Belarusda Azərbaycan mədəniyyəti günləri

AzərTAc Mədəniyyət və Turizm Nazirliyinin mətbuat xidmətinə istinadla xəbər verir ki, mayın 22-dən 24-dək Belarus Respublikasında Azərbaycan Mədəniyyəti Günləri keçiriləcəkdir.
Mədəniyyət günlərinin proqramına klassik müsiqimizlə yanaşı, xalq mahnıları, rəqslər və estrada janrından nümunələr də daxil edilmişdir.
Ölkəmizin mədəniyyət və incəsənət ustalarından ibarət 80 nəfərlik nümayəndə heyəti artıq Belarusdadır. Azərbaycan Mədəniyyəti Günlərində həmin ölkənin Minsk və Bobrusk şəhərlərində incəsənət ustalarımız öz istedadlarını nümayiş etdirəcəklər.
Mədəniyyət günləri çərçivəsində belarus xalqına Azərbaycanın klassik, müasir və gənc nəslinə mənsub təsviri sənət ustalarının əsərlərindən ibarət sərgi də təqdim olunacaqdır.
Azərbaycan Mədəniyyəti Günlərinin açılış mərasimində mədəniyyət və turizm naziri Əbülfəs Qarayev çıxış edərək, tədbirin əhəmiyyətindən, ölkələrimiz arasında mədəni əlaqələrin genişləndirilməsinin vacibliyindən danışacaqdır.

Xalq qəzeti.- 2007.- 22 may.- S. 6.