Mükərrəmoğlu M.

"Kitabxanalar biliklər cəmiyyətində"

Müasir informasiya texnologiyaları kitabxanaların iş prosesinə də öz təsirini göstərməkdədir. Hazırda informasiya texnologiyalarının kitabxanalara tətbiqi məsələsi çox ciddi problem kimi qarşıda durur. Bu sahədə beynəlxalq əlaqələr də genişlənir. Azərbaycan və Rusiya mədəniyyət nazirlikləri bu istiqamətdə səmərəli əməkdaşlıq edirlər. Bu yaxınlarda çap olunmuş "Kitabxanalar biliklər cəmiyyətində" ikidilli layihə də bu əməkdaşlığın nəticəsində yaranmışdır. Bu gün ölkələr arasında rəqabətin ağırlıq mərkəzi intellektual sahəyə, idrak sahəsinə tərəf dəyişməkdədir. Azərbaycan Respublikasının Prezidenti İlham Əliyev informasiya cəmiyyəti məsələlərinə dair Cenevrədə keçirilmiş ümumdünya sammitindəki çıxışında demişdir: "Biz inanırıq ki, ölkəmiz həm regionda İKT-nin inkişafı, həm də inkişaf üçün İKT məsələlərində sistemli inteqratora çevrilə bilər". Bu kitabın nəşrində məqsəd də məhz müasir dövrdə İKT-nin kitabxanalara tətbiqini reallaşdırmaq yollarını araşdırmaqdır. Burada uzunmüddətli perspektiv üçün kitabxana siyasətinin və biliklərin idarə edilməsinin strategiyasını yaratmaq, Azərbaycanda və Rusiyada mədəniyyət, təhsil və kitabxana işi ilə məşğul olan praktiki işçilər və tədqiqatçılar arasında əlaqələri möhkəmləndirmək məsələləri qoyulmuşdur. Kitaba giriş məqaləsində Mədəniyyət və Turizm naziri Əbülfəs Qarayev yazır: "Bu nəşr müasir kitabxana işinin əsaslarının şərh edildiyi, biliklər cəmiyyətində kitabxanaların rolunun və funksiyalarının müəyyən olunduğu, dövlətin intellektual kapitalın idarə edilməsi baxımından kitabxanaların malik olduğu imkanlarının təsvir edildiyi əsas sənəddir". Kitabda qeyd olunur ki, qarşıda bizi çox mühüm bir vəzifə ölkəmizdə biliklər cəmiyyəti qurmaq vəzifəsi gözləyir. Qeyd edək ki, kitaba Rusiya tərəfdən giriş məqalələrini bu ölkənin mədəniyyət və kütləvi kommunikasiyalar naziri A. S. Sokolov, mədəniyyət və kinematoqrafıya üzrə Federal Agentliyin rəhbəri M. Y. Şvidkov yazmışlar. Kitab üç bölmədən ibarətdir. Birincisi bölmə "Azərbaycanın kitabxana şəbəkəsi biliklər cəmiyyəti milli modelinin tərkib hissəsi kimi" adlanır. Bu mövzuda Mədəniyyət və Turizm nazirinin müavini Sevda Məmmədəliyevanın "İnformasiya cəmiyyəti və informasiya mədəniyyəti problemləri qloballaşma konteksində, nazirliyin bölmə müdiri Lətifə Məmmədovanın "Biliklər cəmiyyətinin Azərbaycan modeli: qlobal informasiya və milli ənənə", professor Abuzər Xələfovun "İnformasiya xidməti" və başqa məqalələr verilmişdir. "İnformasiya cəmiyyətində kitabxana" adlı II bölmədə də bir neçə məqalə dərc edilmişdir. Bu bölmədəki məqalələrin müəllifləri əsasən rusiyalı mütəxəssislərdir. Burada "İnformasiya hamı üçün" YUNESKO Proqramının Rusiya Komitəsinin sədri, Yevgeni Kuzmin, Rusiya Federasiyasının Mədəniyyət və Kinematoqrafıya üzrə Federal Agentliyinin işçiləri Viktoriya Kraslinişikova, Mark Uçaçev, professor Tanya Kuznetsova, dosent Yelena Smolina, professor Yuri Qrixanov və başqalarının mövzu ilə bağlı çox maraqlı, elmi əsaslara söykənən məqalələri ilə tanış olmaq mümkündür. III bölmədə də çox maraqlı məsələlər verilmişdir. "Biliklərin menecmentinin Arxangelsk məktəbi" adlı bu bölmədə "Kitabxana şəbəkələrində biliklərin idarə edilməsi", "İntellektual azadlıq yolları Kitabxana və kütləvi sfera", "Kitabxana və qeyri-aşkar biliyin idarə edilməsi" və s. məqalələr oxucuların kitabxana işinin praktik məsələləri ilə tanış edir. Bu layihənin reallaşması xalqlarımızın bir-birinə daha da yaxınlaşmasına imkan yaradacaqdır.

Xalq qəzeti.- 2007.- 17 mart.- S. 6.