Ayna-2007 II beynəlxalq foto yaradıcılığı festivalı iştirakçılarının bir qrupu AzərTAc-da olmuşdur

Bakıda keçirilən "Ayna-2007" II beynəlxalq foto yaradıcılığı festivalının Kanadadan, Serbiyadan, Sloveniyadan və Gürcüstandan olan iştirakçıları mayın 22-də Azərbaycan Dövlət Teleqraf Agentliyində - AzərTAc-da olmuşlar.
AzərTAc-ın Baş direktoru Aslan Aslanov agentliyin tarixi, müstəqillik illərində onun inkişafı, regional və beynəlxalq əlaqələri, dünya informasiya məkanına daha sıx inteqrasiyası üçün görülmüş işlər və qarşıda duran vəzifələr barədə qonaqlara ətraflı məlumat verdi.
Ümummilli lider Heydər Əliyevin Azərbaycanın Qərbə inteqrasiyası sahəsində əvəzolunmaz xidmətlərini xatırladan A.Aslanov ölkəmizin dünya birliyi ilə iqtisadi, siyasi, mədəni əlaqələrinin sürətlə inkişaf etdiyini, bu məsələyə Azərbaycan Prezidenti İlham Əliyevin xüsusi önəm verdiyini vurğuladı, həmin inkişafın dövlətimizin aparıcı informasiya agentliyinin fəaliyyətində də özünü göstərdiyini faktlarla diqqətə çatdırdı.
AzərTAc ilə qabaqcıl ölkələrin informasiya agentlikləri arasında əlaqələrə toxunan Baş direktor vaxtilə Azərbaycanın informasiya blokadasından çıxmasında görülən işləri yada saldı, Ermənistan-Azərbaycan, Dağlıq Qarabağ münaqişəsinin səbəbləri və nəticələri barədə ətraflı məlumat verdi, bu problemin aradan qaldırılmasında respublikamızın ədalətli mövqeyinin dünya dövlətləri və beynəlxalq qurumlar tərəfindən dəstəkləndiyini diqqətə çatdırdı.
Görüşdə demokratik cəmiyyət quruculuğu, həmçinin Avropaya inteqrasiya yolunu seçmiş Azərbaycanda "Ayna-2007" beynəlxalq foto yaradıcılığı festivalının əhəmiyyəti vurğulandı, kütləvi informasiya vasitələrinin əlaqələrinin genişləndirilməsi ilə bağlı fikir mübadiləsi aparıldı.
Səmimi görüş üçün təşəkkür edən tanınmış serbiyalı fotoqraf Tomislav Peternek 30 il əvvəl Azərbaycanda olduğunu yada saldı, müstəqillik illərində Bakıda gedən quruculuq işlərindən heyranlığını bildirdi, xalqımızın qonaqpərvərliyini xüsusi qeyd etdi, foto yaradıcılığı festivalının ölkələr və xalqlar arasında əlaqələrin inkişafındakı əhəmiyyətindən danışdı.
O və Sloveniyadan olan fotoqraf xanım Vesna Çervineç Bakı təəssüratlarını festival barədə fikirlərini çalışdıqları jurnallarda fotoşəkillərin müşayiəti ilə dərc etdirib AzərTAc-a göndərəcəklərini bildirdilər.
Sonra qonaqları maraqlandıran suallara cavab verildi, xatirə şəkli çəkdirildi.

Azərbaycan.-2007.-23 may.-S.4.