Turanə

Azərbaycan xalça sənətinin Kamili

Bu günlərdə görkəmli xalça ustası, Xalq rəssamı Kamil Əliyevin xatirə gecəsi keçirilib. M.F.Axundov adına Milli Kitabxanada baş tutan tədbirdə Esmira Fuadın sənətkarın həyat və yaradıcılığına həsr etdiyi "Azərbaycan xalça sənətinin Kamili" kitabı da oxucuların ixtiyarına verilib. Milli Kitabxananın direktoru Kərim Tahirov Azərbaycan tətbiqi-dekorativ incəsənətində K.Əliyevin ayrıca yeri olduğunu və xalçaçılıq sənətinin inkişafındakı xidmətlərindən danışıb: "Xalqımıza məxsus ən gözəl ənənələrdən olan Azərbaycan xalçasını dünyaya tanıdan Kamil müəllimi yad edirik. Xalça sənətindən danışanda onun adını çəkməmək mümkün deyil. O, "Şeyx Səfi" kimi sənət əsərinin Azərbaycana qaytarılması yolunda çox səylər göstərirdi. Hər zaman deyirdi ki, ən azından, yenidən o portreti yaratmaq lazımdır".

Mədəniyyət və Turizm Nazirliyinin şöbə müdiri Fikrət Babayev son vaxtlar xalçaçılıq sənətinə daha çox diqqət ayrıldığını qeyd edib. "Ölkəmizə gələn hər bir xarici qonağın Xalça Muzeyinə üz tutması bunun göstəricisidir. Kamil Əliyev hər zaman müəllimi Lətif Kərimova olan vurğunluğunu gizlətmədi. O, muzeylərdə olan əsərləri sayəsində hər zaman yaşayacaq. Sənətkarlar heç vaxt ölmürlər, sadəcə olaraq, insanların biganəliyi onları yaddaşlardan silir".

Filologiya elmləri doktoru Nazim Dadaşov Azərbaycan xalçaçılıq məktəbində K.Əliyevin öz izi, öz üslubu olduğunu, AMEA-nın baş elmi işçisi Kubra Əliyeva təqdim olunan kitabda Kamil müəllimin özü və ailəsi haqqında demək iştədiklərinin əks olunduğunu bildirib. "Xalça ilk olaraq bir tarixdir, sonra isə estetik gözəlliyi əks etdirən maddiyyatdır".

Kitabın müəllifi Esmira Fuad Kamil Əliyevlə bağlı xatirələrindən danışıb.

Yeni Azərbaycan.- 2007.- 6 mart.- S. 8.