Martın 14-də
"Şirvanşahlar Sarayı
Kompleksi" Dövlət
Tarixi-Memarlıq Qoruq Muzeyində YUNESKO-nun Azərbaycan muğamına dəstək
məqsədilə həyata
keçirdiyi "Əbədi
muğam" layihəsi
çərçivəsində ilk muğam axşamı təşkil
edilmişdir.
"Şirvanşahlar Sarayında
Muğam axşamı"
silsiləsindən birinci
konsertdə xalq artisti Ağaxan Abdullayev "Zabul-segah"
dəstgahını ifa
etmişdir. Xanəndəni
tarda Malik Mansurov, kamançada Elşən Mansurov müşayiət etmişlər.
Xüsusi ustalıq və məharətlə ifa edilən muğam tamaşaçılar
tərəfindən sürəkli
alqışlarla qarşılanmışdır.
Konsertdə iştirak edən
xarici ölkələrin
Azərbaycandakı səfirliklərinin
nümayəndələri, beynəlxalq təşkilatların
təmsilçiləri Azərbaycan
muğamlarının ritminə,
insana xoş ovqat bəxş etmək gücünə heyran olduqlarını bildirmişlər.
Xalq artistləri Arif Babayev, Habil Əliyev, Ramiz Quliyev, Ağaxan Abdullayev və başqaları jurnalistlərlə
söhbətlərində Azərbaycanın
birinci xanımı, Heydər Əliyev Fondunun prezidenti, YUNESKO-nun xoşməramlı
səfiri Mehriban Əliyevanın muğamlarımızın
dünyada tanınmasında,
təbliğində göstərdiyi
əsl fədakarlığı yüksək
qiymətləndirdilər, onun
şəxsi dəstəyi
ilə hazırda muğam sənətinə
ikinci həyat bəxş edildiyini vurğuladılar. Bu layihəni də həmin diqqət və qayğının məntiqi nəticəsi olduğunu diqqətə çatdırdılar.
Tədbirin təşkilatçılarının
bildirdiyinə görə,
layihə çərçivəsində
gələn ilin sonunadək hər həftənin çərşənbə
günü belə konsertlər təşkil olunacaq. İki il davam edəcək
layihə respublikanın
bütün bölgələrini
əhatə edəcək
və bu müddətdə həm qocaman, həm də gənc ifaçıların
çıxışları təşkil ediləcək.
Qeyd edək ki, YUNESKO-nun "Əbədi muğam" layihəsində əsas iki istiqamət nəzərdə tutulur. Birincisi, muğamların arxivləşdirilməsi, sənədləşdirilməsi,
yəni yazıya alınıb elektron disklərə köçürülməsi,
ikincisi isə muğamların təbliği
məqsədi ilə belə konsertlərin təşkil olunmasıdır.
Tamaşadan sonra muzeyin əsaslı şəkildə yenidən
qurulmuş, milli arxitektura elementləri ilə bəzədilmiş
salonunda Rəna Rzayeva və Ruslan Bayramovun əl işlərinin sərgisi də nümayiş etdirilmişdir.
Mədəniyyət və
turizm naziri Əbülfəs Qarayev konsertdə olmuşdur.
Azərbaycan.- 2007.- 15 mart.- S. 6.