İsayev Ə.
Gədəbəydə
"Bala Narzan" ailə istirahət mərkəzi açıldı
Keçən il ölkə başçısı İlham
Əliyev Gədəbəy
rayonunda olarkən Slavyanka kəndinə də baş çəkdi. Prezident fondunun vəsaiti ilə ucaldılan məktəb binasının inşası
ilə tanış oldu. Ətrafı seyr edərkən qarşıdakı məxməri
dağların, yaşıl
yamacların, qollu-budaqlı ağacların,
şırhaşır axan
Narzan bulağının
gözəlliklərinə xüsusi qiymət verdi.
Onda hələ bu səfalı səmtə yol çəkilməmişdi, Slavyanka
çayının körpüsü
də yox idi. İstər Narzana, istərsə də pay torpaqlarına,
çöl-çəmənə,
əkin-biçinə
gediş-gəliş heç də asan deyildi. Bəs
necə olsun? Bu məsələ çoxunu narahat edirdi.
Mühəndis Aqibət
Məmmədov bu yerlərdə xeyirxah insan kimi tanınır.
Doğma Şınıx
bölgəsinin, nankor
ermənilər tərəfindən
yandırılmış Mutudərə
kəndinin, onun yol-izinin, körpü və keçidlərin bərpasında çox iş görüb. Aqibət Məmmədov bu dəfə ölkə başçısının
diqqətini cəlb etmiş Narzan bulağını abadlaşdırmağı qərara
aldı. Asfalt yol çəkdi, çayın üzərində
körpü saldı.
Bununla da Slavyanka Narzanının yeni həyatı başlandı. İş adamı Zair Əsgərovla birgə iki-üç ailəlik evlər tikdirdi, istirahət guşələri,
körpülər-keçidlər
düzəltdi. Bulağın
ətrafını sahmana
saldı. Turizm üçün müvafiq
infrastruktur yaratdı.
Bu günlərdə
"Bala Narzan" ailə istirahət mərkəzinin açılışı
oldu. Rayon icra hakimiyyətinin
başçısı Kamran
Rzazadə, Mədəniyyət
və Turizm Nazirliyinin nümayəndəsi
Vüqar Şıxməmmədov,
ağsaqqal İkram Məmmədov, fərdi prezident təqaüdçüsü
Aşıq İsfəndiyar
Rüstəmov, saz və söz sənətinin mahir ustası Ədalət Dəlidağlı və başqaları yeni mərkəzin ilk müsafirlərini salamladılar.
İlk süfrə açıldı. İlk
şənlik başlandı.
Gədəbəy aşıqlarına,
rayonun ifaçılarına
meydan verildi.
Dağlara səda düşür. Ölkə
başçısının tövsiyə və tapşırığı ilə
səfalı dağlarda
turizmin ilk cığırları açılır.
Cənab İlham Əliyev Gədəbəy
rayonunda olarkən demişdi: "Gədəbəyin
çox gözəl təbiəti, çox gözəl iqlimi var. Burada turizmin
inkişafı üçün
çox böyük işlər görmək olar. Mən hesab edirəm
ki, əgər biz bu məsələlər
üzərində birlikdə,
səmərəli işləsək,
qısa müddət ərzində bu gözəl diyar turizm üçün də çox cəlbedici ola bilər".
Ölkə başçısının
digər tapşırıqları
kimi, turizmin inkişafı barədəki tövsiyələri
də Gədəbəy
rayonunda uğurla həyata keçirilir. Axı bu yerlərdə
belə nəcib məqsəd üçün
hər cür imkan və şərait
var. Uca dağlar, səfalı yaylaqlar, sərin bulaqlar, məxməri şəlalələr, çox
yerdə bənzəri
olmayan tarixi memarlıq abidələri
təbiəti sevənlərə
gəl-gəl deyir.
Rayonun müxtəlif guşələrində 80-dən
çox abidə qeydə alınıb. IX əsrin yadigarı
Qız qalası, Söyüdlü qalası,
Söyüdlü şır-şırı, Böyük
Qaramurad məbədi,
Düzyurdun tağlı
körpüsü, Qalakəndin
möcüzələri, Cavanşir-Koroğlu
qalası, hələ
XIX əsrdə dünyaya
səs salmış misəritmə zavodlarının
qalıqları... hərəsi
bir nağıl,
bir əfsanə, ulu tarixin canlı
yadigarı.
Çox adam bu yerləri görməyə can atır. Di gəl,
Şəmkir-Gədəbəy
yolu bir qədər narahat idi. Ölkə başçısı rayonda
olarkən tapşırıq
verdi ki, tezliklə bu problem də həll olunsun, Gədəbəy rayonuna öz görkəminə,
səfasına layiq rahat yol çəkilsin.
Qəsəbə və
kəndlərdə də
sistemli surətdə yollar, körpülər, keçidlər sahmana salınır.
Rayonun neçə-neçə bölgəsində
qızğın iş
gedir. Yuxarı Narzanda ən müasir tələblərə
cavab verən turizm mərkəzi yaradılır. Turist cığırları Qızıl torpaq bölgəsinə, Şınıxa,
Qalakəndə, Novosaratovkaya,
neçə-neçə
digər yerlərə
uzanır.
Çox keçməz
ki, dağlar diyarı Gədəbəy
turizm mərkəzinə
çevrilər. İlk
müjdəçi, ilk
qaranquş "Bala Narzan" isə hələlik ailə istirahət mərkəzi sayılır.
Azərbaycan.-2007.-5 iyul.-S.7.