Gənc rejissorun Akademik Milli Dram Teatrının səhnəsində debütü

Milli teatr günü münasibətilə gənc rejissorların "Yeni teatr" devizi ilə keçirilən respublika festivalı çərçivəsində martın 10-da Azərbaycan Dövlət Akademik Milli Dram Teatrının səhnəsində tanınmış fransız yazıçısı və dramaturqu Jan Koktonun (1889-1963) "İnsan səsi" pyesi əsasında İlham Əsgərovun quruluş verdiyi eyniadlı tamaşa göstərilmişdir.
Kişi və qadın münasibətlərinə həsr olunmuş tamaşada rolları xalq artisti Bəsti Cəfərova, aktyorlar Elşən Şahinoğlu, Şəlalə Şahvələdqızı, Ziba Ramazanova, Rəşad Bəxtiyarov və Elnur Qədirov ifa etmişlər.
Tamaşanın rəssamı xalq rəssamı Nazim Bəykişiyev, musiqi tərtibatçısı Səbuhi Məmmədovdur. Pyesi Azərbaycan dilinə Sahib Novruzov tərcümə etmişdir.
Tamaşaçılar əsəri rəğbətlə qarşılamışlar.
Qeyd edək ki, "İnsan səsi" tamaşası Mədəniyyət və İncəsənət Universitetini bitirmiş və dram rejissoru ixtisası üzrə magistr təhsili almış İlham Əsgərovun rejissor debütüdür.

Azərbaycan.- 2007.- 11 mart.- S. 5.