyev tərəfindən
bəyənildiyini söyləyən
nazir, ölkəmizin başçısının bu
istiqamətdə verdiyi
tövsiyələri və
hazırda həmin tapşırıqların həyata
keçirildiyini tədbir
iştirakçılarının nəzərinə çatdırmışdır. O,
dövlətimizin respublikada
turizm infrastrukturunun inkişafı ilə bağlı gördüyü
işlər barədə
də məlumat vermişdir.
İmzalanacaq müqavilələri
Azərbaycanın dünya
turizm təhsili şəbəkəsinə daxil
olması istiqamətində
qətiyyətli addım
adlandıran nazir bildirmişdir ki, bütün kursları keyfiyyət zəmanəti ilə bitirmiş tələbələr
ATİ-nin diplomu ilə bərabər Krems Universitetinin "Turizm və istirahət" ixtisası
üzrə verdiyi Avstriya bakalavr dərəcəsi diplomunu
da alacaqlar. Azərbaycanda ilk dəfə
olaraq ATİ-nin diplomları Avropa ölkələri təhsil
ocaqlarının diplomlarına
bərabər tutulacaq
və vətəndaşlarımız
bu sənədlə dünyanın istənilən
ölkəsində turizm
sahəsində çalışmaq
hüququ qazanacaqlar.
Krems Universitetinin prezidenti Hayns Boyer bu sənədləri
turizm təhsili sahəsində Mərkəzi
Avropa və Mərkəzi Asiya ölkələri arasında
körpü kimi qiymətləndirmişdir. H.Boyer
universitetin dünyanın
bir çox ölkələrində turizm
təhsili ilə bağlı böyük layihələr həyata keçirdiyini vurğulamışdır.
Tədbir zamanı respublikamızın
səfalı, gözoxşayan,
gəzməli yerlərinə,
yeni açılmış
turizm marşrutlarına,
hotel və mehmanxanalarına həsr olunmuş film nümayiş etdirilmiş,
həmçinin Azərbaycan
Turizm İnstitutu və Krems Universitetinin
fəaliyyətinə aid
slayd-kadrlar göstərilmişdir.
Sonda müqavilələrin
imzalanma mərasimi olmuşdur. Mədəniyyət
və Turizm Nazirliyi ilə Avstriyanın Krems Tətbiqi Elmlər Universiteti arasında əməkdaşlıq müqaviləsini
Əbülfəs Qarayev
və Hayns Boyer imzalamışlar.
Eyni zamanda Azərbaycan Turizm İnstitutunun rektoru Cəfər Cəfərov
və Krems Universitetinin prezidenti Hayns Boyer rəhbərlik
etdikləri alı təhsil ocaqları arasında akademik anlaşma barədə müqavilə imzalamışlar.
Mərasimdə Milli Məclisin deputatları, Azərbaycanda akkreditə olunmuş diplomatik korpusun nümayəndələri
iştirak etmişlər.
Azərbaycan.- 2007.- 5 iyul.- S. 6.