Azərbaycan dünyanın ən iri turizm yarmarkasında təqdim edilib

İtaliyanın Milan şəhərində keçirilən dünyanın ən iri turizm yarmarkalarından birində Azərbaycanın bu sahədə nailiyyətləri böyük uğurla nümayiş etdirilib. Ekspozisiyamızın yerləşdiyi pavilyon həmişə gediş-gəlişli olmuş, italyanlar və qonaqlar Azərbaycan bölməsini yüksək qiymətləndiriblər. Milanda hər il qış mövsümünün sonlarında təşkil olunan bu yarmarka turizm sənayesinin çoxsaylı nümayəndələrini, dünyanın aparıcı turizm operatorlarını bir araya gətirir.

Tədbir bu dəfə də iştirakçıların və qonaqların ümidlərini doğruldub. İtaliyada ən böyük turizm tədbiri ekspozisiyalarının yerləşdiyi 9 pavilyonda (Fieramilano sərgi mərkəzinin ümumi sahəsi 65 min kvadrat-metrdir) turizm şirkətlərinin və aviaşirkətlərin, hotellərin, bir sözlə, çoxşaxəli turizm sənayesinin planetimizin bütün guşələrindəki təmsilçilərini görmək mümkün idi. Təşkilatçılar vurğulamışlar ki, bu il sərgiyə rekord sayda - 150 min tamaşaçı gəlib. Fəaliyyət göstərdiyi 26 il ərzində Milan yarmarkasının ən yaxşı təkliflər irəli sürən yerli və xarici firmalardan ibarət daimi tərkibi formalaşmışdır. Yarmarkada ilk dəfə iştirak edən Azərbaycan bu tərkibi daha da genişləndirib. 90 kvadrat-metr sahədə yerləşən xüsusi stenddə turizm imkanlarımızın dolğun və rəngarəng informasiya təqdimatı olub. Azərbaycanın tarixi, ənənələri, iqlim şəraiti, turizm obyektləri və istirahət zonaları, habelə ekspozisiyanın məzmunlu dizaynı və texniki təchizatı xarici mütəxəssisləri, peşəkarları, səyahət həvəskarlarını maraqlandırıb. Milli üçlüyün bir neçə gün ərzində pavilyonda təşkil etdiyi mini-konsertlər çılğın italyanları ekspozisiyamıza daha çox cəlb etmiş və gurultulu alqışlar qazanıb. Stenddə Azərbaycan milli aviaşirkəti də təmsil olunub ki, bu da son illər dünya turizm bazarında getdikcə cəlbedici imic qazanan ölkəmiz haqqında təəssüratları daha da gücləndirib.

Palitra.- 2007.- 13 mart.- S. 13.