Fuad E.

"İrsə məhəbbətlə qayıdış - gələcəyə inamla yürüş"

Fransa Respublikasının Mədəniyyət və Kommunikasiyalar Nazirliyinin təşəbbüsü ilə hər il bahar fəslinin istirahət günündə "Muzeylər gecəsi" adı altında diskusiya keçirilir. Azərbaycan Respublikası Mədənıyyət və Turizm Nazirliyinin sərəncamı ilə "Muzeylər gecəsi" Azərbaycanda da geniş qeyd olunmuşdur. Beynəlxalq Muzeylər Şurasının (İCOM) 21-ci Baş Konfransının mövzusuna uyğun olaraq "Muzeylər və universal irs" devizi ilə keçirilən builki aksiya hər bir şəxsin, xüsusən də gənclərin muzeylərə və milli dəyərlərimizə marağını artırmaq, onları milli irsimizin ötürücülərinə çevirmək məqsədi daşıyır. Məhz buna görə də gənclər, yeniyetmə və şagirdlər təşkil olunan tədbirlərin təkcə tamaşaçısı deyil, həm də iştirakçısı olmalıdırlar.

Bu məqsədlə Beynəlxalq Muzeylər Şurasının (İCOM) Azərbaycan Milli Komitəsi və Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyi "İrsə məhəbbətlə qayıdış - gələcəyə inamla yürüş" adlı tədbir hazırlamışdır.

Tədbir "İrs" folklor ansamblının çıxışı ilə başlandı. Daha sonra "Hər yallı özgə əhvallı" - adı altında Naxçıvan Dövlət Universiteti nəzdindəki tələbə teatr-studiyasının rəhbəri Gülxarə Əhmədova, həmin universitetin tələbələri Şəhla İsmayılova və Rahib Əliyev yallı rəqsinin müxtəlif növlərini tamaşaçılara təqdim edərək Şərur yallılarının üç növünü tədbir iştirakçıları ilə birgə ifa etdilər. "Evimin gərəyi, əynimin bəzəyi kilim" adlı kompozisiyada gənc modelyer İnci Kərimovanın kilim parçaları ilə işlənmiş geyim kolleksiyası nümayiş etdirildi. "Nağıllardan doğan nağıl" bölməsində isə iştirakçılar xalça üzərində əyləşib qədim xalq nağıllarını dinləmək və seyr etmək imkanı qazandılar. "Yuğ" Dövlət Teatrının aktyorları nağılların səhnələşdirilmiş versiyasını, bir qrup gənc yazıçı - Rasim Qaraca, Aqşin və Tural Səfərov isə məşhur nağıl süjetlərinin uydurulmuş versiyalarını təqdim etdilər. Bununla yanaşı, uşaqlar və valideynlər üçün nəzərdə tutulmuş xüsusi proqram - xalq oyunları, əyləncə və viktorinalar nümayiş etdirildi. Tədbir boyu tamaşaçılar muzeyin zallarında xalçalar fonunda milli geyimlərdə şəkil çəkdirmək imkanı da əldə etdilər.

Qeyd edək ki, aksiya Avropa Şurasının himayədarlığı ilə keçirilmişdir. Bu haqda Avropa Şurasının mətbuat şöbəsinin www.coe.int/rres saytı və eləcə də www.nuitdesmusees.culture.fr saytında məlumat verilmiş, burada Azərbaycanın, Bakı şəhərinin və Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyinin proqramı xüsusi vurğulanmışdır.

"Kim bilir neçədir dünyanın yaşı?"

Dünyanın yaşının neçə olduğunu heç kəs bilmir. Tarixin nə qədər yazısı olduğunu da bilmirik, ancaq dünyanın yaşından, tarixin yazılarından bizləri agah edən muzeylərdir. Məbədgahımız, milli sərvətimiz olan muzeylər. Hər saxsını, kağız parçasını, hər məzar daşını, qoruyub saxlayan, nəsildən-nəsilə ötürən, yadigar saxlayan muzeylərimiz. 18 may - Beynəlxalq Muzeylər günü münasibətilə "Muzeylər gecəsi" adı altında gerçəkləşdirilən kompleks tədbirlərdən biri də "İstiqlal" muzeyində keçirildi. N saylı hərbi hissəsinin əsgərlərinin də qatıldığı tədbiri "İstiqlal" muzeyinin əməkdaşı, muzey işini dərindən bilən, vətənsevər ziyalımız Amaliya xanım Rzaqızı açdı. Amaliya xanım tədbir iştirakçılarının diqqətinə çatdırdı ki, Vətən adi bir əmanət, yadigar əşya deyil, vətən ər oğulların, igidlərin, qəhrəman övladların, şəhid babaların, dahi şəxsiyyətlərin, böyük dühaların müdrik yadigarı, əmanətidir, bu əmanəti yaşadan, təbliğ edən, nəsillərə tanıdan vasitələrdən biridir, indi hər birimizin qürur hissilə eksponatlarını seyr etdiyimiz "İstiqlal" muzey Vətənimizi azadlığa, müstəqilliyə aparan yolu, maddi-mənəvi sərvətlərini özündə nümayiş etdirir muzeyimiz.

Bakının 162 saylı məktəbinin şagirdləri bir-birindən maraqlı çıxışları ilə vətənə, onun ədəbiyyatına və mədəniyyətinə olan məhəbbətlərini ifadə etdilər. "İmproteks" şirkətlər qrupunun nümayəndəsi çıxış edən hər bir məktəbliyə hədiyyələr bağışladı.

Muzey mərkəzində həyata keçirilən tədbirlərdə Mədəniyyət və Turizm nazirinin müavini, AMEA-nın müxbir üzvü Sevda xanım Məmmədəliyeva da iştirak edirdi.

Beynəlxalq Muzeylər günü münasibətilə düzənlənən "Muzeylər gecəsi" tədbirlər proqramı hər bir iştirakçıda bir ruh yüksəkliyi, doğma diyara, Vətənə məhəbbət hissi, milli-mənəvi, maddi sərvətlərə sahiblik duyğusu aşılayır, onları işıqlı sabahımızın fəal qurucusu olmağa səsləyirdi.

Respublika.- 2007.- 22 may.- S. 7.