Yudaşkinin yaz-yay kolleksiyası sərgiləndi

Modelyer geyimlərini təqdim etdi

Modelyer Valentin Yudaşkinin "2007-ci il yaz-yay" geyim kolleksiyası Heydər Əliyev adına Sarayda təqdim edilib. Təyyarədən enən kimi "Maşın" realiti-şousuna baş çəkib, iştirakçılara dəstək olan modelyer səhəri gün yeni kolleksiyalarıilə paytaxt sakinlərini tanış etdi. Bundan öncə isə Faiq Ağayevin yarım saatlıq proqramı təqdim olundu.

Modelyerin özü ilə gətirdiyi 16 model bir-birindən gözəl geyimlərlə podiuma çıxdılar. Tədbirə tamaşa edən yerli modelyerlərimiz həmin geyimlərin Şərq üsulubunda tikildiyini gizlətməyə çalışdılar. Tədbirdən sonra mətbuat işçiləri ilə söhbət edən V.Yudaşkin: "Milliyyətcə rusam. Şərqlə sıx ünsiyyətim olmasa da, onun üslublarından istifadə edirəm. Yəni Şərqin geyimləri diqqətimi özünə cəlb edir. Bir çox dünya geyimləri arasından Şərqə məxsus işləmələr o dəqiqə diqqəti çəkir. Çünki fərqlidir. Sizə təqdim etdiyim kolleksiyalarımda da Şərq çalarlarından istifadə etmişəm".

Söhbət zamanı V.Yudaşkin etiraf etdi ki, bu səfər sırf təşkilatçının deyil, özünün təşəbbüsü ilə gerçəkləşib. Azərbaycanın mədəniyyəti və incəsəntinə böyük maraq göstərdiyini bildirən modelyer "Aleks" şirkətinin rəhbəri ilə əlaqə yaradaraq kolleksiyalarını burada sərgiləmək təşəbbüsünü onun diqqətinə çatdırıb.

Qeyd edək ki, V.Yudaşkinin ideyası əsasında tikilən paltarlar nəinki Rusiya, bir çox dünya ulduzlarının qarderobunu zənginləşdirir. 1986-cı ildən fəaliyyətdə olan 44 yaşlı modelyerin adını daşıyan mode evi bir çox ölkələrdə məşhurdur. Onun "Cənnət quşları", "Milad yuxusu", "Karusel De Luvr", "Anna Karenina" kimi məşhur kolleksiyaları Fransa, İtaliya, Çin, Amerika və başqa dövlətlərdə yüksək səviyyədə qiymətləndirilib.

Kaspi.- 2007.- 16 mart.- S. 17.